NATO Phu Hna Nih Chinese Embassy Bomb In An Kahdoh Mi Cu Zeitik Hmanhah China Mipi Hna Nih Kan Philh Lai Lo By Zhao Lijian
Kum 1999 lio ah Belgrade khuapi ah a um mi Chinese Embassy cu NATO phu hna nih Bomb in an rak kahdoh mi kha mipi hna nih zeitik hmanhah kan philh lai lo tiah China ramleng vuanci zung in chim nawl ngeitu a simi Zhao Lijian nih a chim. A luan ciami kum 23 a rau cang mi May hla ni 7 ah American hruaimi NATO phu hna nih Yugoslavia ram ah a um mi Chinese Embassy cu bomb in an rak kahdoh i Chinese journalist minung pathum an nunnak a liam i, Chinese Ambassador minung 20 leng hliam an rak tuar tiah theih a si.
NATO phu hna nih dohcawk lo le fak ngaingai an kan tuah mi pawl cu China mipi lei in zeitik hmanhah philh khawh a si lai lo bantukin hi bantukin kan tuanbia ah aa dawh lomi tuanbia kan si ter ti lai lo tiah Zhao Lijian nih Bejing ah tuah mi thawngzamh thianhhlimhnak ah a chim.
NATO phu cu mipi hmunhimtu tiah an ti ko nain a tak ngaingai ti ah cun vawleicung ram pumpi nawl a buar mi an si i, ramdang uknak cu an doh i, Vawleicung rampi daihnak zongah dawn khan tu an si i, sual ngei lo mipi tlikter zamter dingin an um mi an si tiah Zhao Lijian nih a chim.
Russia le Ukraine kar kahdohnak cu kahdohnak a daih deuh hnuah nitlak lei Europe ram cu nichuah lei ram hna ah NATO phu hna nih a voi nga nak thazaang a chap i, Security riantuan tuanvo laak nak a tuah ti zongin a chim chap. American hrauimi NATO phun lei nih Russia le Ukraine kahdohnak ah hmaitonhin biaruahnak cu ngalter in Europe, Asia-Pacific le vawleiciung ram hna ah buaibianak chuahter hi ngol ding zongin a chim chap.
Relchap, Kayin ramkulh, Pruso (ဖရူဆို) peng, Law Kyi Khu khua pawng ah SAC ralkap le Kayin mizapi ralkap vengtu phufonh hna karlak ah May 7 zinglei ah kahdohnak voihnih a chuak i, SAC ralkap 25 leng an thi, tiah KNDF Battalion 4 nih cathanh an chuah. Nizan May 7 zinglei Sml 8:30 ah Baw-La-Khe peng lei in a chuak mi SAC ralkap mawṭaw 20 cu Law Kyi Khu (လောကျေခူ) khua pawng ah KNDF nih an kahdoh hna i SAC ralkap mawtaw 4 a rawh lengah mawṭaw aa cit mi SAC ralkap dihlak minung 25 cu an thi. Cu mawṭaw a rawk mi pawl cu meikhangh in an hrawh chap, tiah theih a si.
Zinglei Sml 11:10 ah cu kahdohnak hmunah an hawile bawm ding in a ra mi SAC ralkap hna he kahdohnak a chuak ṭhan i SAC ralkap 10 a thi chap, a nung in 2 kan tlaih hna. Karenni ralkap lei in pakhat hliam a tuar, tiah KNDF Battalion 4 nih an thanh. SAC ralkap hna cu KA, KNDF Battalion 4 le Battalion 15 hna i bawm in an kah hna i, SAC ralkap sin in Machine Gun 1, RPG 1, MA 8 le hriamthil dangdang zong an laak, tiah theih a si.
Tanintharyi Peng Um SAC Ralkap Sakhan Pakhat PDF Nih An Luhhnawh: Tanintharyi ramṭhen, Tanintharyi peng um No. 4 Htung Kha (ထုံခါ) Thonginn sakhan cu Tanintharyi ramṭhen mizapi vengtu ralkap hna nih nihin May 8 zinglei Sml 5:00 hrawng ah luhhnawh in an kah hna caah SAC ralkap 3 an thi. Kahdohnak hi minutes 20 hrawng a rau i, SAC ralkap 3 a thi mi hna leng ah midang 3 zong hliam faak ngai an pu i, thi kho dirhmun ah an um, tiah Tanintharyi mizapi vengtu ralkap TDF nih cathanh an chuah. Htung Kha ( ထုံခါ) thonginn sakhan luhhnawh kahdohnak ah hin mizapi vengtu ralkap lei in 1 a nunnak a liam ve. Htung Kha thonginn sakhan cu Yee Phyo SAC ralkap Camp he meng 3 hrawng a hlatnak hmun ah a um mi a si.
SAC Ralkap Zaw Phyo Cu YDF-Htilin Sin Ah CDM A Tuah: SAC ralkap ralkhamnak thilri sehzung pakhat in ralkap Zaw Phyo cu April 15 ah YDF-Htilin sin ah CDM a tuah, tiah YDF Htilin nih cathanh an chuah. SAC ralkap nih an tuah mi thil ṭha lo hna cu ka duh lo caah CDM ka tuahnak hi a si, tiah ralkap Zaw Phyo nih a chim. SAC ralkap hriamnam tling( Full Equipment) he a rak i fonh mi hna cu phaisa sing 50 kan pek lai i, a himnak hmun ah kan chiah hna lai tiah YDF-Htilin in Swe Swun Ngun Battalion nih cathanh an chuah.
Relchap, Covid zawtnak a chuah hnu le SAC ralkap nih uknak an laak kumkhat leng chung ah ramchung chawlehnak rian i dinh cio a si i, pumtlamtlinglo zapi cu an rian in dinhter an si caah rian ngei lo in an um, tiah pumtlamtling lo bawmchantu hna nih Than Lwin Times ah an chim. Research tuahtu pakhat nih record a ṭial ning ah cun ramchung i pumtlamtlimglo 15% hi an mah le aa tlak ning in rian an ṭuan hna. Asinain, atu ah cun Covid zawtnak ruang le ralkap nih uknak an laak ruang ah rian ngei lo in an um dih ngawt hna.
“Company pawl zong an i dinh cio tikah rian tlawm chin lengmang i, a hmasa bik ah rian in chuah a tong mi cu pumtlamtlinglo pawl an si. Cu lakah nu hna cu pa nak in hmunhma an ngei lo deuh fawn. Phaisa laakluh an ngeih lo tikah harnak tampi an tong i, an harsa ngaingai,” tiah pumtlamtlinglo bawmchantu hna nih cun an chim. Pumtlamtlinglo pawl nih ruan ṭuan awk an i hmuh khawh lo tikah an pawcawmnak caah harsa ngai in an um i, an ngandamnak le thluak(mental) damnak ding caah a rannak in bawmh an herh ko, tiah cu lei kong he rianṭuan mi hna nih an chim. 2019 lio i milu relnak cazin ning ah Myanmar ramchung milu(population) 12.8% hi pumtlamtlinglo an si.
Leave a Reply