Ngeihchia ngai asi ko, India ram ah siizung pakhat a kaang i, minung 18 an thi

India ah May 1, cawn niruk ni ah khan siizung pakhat chung i COVID-19 mizaw zohkhenhnak ah inn a kaang i mi 18 an thi tiah theih a si.

A kaangmi COVID-19 mizaw zohkhenhnak siizung/inn cu India ram Gujarat ramkulh, Bharuch khua i Walfare siizung a si. Mizaw 30 cu an chanh manh hna. Asinain mizaw 14 le anmah zohkhenhtu, cun siizung riantuantu tiin a tlawm bik minung 18 cu an nunnak a liam.

Mei a kanghnak a ruang cu theih a si rih lo tiah tuanvo ngeitu nih an chim. India PM Narenda Modi nih meikanghnak ah a thimi hna ruangah a ngaihchiatnak le an chungkhar hna tlukin a tuarnak kong a twitter ah a tial.

India cu biatak tein COVID a karh ciammam i awlokchong le lungrethei in an um. Nikhat ah mizaw singli tiang an karh kho. US zong nih bawmhnak a pek.

The Chin Post