Mumoh ah helicopter an kah hnu ah ralkap nih thazaang chap in fak ngai in an doh hna

Mumoh ah helicopter an kah hnu ah rallokap nih thazaang chap in fak ngai in an doh hna !

March thla 25 ah KIA nih an lak mi Alaw Bum tlang umhmun cu lak than ding ah rallokap nih vawlei lei doh nak lawng si lo in vanlawng hna hmang in nitin pehtlai in an doh hna.

Mumoh peng chungah rallokap helicopter an kah khawh nak kong cu Kachin ralkap KIA rian ngei nih a chim.

Kachin ramkulh Mumoh peng chungah rallokap helicopter an kah khawh hnu in , rallokap lei nih vanlawng lei bawm tu, hriam ngan hna cu hmang in le thazaang chap in fak ngai in an kah than caah mipi lei in minung pahnih an nun nak a liam tiah theih a si.

Nihin May 3,2021 zing suimilam 8 hrawng ah Mumoh peng MyoTit le Kunglaw kar ah rallokap helicopter cu an Kah khawh nak kong KIA lei biachim nak nawl ngei tu Tongmangham Naw Bu nih a chim.

Cu helicopter an kah hnu ah MyoTit, Kunglaw le Sihat khua kiangkap ah rallokap nih vanlawng lei doh nak he hriamngan hna cu hmang in pehtlai in an doh hna tiah a chim.

Rallokap phu hna nih tu bantuk in fak ngai in kah doh ruang ah phungki pakhat le kum -60 hrawng a si mi pa an nunnak a liam tiah theih a si.Khua chung mi hna zong a tlawm bik para leng nih hliamhma an tuar tiah theih a si.

April 29 zong ah Mumoh peng cung KIA le ralhrang rallokap Brigade 77 fakngai in kahdoh nak a chuak i rallokap lei in minung 20 an nunnak a liam i an hriamnam pawl zong an lak khawh tiah KIA lei rian ngei pakhat nih a chim.

March thla 25 ah KIA nih an lak khawh mi Alawbum umhmun cu rallokap lei nih lakthan ding ah rallokap vawlei lei in le vanlawng in kah doh nak he nifatin pehtlai in an doh hna

Rallokap lei hriamtlai hna nih Kachin ramkulh lawng si lo in Kayin ramkulh zong ah vanlawng in an tuk hna.

April 27 zingka ah Thai- Myanmar ramri rallokap umhmun cu Kayin lei (KNU/KNLA) brigade 5 nih doh in an lak khawh hnu ah rallokap hriamtlai hna nih mipi hna cu tinh in vanlawng in kahdohnak an tuah.

Dakuai khua minung 200 fai um nak hmun Kayin khua hna cu rallokap nih vanlawng in bomb an thlak hna caah Kayin mi hna ralzam dir hmun an phan.