Relchap,Sir Lanka Khuachung Humhimnak Fak Deuh In An Lak, Sir Lanka ram ah duhlonak langhternak chungah ralhrang dohdalnak ai tel tiah khuachung humhimnak fak deuh in an lak. Khuachung lam ah duhlonak a langhtermi hna le cozah a dirpi tu kar ah i dohdalnak a chuah hnu ah Tank telh in humhimnak fak deuh in an chiah. A luancia nikhatni zaanlei thawkin zaanchuah lo ding nawl an chuah nain mei duahnak le hrawhhralnak tiang a chuah caah ralhrang an i tel tiah lunghrinhnak an ngeih caah humhimnak la palek hna cu kahnak nawlpek an si.
Lir Lanka cu chawlehnak lei tlakcham a panh caah duhlonak langhternak a karh, ram chawlehnak lei a tlakcham tuk caah President Gotabaya Rajapaksa le a upa Prime Minister pa zong an rian i ngol dingin ramchung ah duhlonak an langhter. Duhlonak langhternak ah kahnak a chuah caah minung 5 an nunnak a liam, minung 200 leng nih hliam an tuar hnu ah President le a upa Prime Minister Mahinda Rajapaksa an rian in an i din. Prime Minister a rian in a chuah a thaizaan ah Prime Minister inn cu duhlonak a langhtermi hna nih an kulh i a nun himnak caah a inn in rianrang in an chanhchuah tiah AFP nih a langhter.
Ramkhel thongtla cheukhat hna le an chungkhar hna cu India ram ah an zaam tiah Social Media ah langhter a si nain India Embassy nih cun a cohlang lo, Sir Lanka ah India ralkap a kuat hna ti mi zong a cohlang lo. Sir Lanka ram harsatnak tongmi hna caah Dollar 3.5 Billion le eidin, sii-aii a chambau mi dirhmun ah an dir caah kan kuat hna tiah India cozah lei nih an thanh.
SAC ralkap nih Sagaing ramṭhen, YeOo peng nichuahlei Mintaipin khua mi 7 cu an thah hna. Nizaan May 11, chunhnu suimilam 3 luan hrawng ah Phung-ki 2 telh in minung 15 cu ralphaw caah an tlaih hna, tiah theih a si. SAC ralkap hna cu Sizun in Mintaipin khua ah an lut i, khua mi 7 an thah hna. Cun, phung-ki 2 cu thilthuam sawh hrukter in khua mi 13 he ralphaw ah an kalpi hna. PungnaGah khua phak hlan ah minung 3 cu an thlah than hna nain, 12 cu an kalpi rih hna, tiah tualchung mi nih an chim.
A luancia May 6 ah YeOo peng Hnawkung, khua ah a lut mi SAC ralkap nih inn 6 cu an khangh i, kum 20 luan tluk si mi nu pakhat zong an thah, tiah tualchung mi nih an chim. Thawng dang, May 11 ah Israel ralkap hna nih Opearation an tuahnak, Jenin khua ah a nunnak a liam mi Al jazeera thawnglatu Shireen Abu Akhleh thihnak nih cun Israel le Palestine karlak ah buainak a linhsatter chin i, Israel le nih Palestine lei thah a si, tiah Palestine lei an puh lio ah Palestine lei zong nih, Israel ralkap thah a si, tiah an puh ve.
Palestine mipi hna cu Jenin ah duhlonak langhter in, lampi an zawh i, buainak faak deuh a chuah nakhnga lo Israel palik hna nih mibupi cu thazaang in an kham hna. Palestine mibupi nih cun an miphun hawi journalist, Shireen Abu Akleh thihnak ah Isreal cu an mawhchiat i, journalist a thi mi dirhkamhnak ah a hmanthlak cu vawleicung hmunkip ah an phozaar colh. Al jazeera thawnglatu, Kum 51 mi, Shireen Abu Akhleh hi kah a ton lio ah, a angki hmai ah Press tiah aa taar mi vest aa hruk i, meithal pemh khawh lo mi luchin aa chinh nain a luchin nih a khuh lonak ah kuan nih a khen caah, siizung ah kapli a si ko nain meithal kuan a ton ka ah a nunnak a liam cang, tiah an chim.
Shireen thihnak kongkau ah hin US nih cun hlathlatnak tuah colh a duhnak a langhter i, Palestine mipi zong nih hlathlatnak tuah an duhnak, lampi zawh in an langhter. Shireen hi US le Palestine sinak citizenship a ngei veve mi a si. Jenin i kahdohnak a chuah lio video cu Israel ralkap nih a taar i, Al jazeera Journalist cu Israel kahthah siloin Palestine kahthah a si kong an chim.Hilio ah Palestine lei nih cun Israel nih kahdohnak video an taar mi cu Shireen kah a tonnak hmun he pehtlaihnak an ngeih lo kong le.
Israel nih thiam an i coternak lawng a si kong an langhter ve. Al jazeera thawnglatu thihnak kong ah hin vawleicung media tampi le ram hruaitu hna nih an lungṭhatlonak an langhter.Crd: The chin post. Indonesia ram,Bali tikulh ah kum 700 tlukin upa cangmi Paradise thingkung tiah min an sakmi thingkungpi ah taklawng bakin hmanaithla mi Russian muidawh Alina Yoga cu Indonesia ram in thawl asi.Alina Yoga nih hin hi thingkungpi ah 2019 ah Khan a rak kal i, Babakan Temple chung i kum tam tamtuk a si cangmi le a minthang tukmi thingkung ahcun taklawng bakin Yoga hmanaithla.Cu a hmanthlak cu Instagram ah a post caah a soisel tu an tam taktak.
Palik sinah an chimh hna i case tuah dingin a ti hna.Alina Yoga nih cun thingkungpi pawng i hman ai thlak lioah cun hlanlio pipi hnaaw ka theih tiah online chungah arak chim rih.Khuachung mipi pawl hna nih Alina Yoga cawlcangh ning cu ai dawh lo taktak tiah an ti i, kum 15 chung thong tlak khawhnak Indonesia daan le hmanthlak fihnung mi a post caah daan an tat tawnning hna in Alina Yoga cung zongah cun tlung ve seh tiah an ti.
Palik pawl nih cun an check hlat Peng caah Alina Yoga zong nih cun tha tein ngeihthiam a hal hna i,ka palh tuk ko tiah a ti hna.Alina te nupa cu an umnak pawngkam zah lo le nunning tha lo takin a um mi nan si tiah an ti hna i, Immigration Department lei nih an nupa in an ramchungin an chuah hna tiah theih a si.
Yangon ramthen, Myo Okkala telin pengkulh tambik ah zaan suimilam 9:00 hrawngah VanLawng thawngtheih a si hnuah , pengkulh tam bikah meikhu lawng te in a kkhat tiah mipi nih an chim. Myo Okkala , Yan Kin , Tamua telin pengkulh tambik ah minmei zaam hmuh a si bantuk in meikhu lawngte hmuh a si tiah mipi nih Khit Thit Media ah an chim.
” Zaan suimilam 9:00 ah vanlawng zuam thawng theih a si hnu ah khua chungah meikhu lawngte hmuh a si, min mei zaam cu an si lo. Inn chung hna ah a lut meikhu pawl cu, vanlawngin an thlah mi a si men lai . zeidah a cang ticu kan thei kho lo.” tiah Myo Okkala tualchung um pakhat nih a chim.
Leave a Reply