Nihin zing ah khan Hakha ah kahnak a chuak, Meithal thawngpang le Bomb puah thawngpang pehtlai in theih cuahmah a si tiah Chindwin News Agency nih a tarlangh. “Hakha hrambunh kan reporter phone in kan call i cu zong ahcun Meithal thawngpang le Bomb puah thawngpang kan theih len ko” tiah Chindwin News Agency nih cun a tarlangh hi asi.
Cun “Meithal nih Hakha inn cheukhat zong a khen mi a um len. Atu an i kahnak hi Thlacamnak Tlang hrawnghrang ah sidawh a si bik, Hakha thar lei hrawng ah a si” tiah Chindwin News Agency nih cun a langhter fawn. Nihin hi Kawlram chung hmun tampi ah kahnak a um tthan tiah theih asi. Chin ram zong ah Hakha lawng si loin hmun dangdang ah kahnak a um ve tiah theih a si nain a hmunhma taktak an langhter rih lo. V.O.M Journal
Chin pasaltha dihlak le khuami caah faak pi in thlacam hna usih. Note: Hi Hakha kahnak thawngpang hi Chindwin News Agency nih mirang in a cang cuahmah lio mi thil kong a tial mi asi. Atu tiang ah Hakha dirhmun zeihmanh theih a si rih lo. A herh ning in thawngpang thar dawi le Update kan rak i zuam ve te lai.
Myanmar ah minung hawi zawnruahnak he a rami Bill Richardson cu a kualtlawnnak kongah soisel a tong ngaingai tiah theih a si. Ralhrangbu hotu Min Aung Hlaing le ralhrang upa dang han he an i tonmi cu ralhrangbu thapeknak le cohlannak phunkhat a si tiah nuhrin covo lei thiamsang hna nih an chim.
Asinain Bill Richardson nih cun Min Aung Hlaing he kan i tonmi cu a thatnak a um ko tiah New York Times ah a chim. Myanmar ka tlawnmi cu covid 19 khamnak sii le minung hawi zawnruah bawmhnak kan pek khawh nakhnga ralhrangbu upa hna he cozah upa dang hna he bia kan i ruah.
A tawifiannak in kan chim ahcun a thanhnemmi biaruahnak kan ngei kho tiah Bill Richardson nih cun a chim. Asinain Myanmar ah Bikk Richardson a tlawnmi cu ralhrangbu thapeknak le cohlannak phunkhat a si i nuhrin covo caah zeihmanh san a tlai lo tiah an soiselnak cu New York Times nih a tial.
Richardson nih cun Myanmar a tlawnnak cu ralhrangbu thapeknak phun in ruah khawh a si ko nain a tlawn hnawhchan taktak cu Myanmar mipi hna nih an herhmi lawng ka tuaktanmi a si, tiah amah soiseltu hna cu a leh ve hna. Ralhrang nih nawlngeihnak an lak ruangah harnak le buainak a tongmi mipi hna cu pakhat khat nih kan bawmh hrimhrim hna awk a si tiah Richardson nih cun a chim fawn.
Richardson nawlnak bantukin NGO riantuantu pakhat cu Min Aung Hlaing nih thong in a chuah tiah theih a si. Asinain tlaih le thongthlak a tong liomi American Journalist Danny Fenster telh in ramkhel thongtla dang hna thlahnak kong le Suh Kyi he tonnak kong cu ka chim lo tiah Richardson nih The New York Times ah a chim.
Leave a Reply