Mizoram Lei A Lut Ding Mizo Mawtaw Lailapur Ah Assam Nih An Den

Mizoram Lei A Lut Ding Mizo Mawtaw Lailapur Ah Assam Nih An Den Vairengte ah a um mi Lailapur riantuan vialte an thawl dih hna,Assam le Mizoram ramri kongah cozah pahnih palai hna an i chawnh hnuah Mizoram lei a lut ding mawtaw a taap mi hna cu nizaan zaanlei ah Assam palek le CRPF vennak he Mizoram lei kalpi a si nain Lailapur an phanh ah mipi nih lam an kham i, Mizo mawtaw cu thing le lung he an den tiah theih a si.

Lailapur mipi nih lam an kham i, buainak an tuah lio ah hin mawtaw ven dingah a rak zulh mi Assam palek le CRPF nih Mizo mawtaw hna cu venhimnak an pek khawh lo ruangah Mizo mawtaw hna cu Silchar Mizoram house ah an kir than tiah theih a si.

Zaan suimilam 10 hrawngah Mizoram lei ah mawtaw cheukhat cu a lut tiah theih a si i, Vairengte mipi nih Assam ram Lailapur hrawng mawtaw hna cu Mizoram lut lo dingin an kham ve hna.

Vairente Jt. VC le All NGO hna cu meeting an tuah colh ve i, Mah buainak hi Lailapur mipi nih an tuahmi a si caah Vairengte ah riantuan in a ummi Lailapur mi hna cu August ni 8 ah Vairengte chuahtak dih ding le Lailapur lehtama hna cu tukum chung rian nan tuan kho lo tiah theihter an si.

Mizoram lei a lut ding mawtaw hna congh ding a si ahcun Assam palek hman ti lo ding le CRPF nih Mizo hna himnak an pek khawh lo ruangah ramri ah Boarder Security Force (BSF) chiah ding.

Atu hnuah Lailapur hrawngah mawtaw kham than a si ahcun Lailapur mipi mawh a si lai. Lailapur mipi nih an hrawhmi mawtaw le thilri vialte cu Assam cozah nih liam dingin biachahnak an tuah tiah Vairente Jiont VC le All NGOs committee nih an thanh.

The Chin Post

Be the first to comment

Leave a Reply

Your email address will not be published.


*