Monywa le Sagaing Karlak Ah SAC Ralkap Bomb Puah An Tong!

Monywa le Sagaing Karlak Ah SAC Ralkap Bomb Puah An Tong!: Monywa in Sagaing lei ah a kal mi SAC ralkap mawṭaw ngan pahnih cu nihin June 19 zinglei 10:45 ah tualchung mizapi vengtu ralkap nih bomb an puah hna i Mawṭaw pakhat cu a rawk, hliam tuar mi ralkap zong an tam ngai, tiah People’s Guerillas Commando-Myinmu(PGC-MMU) sin in theih a si.

“Mawṭaw pakhat cu ṭha tein bomb nih a khen caah kal kho ti loin a dir i, tamlak nih hliam an tuar. Tlawmpal ah an kan kah ve nain bomb puah ruangah an lau tuk caah ruahdamh in an kan kah,” tiah PGC-MMU lei ruan ngeitu Bo Bi Ron(ဗိုလ်ဘီရွန်) nih a chim.

Kahdohnak ah cun Moe Nyo Revolution Force M.N.R.F, PENTAGRAM, People Revolution Force P.R.F le People’s Gueriellias Commando- Myinmu hna an i bawm tiah theih a si. Hi phu 4 nih hin June 16 zinglei Sml 11 fai zong ah khan Sagaing in a kal mi SAC ralkap mawṭaw 2 cu Ganphia Zayat pawng ah padeta bomb lung 8 in an rak puahhnawh hna i, ralkap 3 an thih lengah hliamtuar zong an tam, tiah theih a si.