Nihin Kan Chin Ramah Kan Theih Khawhmi Thawngpangchia Fonh!
=======================
CDF-Hakha Ralkap “Salai Biak Hnin” Ralram ah a Nunnak a Liam, Nizaan July 14, Dokthek le Chuncung karlak kahdohnak ah CDF-Hakha in Salai Biak Hnin nih ram le miphun ca ah a nunnak a pek, tiah thawngpang kan theih. CDF ralkap a hawile nih a ruak zong tlamtling tein an lak khawh cang.
Ngeihchiatnak Cathanh, Chinland Defense Force – Hakha i kan ralkap a si mi Salai Roland Kil Kam Thang ( Kum 20) le Salai Daneil ( Kum 18) hna nih 2022 July 7 ah hmaikal in ralhrang ralkap an dohnak ah ram le miphun caah an nunnak an pek. Kan ralkap hna nih ram le miphun caah nunnak thap in an i pekchanhnak cungah upatnak sang bik kan pek hna. Tantak mi chungkhar nan ngeihchiatnak kan ni hrawm. An thisen le an nunnak a liam mi cu kanram le miphun luatnak caah si ko seh. Chinland Defense Force – Hakha
Thantlang ah Mualkai Khuami Pa Pakhat Bomb nih a Puah Hnawh ca ah a Nunnak a Liam, Mualkai khua in Thantlang ah a kalmi kum 36, Pa No UK cu bomb nih a puah hnawh caah a nunnak a liam. Nihin ah an khua lei ah a ruak an tlunpi.
Falam Khuachung Hmun 3 ah Kahdohnak a Chuak, Tuzaan (July 15) sml. 7:45 hrawng in Falam khuachung hmun thum ah meithal kah thawngpang pehzul in a thang. Ahmasa ahcun Tlanglo sang in le Vankau lei in kahdohnak a thang i ahnu ah Palik sakhaan pawngkam in meithal kah thawng a thang tthan. Thil sining fiang ngaingai in theih a si rih.
Falam Khuachung Puahkehnak Kong Update! Falam khuachung ah zaan ah chuah lo ding, tiah SAC ralkap nih thawng an rak thanh cang mi he pehtlai in tuzan muika ahkhan mino pahnih cu khuachung ah an chuak i, SAC ralkap nih an kah hna. Kah a tong mi mino pakhat cu a nunnak a liam i, a ruak zong laak khawh a si rih lo. Pakhat tu cu a zaam manh tiah theih a si.
SAC Ralkap Nih Chuncung Khua Inn An Duah Țhan, Inn 15 Hrawng Kang Cang , Nihin July 15, Zinglei ah Hakha- Falam karlak um Hakha peng Chuncung khua cu SAC ralkap nih an duah than i tutiang ah inn 15 hrawng a ciam cang tiah theih a si. Zahan ah Falam lei in khualuhka inn 4 an duah. Nihin zing ah an duah chap țhan hi a si.
Bomb Lamhsual Ruangah A Mit Le A Ke Bul Mi Paletwah Ralzaam Pakhat Bawmh A Herh, Chin ramkulh, Paletwah peng ah bomb ai lamh sual i a ke le a mit 2 tel in a pum cungah hliamhma a tuar i Sitttwe sii-inn ah ai thlop mi ralzam Daw Win Khin cu bawmh a herh tiah theih a si. Paletwah , Myomah veng , celhhmun ralzaam umnak ah um mi, kum 42 Daw Win Khin cu June 20 ah khua kam tiva ah mehhang a zal i bomb ai lamh sual caah a mit pahnih, a ke khatlei a bul pin ah a pum chung ah hma in a khat .
Paletwah peng sii-inn ah nihnih chung an thlop hnu ah June 22 ni ah Sittwe sii-inn ah an kal pi i nihin tiang sii ai thlop i bawmh herh ko. Daw Win Khin hna chungkhar cu Paletwah peng Takaa Chaung khuami an si i 2020, April hrawngah Paletwah khuapi ralzaam sakhan ah an i dor i an pa um ti lo in fa 5 a zoh khenhtu hringtu nu pakhat a si. Thlopnak ding ah phaisa bawmhnak pek a duhmi hna nih pehtlaih nan duh a si ah cun Ph – 09420576056 ah pehtlaih khawh a si tiah theih si.
RELCHAP, Russia le Myanmar Nih Tuah Timhmi Meeting Ah i Tel Lo Dingin Zatlangbu Nih An Nawl Hna! Russia le Myanmar nih tuah timhmi Anti-terrorism meeting ah ASEAN ram hna le a hawikom rampawl nih meeting ah i tello in duhlonak langhter cio ding in Myanmar ram Democracy lei a cawlcang mi zatlangbu 448 nih nawlnak ca an kuat hna tiah theih a si.
ASEAN ram hna le a hawikom 8 in Ramleng Minister pawl i tel in tuah timhmi, a voi 13 nak ADMM-Plus meeting cu a ralaimi July 20-21 tiang Russia ram Moscow ah tuah a si lai i, cu meeting ah cun hawikom ram Japan, South Korea le US ramleng Minister hna cu meeting ah i tello dingin Myanmar Democracy lei a cawlcang tu Bu nih nihin ah cabawm an kuat hna tiah theih a si.
Hi meeting ah hin Australia, NewsZaland ram hna cu an kai lo lai tiah theih a si. Myanmar Ralkap nih Anti-Terrorism tlangtar tangah kum caan saupi, hi phung a buar, a biapi bik in Rohingya miphun cung ah miphun cihmihnak ding tiangin a buar, cun uknak lak hnu in rampi pi hna sin ah a buar fawn.
A hlei in hi meeting a tuahpi tuding Russia zong nih Ukraine miphun cung ah miphun cihmihnak ding tiangin nawl a buar ve, cu ca ah Russia -Myanmar nih tuahtimh mi meeting ah hin nan kai a si ah cun hi ramhnih tuahsernak thazang nan pek bantuk a si lai tiah cakuat bawmchung ah cun an tial. A luan cia kum ah a tuahmi a voi 12 nak ADMM-Plus meeting ah NUG, CRPH le PDF hna cu SAC nih Ralhrang an si tiah a fak chim. ADMM-Plus meeting ah a tel mi ram pawl cu ASEAN ram 10 le US, China, Russia, South Korea, NewsZaland, Japan,Australia, India hna an si.
Khin-U Ah SAC Ralkap Bomb Puahhnawh An Si I, Ralkap 15 An Thi! Khin-U Ah SAC Ralkap Bomb Puahhnawh An Si I, Ralkap 15 An Thi! Sagaing ramṭhen Khin-U peng ah SAC ralkap mawṭaw hna cu tualchung PDF nih nihin July 14 zing Sml 4 ah bomb an puahhnawh hna i, SAC ralkap 15 an thi, tiah theih a si.
Bomb puahhnawh an tonnak hmun cu Innpat(အင်းပတ်) khua pawng ah voikhat, Yee-U in an kir lei Myindaung-Thayatpinsuh (မြင်းဒေါင်း-သရက်ပင်စု) lam ah voi 2, Kaanpat khua pawng ah voikhat tiin bomb voili puahhnawh an si i, ralkap 15 an thih lengah midang 30 hrawng hliam an tuar, tiah Khin-U thawnglatu pakhat nih a chim.
“Nihin ah Siizung in SAC ralkap mawṭaw hme 3, mawṭaw ngan 1 le cycle 5 in SAC ralkap hna cu Khin-U lei ah an ra. Pyosawtee hna cu SAC ralkap 20 he an i bawm i bomb zohfelnak an tuah. Cu lio ah cun bomb puahhnawh an si,” tiah a chim. Bomb a puahhnawhtu hna cu KSO le tangrual phu DUGF/Wolf/ FAF/ Northern Tiger Group tel in Ldf phu 14 an i bawm, tiah KSO nih an thanh.
Tanintharyi Peng Ah Tiva Ti A Lianh Caah Sianginn 2 An Khar! Tanintharyi ramṭhen, Myat pengkomh ah tulio hrawng cu ruah fak ngai in a sur caah tiva ti an ṭhang i SAC nih an on mi sianginn lak ah 2 cu an khar chung, tiah theih a si. July 13 zinglei in tiva cu feet 13 leng a ṭhang i, zaan ah cun feet 14 tiang a phan, tiah tualchung mi nih an chim.
Tanintharyi i khausa mi pakhat nih cun, “Nizaan tiang ti a ṭhang peng i nihin ah cun feet 15 le 10 inches tiang a phanh cang caah sianginn an khar chung,” tiah a chim. Pawah(ပဝ) khuakomh, Pawah-Thayakone(သာယာကုန်း) khua le Thayakone in Tamoukchaung(တမုတ်ချုန်း) khua kalnak lam cu ti nih ft’ 2 tiang a phum caah sianginn 2 cu June 13 in khar a si, tiah pengchung fimcawnnak zung nih an thanh.
Leave a Reply