SAC ralhrang nih a chungkhar, a chungkhat unau an thah hna i PDF Ah a Lut Ralhrang nih an thah

Nihin KNU hmunram, Lay Kay Kaw peng Raldohnak ah PDF pasaltha pakhat nih ram le miphun caah a nunnak a pek tiah theih asi. A nunnak a petu pasaltha hi KNU-KNLA he i bawm in ral a do cuahmah ve mi a si tiah Karen State News nih a langhter.A nunnak a petu pasaltha hi SAC ralhrang nih rampi uknak an lak i Sandah piah lio hrawng ah khan,

Achungkhar, a hawikom le a chungkhat neihniam pawl cu SAC ralhrang nih an thah ve hna caah lehrul cham ding in le SAC ralhrang cihmih hrimhrim ding in PDF ah a lut mi a si tiah an langhter. “A mah hi SAC ralhrang nih a chungkhar, a chungkhat unau le hawikom an rak thah hna lio ah faaktuk in lungfah a tuar mi asi.

Cun SAC ralhrang a pom lo lawng si loin ralhrang uknak cihmih le hrawh a herh timi thinlung in PDF ah a lut mi asi. Nihin raldohnak ah miphun le ram caah biakamnak a tuah bantuk in a nunnak a pek taktak cang” tiah an langhter hi asi. A mah hi a min cu an langhter lo, a si nain an upatnak, ngaihchiat pinak cu Karen State News nih mipi dihlak theih in an langhter hi asi.

Nihin December 17, 2021, KNU hmunram Lay Kay Kaw, Raldohnak ah KNU pasaltha nih a nunnak a pek than tiah theih a si. “SAC Ralhrang le KNU-KNLA karlak raldohnak ah pasaltha nih a nunnak a pek hi asi”. Nihin raldohnak ah a nunnak a petu pasaltha hi a min ah De Poe tiah theih a si. Mino te a si nain tulio rampi buainak hnu in ram le mphun caah hmaisuang in a cawlcang mi asi.

Biakamnak a tuah bantuk in nihin raldohnak ah ram le miphun caah a nunnak a pek tiah a mah a hawile nih a pumpak social media ah ngaihchiatnak langhter pah in thawngpang an langhter hi asi. Tutan KNU hmunram chung raldohnak ah PDF lei in pasaltha pakhat zong nih a nunnak a pek ve tiah theih asi. Cun KNU-KNLA pasaltha pakhat zong nih a nunnak a hun pek than ve hi asi. SAC ralhrang lei tucu a thi mi an tam taktak lawng si loin, tam ngai an nung in KNU-KNLA nih an tlaih hna hi asi.