Nihin CNA Le CDF nih Hakha Palik Sakhan Pawng SAC Ralhrang Hmun 2 Ah An Kah
============================
Nihin zinglei ah Hakha khua, Vom Tu Maung cerhtual pawng ah a ummi SAC ralhrag palik sakhaan pawng hmun 2 cu miphun ralkap nih an vung kah, tiah thawngpang kan theih.Khuami pakhat nih, “Zinglei sml. 7:00 hrawng ah khan an rak kah i minute 3 in minute 5 karlak hrawng meithal thawng a thang.
SAC ralhrang pahnih fak ngai in hliamhma an tuar,” tiah a chim.Atutan an kah hnanak hi palik sakhaan pawng SAC ralhrang hmunkhuarnak sianginn le cazin checknak zung (Sayinsit) an si, tiah Hakha Campaign for Justice nih thawngpang a chuah.Kanhnu August 2 ah khan CDF-Hakha nih Hakha SAC ralhrang palik sakhaan hi a voi khatnak an rak kah cang. Cu lio ah cun Hakhathar lamton zong ah kahdohnak pehzul in an tuah.
Nihin hi Kawlram 8888 Revolution kum 34 tlin camtuak a si i, Hakha khuachung lamton pawl ah SAC ralhrang nih pit ngaiin an congh.Hakha khuachung i chawdawr a tam u zong an khar hna, tiah Hakha khuachung ah dawr a tuahmi minung pakhat nih The Chin Journal ah a chim.
Relchap, University Siangngakchia 4 Cu Kum Thum Cio Thong Thlak Ding In Biakhiahnak An Tuahpiak Hna! Yangon University of Economics siangngakchia; Ko Kyaw Htat Aung, Ko That Aung Moe, Monywa University of Economics ah sianginn a rak kai balmi Ma Mu Mitzue le Yangon nitlak lei University ah kaimi Ko Sai Min Khant Kyaw tiin siangngakchia 4 cu August 5 ah Insein thong biaceih zung nih Section 505(A) in kum thum cio thong thlak ding in biakhiahnak an tuahpiak hna, tiah theih a si.
Tutan ah bia an ceihpiak mi hna hi Butathawng(ဗိုလ်တထောင်) peng no. 45 lam cung ah, a luancia March 12 zaan suimilam 10:00 hrawng ah SAC ralkap nih luhhnawh in an tlaih mi hna an si. An pali ning in Section 50(I) le 51(C) zong in taza an cuai rih hna, tiah anmah he naihniam in ummi pakhat nih media ah a chim.
“Atu tiang ah cun section 505(A) in kum thum cio thong thlak ding in biakhiahnak tuahpiak an si. Nihin August 8 ah Section 50(I) le Section 51(C) in tazacuai an tong ṭhan, biakhiahnak tuahmi cu a um rih lo,” tiah anmah he naihniam in a ummi nih cun a chim. AAPP cazin ning ah, SAC ralkap nih nawlngeihnak an lak 2021 in 2022, August 5 tiang ah tlaih a tongmi dihlak hi minung 11,925 an si cang i, cu chung in thongthlakmi 1375 an si, tiah an langhter.
Tamu Khuachung Ah Tualchung Mi 2 Cu “PDF nan si” Tiah Puh In Pyusawhṭi Nih An Thah Hna: Sagaing ramṭhen, Tamu Pahae (ပါဟဲ) hleidawnh ah sualnak ngei lo tualchung mi 2 cu “PDF nan si” tiah an puh hna caah SAC ralkap kuttang um pyusawhti nih an kahthah hna, tiah Tamu khuami nih an chim. Tamu khuachung Myomah sang, Pahae(ပါဟဲ) hleidawnh ah tualchung mi 2 cu nizaan August 7, zinglei suimilam 8:30 hrawng ah pyusawhṭi nih an kahthah hna, tiah Tamu khuachung ummi pakhat nih a chim.
Khuachung mi 2 kahthah an ton hnu, zaanlei ah kahthah an tonnak hleidawnh pawng ummi inn cheukhat cu SAC ralkap le pyusawhti nih luhhnawh in, thilri an thlokpiak hna i thilri man ngei hna cu an firpiak hna, tiah Tamu khuami nih an chim. Kahthah a tongmi hi mi note veve an si i PDF zong an si lo, tualchung mi sawhsawh an si ko, tiah khuami nih an chim.
Mindat Khuachung Ah Biaknak Lei Hruaitu Hna Tawlrelnak Lawng In Facang Cawknak Nawl An Pek Hna! Chin ramkulh chung ah fak ngai in kahdohnak a chuahnak hmun Mindat ah zapi eimi facang cu SAC ralkap nih rikhiah in an zuar, tiah tualchung mi nih an chim. Atu tiang ah tualchung mi hna cu Biaknak lei hruaitu hna nih ṭuanvo an lakpiak hna lawng ah facang cawknak nawl pek an si, tiah Mindat khuami pakhat nih media ah a chim.
“Kan herh zat in cawk khawh cu a si ko nain inn ah i chiah cu sianh a si lo. SAC ralkap nih rikhiahnak an tuah i Biakinn chung ah chiah a si. Rawl chumh a herh tik ah Biaknak lei hruaitu pakhat nih ṭuanvo lakpiak hnu lawng ah an kan thoh piak” tiah a chim. SAC ralkap hna nih cun a luancia August ni 6 in facang tun khat ah Ks. 40,000 in an zuar, tiah a chim chap.
SAC ralkap nih uknak an lak hnu ah CDF-Mindat le SAC ralkap kar kahdohnak a chuah thawk in, Mindat khuachung ah facang telh in zapi nih eimi thilri phorhnak nawl SAC ralkap nih an phih. Kaphnih kar kahdohnak ruang ah Mindat khuachung um mipi 9000 leng cu mah umnak innlo kaltak in ralzaam dirhmun an phan, tiah ralzaam bawmchantu hna nih an chim.
Hakha Campaign For Justice nih Mizapi Sin Ah Kahdohnak Kong He Pehtlai In Theihternak Cathanh An Chuah, A luancia August 6 ahkhan SAC ralkap pawl nih an umnak horkuang cu chuahtak ngam loin hriam ngan puah in an i hrocer. SAC ralkap hna cu chin ralkap hna nih drone hmang in voi 3 tiang bomb an thlakhnawh hna caah SAC ralkap hriamhma tuar an tam lengah sniper kahnak in SAC ralkap pakhat an hrilh.
August 7, ah SAC ralkap lei nih Chin ralkap hna cu voi hnih an nam hna i, Rungtlang lei in hriam ngan voi 15 puah in an rak bawmh hna. Fak ngai in kap hnih kar kahdohnak a chuak. Chin ralkap sniper kahnak in SAC ralkap 2 an thi ṭhan, 3 nih hliamhma an tuar. Chin ralkap lei cu an him.
Nihin, August 8 ah Palik sakhan thlang SAC ralkap nih umhmun an khuarnak sianginn le cazinsit-zung cu zinglei suimilam 7:06 ah Chin ralkap hna nih an kah i SAC ralkap 2 hliamh an pu. Chin ralkap kan him i, Drone hmangtu le bawmtu nan cung ah kan i lawm tuk, tiah Hakha Campaign For Justic nih nihin August 8 ah an thanh.
CDF- Zotung Nih Mizapi Sin Theihternak Le Ralrin Peknak Cathanh An Chuah!, A luancia August 6 ah Zotung hmumram, Nabung khuachung ah a lut mi SAC ralkap 80 cu nihin August 8 ah Nabung khua in an chuak, tiah theih a si. SAC ralkap hna cu Nabung khua in an chuak cang nain Zotung peng Yaungnat (ရောင်နက်), Nabung(နားဘုန်း), Ramsi(ရမ်းစီး), Annta(အန်းတ္တား), Panba(ပန်ဗား) le Tayarkung (သာသယာကုန်း) khua hna in ralzam mi hna cu an kir rih lo, tiah theih a si.
SAC ralkap umkalnak kong he pehtlai in mi cheukhat nih tualchung hriamtlai phu min bunh in mizapi sin ah thawng dik lo thanhmi kan hmuh caah, an thanhmi thawng dik lo nih mipi humhimnak a hnorsuan ahcun CDF-Zotung nih fakpi in dantatnak kan tuah lai, tiah an thanh.
Curuangah Gangaw-Razua lampi hman rih lo ding in thawng thanhnak kan tuahmi cu zulh ding in le, Zotung hmunram chung i a cangmi kahdohnak le tualchung thawng dik hna cu CDF-Zotung nih thawng thanhnak kan tuah lai, tiah CDF-Zotung nih nihin August 8, ah cathanh an chuah.
Leave a Reply