“Myanmar Ralbawi Hna Cu Zohfelnak Tuah An Hau” – UN High Commissioner on Human Right

“Myanmar Ralbawi Hna Cu Zohfelnak Tuah An Hau” – UN High Commissioner on Human Right: Myanmar ah a faak bikmi nuhrin covo buartu SAC ralkap bawi hna cu dantatnak pek dingin Argintina le Turkey nih ICJ ah taza an cuai bantukin, Myanmar ralbawi hna cu vawlei cung zulhphung ningin zohfelnak tuah an herh kong, June 14 i Geneva Conference an ngeih lio ah High Commissioner on UN Human Right Michelle Bachelet nih a chim.

Min Aung Hlaing hruaimi SAC ralkap nih nawlngeihnak an laak ruangah a ṭhangcho cuahmah mi Myanmar cu hnulei ah a kir ṭhan caah vawlei cung ram dangdang hna zong kan lung a ṭha hrim lo. Sualnak a tuahtu hna cu an tuahmi sualnak ningin dantatnak pek cu ram pakhat sersiamnak caah a biapi tukmi a si tiah a chim chap.

SAC ralkap nih ahlan lio in atu tiang an tuahmi sualnak cu a liamcia kum tampi chung khan dantatnak zeihmanh an rak ton lo ruang zongah a si, tiah Myanmar UN palai simi U Kyaw Moe Htun nih June 13, UN General Assembly ah a chim ve.

Russia Cu Pehzulh In Kan Dirpi Lai Tiah China Nih A Chim!: Tuluk nih cun Russia cu pehzulh in kan dirpi ko lai tiah June 15 ah Tuluk President Xi Jinping nih a chim. Tuluk dirhmun he pehtlai in US nih cun “Nan tuanbia aa dawh te lai lo” tiah a leh hna. Ukraine luhhnawh in kahdohnak tuahtu Russia cawlcanghnak cu Tuluk nih a mawhchiat duh lo pinah Russia cung ah dantatnak pek siseh, hriamnam in thazaang in Ukraine a bawmtu nitlaklei ram hna cu Tuluk nih cun a mawhchiat hna lehlam.

Tuluk President Xi Jinping(China) nih Russia cu pehzulh in kan dirpi ko lai tiah Putin he phone chung in an i chawnhnak ah a chimmi cu media nih an langhter. Febuary 24 in Russia nih Ukraine luhhnawh in kahdohnak a tuah hnu ah Putin le Xi Jinping cu phone an a voihnihnak an i chawnh a si. Russia dirhkamhtu le a hawikom simi ram hna cu “Nan tuabia aa dawh te lai lo,” tiah US ramdang palai nih a chim. Cred : The Chin Post