Mizoram District 6 Ah Sianginn 112 Hon Than A Si

Mizoram District 6 Ah Sianginn 112 Hon Than A Si Mizoram chung covid-19 zawtnak a karh ruangah Sianginn vialte cu tukum kum hramthawk ah khar a si hnuah cozah nawlchuah ningin sianginn cheukhat cu hon a si.

Mizoram cozah nih Aizawl Municipal Coorporation leng lei Covid-19 zawtnak a umlo nak khua ah sianginn hon dingin nawl a chuah hnuah district 6 in sianginn 112 hna cu sianginn honnak nawl pek an si cang.

School Eucation Director Pu James Lalrinchhana nih Mizoram district 6 Aizawl, Champhai, Serchhip, Lawngtlai, Siaha le Saitual district DC hna nih an district chung zawtnak a um lo nak khua ah sianginn honnak nawl an chuah cang.

Department cazin ningin sianginn 112 hna cu phungning tein siang cacawnnak kalpi dingin nawl pek an si cang nain sianginn thianh le thil dangdang tawlrel a hau mi a um rih caah cacawnnak belte cu tha tein kalpi taktak khawh a si rih lo.Tuzarh chungah cun class thawk khawh a si cang lai.Khua cheukhat ah covid-19 zawtnak a um le umlo zohfel cuahmah lio a si tiah a chim.

Champhai district chung zawtnak a umlo nak khua cheukhat ahcun tuzarh August 16 in phungning tein sianginn kai a si.

East tuipui area chung Myanmar ralzaam hna um tam cem nak Farkawn ahcun ralzaam ngakchia sianginn a kai mi zei mawzat an um i, Primary section ah 70, Middle section ah 29 le High school ah minung 12, an dihlak in siangngakchia 111 an um tiah theih a si.

Serchhip district chung sianginn honnak nawl pek cia mi Chhiahtlang-N khua cu covid-19 zawtnak a ngei mi an um ruangah an sianginn kharh than a si.

The Chin Post