Nihin X’mas ni cu Thinlung ah ngaihchiatnak a faak ,Chin miphun nih laimi nih kan ngeih mi phung le phai puai vialte hna lak ah kan i ngeih bik mi hna cu X’mas,Chin Miphun Ni,Tho hi phunthum hi a si lai cuvialte lak ah kan i ngeihkhun mi cu X’mas i hi a rak si tawn. A ruang cu khuate lei ahcun Tho puai le Chin Miphun Ni hi rak hman tuk a si lem lo i X’mas cu khuate ko ah a nuam i khuate ah hin X’mas a sinak kha a fiankhun tawn.
Asinain Myanmar rampi dothlennak ruangah 2021 X’mas cu chungkhar he i then ni ah a hung cang ai! Miphun Dawt ruangah kan unau hna cu kan khualipi Thantlang chuahtak dih a si khawh lo ca ah venhim ding ah le mah le umnak Camp hmunhma Uico nih zulhding lam hna cu vencio a herh caah nihin X’mas ni ah kan unau cheukhat cu ramtang ah X’mas caan an hmang hna.
Mah le khua hawi le kawm hringtu nu le pa hna he X’mas zing ah Sunghno kan nu le chuanrawl ei kha an mitthlam ah van cuang tuk ve lai nain ram an dawtnak thinlung nih an duhmi le nuamhnak le lawmhnak hna cu an i thim khawh lo zia hna a hngalhter hna ca ah kan nih kan i lawmh lio ah an nih,. Cu vuivai lo tein hriam an i ken nang le lei kan X’mas thilthar he Biak inn lei panh ding in lawmhnak he kan chuah lio ah,.
An nih cu an Uniform an hriamnam kha an X’mas thil ah an canternak nih ka thinlung a ka suktuk. Nangmah le keimah nih kan i thim khawh lo mi kan zawn ah tlakter kan duh lo mi kha an liang ah an i khinh i nang le kei kan him nakhnga nihin ah hin holh zawng holh ngam lo in dai tein khan kan ral kha a kan venpiak ti hi philh hlah. zeitluk in dah hriamtlaih hi a har timi hi ramchung um le ramleng um nih nan i fiang lai lo ai fiangmi cu hriam a tlai ve mi lawng hi kan si.
Mah ton bak mi le minih chimnak in theihmi hna hi a naang ai dangtuk. a hlei khun in hi bantuk caan ah le Zaan Duty caan ah khin a si zaan Duty hi thla khat chung hna a si le bang ahcun thisa dermi nihcun celh ding a si lo. Nang le kei kan X’mas thuam dawh he khuachung ah kan vah vaih lio ah kan unau hna cu zeitik ah dah an rak kan kah lai ti phang in le ralring tein nihin X’mas hi hriamtlaihnak le Duty nak in an caan an hman lai hi tluk pumpeknak hi a um lai lo dah.
Laimi cu kan minung kan him mi kan i zaa lo kan vok ar le kan thimfang tiang him seh ti kan duh zeitindah hi tiangtiang in kan hriamtlai nih a kan ven khawh lai kan hriam nam ai lo lo tuk cu teh. Kachin le Karen hna cu kan minung kan him ahcun a za an ti kan nih cu kan minung him kha a zaa kan ti lo i kan ar le vok Thimfang tiang in him tein um kan duh kan i dang tuk.
Hi dothlennak ah hin an nih cu kum tamtuk an tuar cang nain an lung a dong lo kan nih cu kumkhat hmanh a tlinhlan ah kan lung a dong i kan hriamtlai hna cungah mipi kan vuivai kum 5 liam sehlaw hriamtlai hi nan kan ei duh men lai ti awk in kan um cucaah kan lungfim seh kan hriamtlai hna an i pumpeknak hi nang le kei kan thut bu le hawi le kawm he bia i ruahnak sawhsawh i kan i pumpeknak bantuk men a si hrim lo hih.
Thilthar zawng an duh ve,nuamh zawng an duh hna ngam tein kan mah bantuk in um an duh ve nain kan ram zalennak ca ah nihin ni hi X’mas a si ti hngal lo bantuk tein an thinlung duhnak zul lo in ram nih a herhmi tu ah khan an i pum pe hna meithal he X’mas ni ah ramtang le inn tang ah hmang ding in kan zawn ah i chiah cio hna hmanh usih kan duh hrimhrim lai lo.
An nih cu vuivai lo tein kan miphun le kan vawlei kan inn le lo veng ding in an i pumpe hihi a fa temi thil a si lo i Ngakchia ruahnak zawng a si fawn lo mipui tling le paraltha biakhiahnak le ruahnak a si. Nihin X’mas ni caan ah Duty in a um mi hriamtlai vialte nan dih lak Merry X’mas Pathian nih in veng hram ko hna seh. nan hawi le nih kan in tluk hrimhrim hna lo. Salai DK
Leave a Reply