Mipi vialte hna kan tei hrimhrim lai, Lung awtawm in rak um hlah uh!!

Dear Thantlang Peng Mipi; Ralzamnak kumkhat kan tling
=================================
Thantlang peng mipi vialte, nan dam hna maw? Nan khuasak tintuknak a har tuk ko lai dah! Zingnu sin rai kan thawinak Biakinn runrem zong kha nan ngai tuk cio theo lai. Chungkhar tling in ruuninn nuam ah rawl dum ti zong kha nan ngai tuk lai dah! Ral ruang ah nunnak pe cia chungkhar hna caah zuunkhung tuar in ni le thla rel a har tuk hringhran lai. Zalam pi ah zatial tlaih in tlonlen ti zong kha nan ngai ruangmang ko lai. Zingnu kutzung dawh a langhnak Thantlang khua hrim nan ngaih zawn ah zan ih merem khawh lo zan zong a tlawm lai lo. Nan fale CDF-TT zong nih kan mipi kan in ngai hna, nunnak pe mi kan hawikom dawt hna kan hlam hna i Thantlang khua hrimhrim zong hi kan ngai tuk ve.

Nihin ni hi nikum ah cun Thantlang khua chung ah ral a thawhni a si. Kuanzen thawng a than ni a si. Kangh-uh kan ton ni a si. Kan mithmuh Pathian ah kan ruahmi kan pastor an thah ni a si. Kan biaknak an doh nithla a si. Kum tling lo hngakchia an kah hna ni a si. Kan bochanmi khuanu/pa an thah hna ni a si. Hngakchia bik in upa bik tiang nih an nun, an thisen an pek ni a si. Inn zuat satil hna, tlikzamnak i laklawh in an awlokchon ni a si. Mitthli um-ek a tlak ni a si. Kan vawlei a muih ruangmang ni a si. Thisen le kangh-uhnak in tuanbia kan tialni a si. Thantlang peng Calender nih aa chinchiah peng dingmi ni le thla a si.

Dohthlennak Calander kan zoh tikah kan pekchanhmi thisen le nunnak (Mipi -6, CDF-16), inn (1500 hrawng) a tam lengluang. Ralzam (minung 15000 hrawng) cu a him deuhnak hmun panh in kan i thenthek dih. Dohthlennak man hi kan tuar khawhnak nih a tlinh lo tiang in a man a rak fak. Aruang cu Ralkap uknak a hram in kan bongh khawh i Federal Democracy ram le Chinram Pennak kan ser khawh nakding caah a si. Hi hmuitinh phanh nakding ah hi zat hi kan pek cang. A herh ahcun aherh ning zat in i pumpek dingah timhcia kan si. Hi lamthluan ah hnukir awk kan tha ti lo. Kan kut le kan uniform ah nunnak a pe cangmi thisen a neh dih cang.

Thantlang peng kan mipi hna, kan tei hrimhrim lai. Lung awtawm in um hlah uh! Aruang cu Chin mipi humhimnak le Chinland humhaknak ding ah CJDC (Hriamtlai phu 17) nih kan i zuam cuahmah. Thantlang peng humhak nakding ah Battalion paruk nih fek thup in kan kham. Thantlang ralhrang, Thantlang peng an chuah khawh lonakding ah Suimilam 24 chung, hmun 4 ah kan erh-tonh hna. 15 million project, Pathian nih lam a kan hruai i tlam a tlin ahcun Pathian nih caan rau lo ah teinak a kan pek ko lai.

“Koliat nih David a tei bal lo. David nih Koliat a tei”. Lungtekep pakhat ah Pathian aa phuan ahcun teinak a um ko. Cu Teinak petu Pathian cu kan zumh bak. A kan tanpi lai kan zumh fawn. Cu caah kan tei hrimhrim lai.

Thantlang peng mipi hna, a tu lio caan hi thlacam i bawmh caan, nun i hrawm caan, pakhat le pakhat i hnemh caan, thazaang i pek caan, lungsau a herh caan, i hnek nun ngeih a herh caan, lungthawn a herh lio caan a si. Mipi nan lungdongh ahcun CDF le CNA hmai kan kal kho lai lo. Ral kan tuknak a hnursuan khawh. Mipi nih lungthawng tak in le fekthup in kan dirpi hram uh!

Kan karlak ah dawtnak le zawnruahnak hi a sangbik ah chia usihlaw, teinak kan phanh hlan tiang lungrual tein hmainawr chin rih ko hna usih! crd-SalaiUk Nunbawi Chuntei

Relchap, (Crd-The Chin Post), Tanse Kahdohnak Ah SAC Ralkap 20 Leng An Thi, Sagaing ramṭhen Tanse peng tualchung hriamtlaiphu fonh le SAC kar kahdohnak ah SAC ralkap 20 leng an thi tiah theih a si. A luancia September ni 16 ah Sagaing ramṭhen Tanse peng Okphoaing ( အုတ်ဖိုအိုင်) khua ah sentari congmi tualchung hriamtlaiphu le tualchungmi 10 hna cu SAC ralkap tatmah 33 nih meikhangh buin an rak thah hna ruangah a tuban tuk in tualchung hriamtlaiphu hna i fonh in teirulchamnak ah kan kahdoh hna hi a si tiah tualchung hriamtlai phu hna sin in theih a si.

SAC ralkap rallam an sialnak ah bomb an hmanhmi lungthum an i lamh pin ah 30 mm in an kah hna i SAC ralkap 22 cu hmakhat te ah an thi, cu hnu ah tualchung hriamtlaiphu lei in bawmchantu phu dang an ra i an kahṭhan hna caah SAC ralkap 3 an thi ṭhan Hi kahdohnak cu Tanse PDF, Guerrilla War Fare KPK, TSR, Tanse Tiger, Nine Star, PLA, TCRF PLA, TPC battalion 6,7,8,10,16 hna i bawm in an tuah mi si tiah theih a si.

Tualchung hriamtlai phu nih Pale palik sakhan an kah hna caah SAC ralkap 6 an thi, Sagaing ramṭhen, Pale palik sakhan cu tualchung hriamtlai phufonh nih September 17 ni ah an kahdoh hna caag SAC ralkap 6 an thi tiah God of Myaing People’s Defence Force nih an chim. Cu palik sakhan ahcun SAC ralkap, palik le pyosawhṭi tiin minung thazaang 100 hrawng nih umhmun an khuar tiah theih a si.

” Zaanlei suimilam 5:47 hrawng in kan kah hna, kutser 90mm, 40mm, 60mm hmang in kan doh hna, anmah lei zong nih 60mm le 90mm hmang in an kan kah ve. Kaphnih kar i kahdohnak suimilam pakhat leng kan rau, suimilam 7:00 a luan hnu ah kanmah lei hlianhma tuarnak um loin hnu kan tolh kho” tiah God of Myaing People’s Defence Force chungtel Bo Satphi nih a chim. Kaphnih kar i kahdohnak ah MVRF in ralkap pakhat nih a kee ah hliamhma a tuar, SAC ralkap lei in minung 6 an thi 3 nih hliamhma an tuar tiah theih a si.

Cu kahdohnak cun God Of Myaing People’s Defence Forc, Pale battalion 1, Pale pengkomh battalion 8(Pale battalion 2), Pale battalion 4, Pale battalion 6, MPL, Thein Hngiat Ni, Shwe Hin Thar, TKGF, Nagani, A Ngyia May, PCM, Angyia Daung, Khine Lay, Ever Freedom, MVRF(Pakokko battalion 6), Saka pah-kah-phah le Pale tualchung hriamtlai phufonh hna nih an kah hna tiah theih a si.

Ganmah ah phaisa 5000Ks catlap a lem tlap 299 le 10000Ks catlap a lem tlap 30 an tlaih, Magway ramṭhen Ganmah khua, Ganmah car gate in Magway lei kuat dingmi parcel bawm pakhat chungah thongnga ca tlap a lem le thonghra ca tlap a lem an tlaih tiah theih a si. Cu parcel bawm a kuatu nu a umnak inn zongah thongnga tlap a lem le thonghra tlap a lem an tlaihchap tiah theih a si.

“Nihin ah kan tlaihmi hi parcel bawm pakhat chungah thongnga tlap a lem tlap 86, thonghra tlap a lem tlap 5 kan hmuh. Cu thil a kuatu nu a inn cu kan kawl i, a umnak inn ah thongnga tlap a lem 213 le thonghra tlap a lem tlap 25 kan tlaihchap. Parcel bawm kong he pehtlaiin a hlan kan in thawng kan theih caah a tu bantukin kan tlaihkhawhnak hi a si” tiah Ganmah gate ah rianṭuantu pakhat nih a chim.

Sagaing ramṭhen ah SAC ralkap nih PDF sakhan an lak, Sagaing ramṭhen, Monywa tualchung hriamtlai phu hna umnak Nyaungpin(ညောင်ပင်) sakhan le Yesagyo hrambunh tualchung hriamtlai phu umnak sakhan cu SAC ralkap nih luhhnawh in an lak tiah PDF nih an thanh. Yesagyo peng tualchung hriamtlai phu umnak sakhan cu September 16, zinglei suimilam 6:00 ah minung thazaang 200 he SAC ralkap hna nih an kan luhhnawh i an laak, sing 500mmk man tluk thilri kan sung tiah Yesagyo pah-kah-phah nih September 17 ah cathanh an chuah.

Minung i hliamhnak cu a umlo nain kan sakhan an kan hrawhpiak i an kan khanghpiak tiah Yesakyo tualchung hriamtlai phu chungtel Ko Wai Gyi nih a chim. “Sakhan cu dalan 2 nih lam hmuhsak in an ratpi hna, caan a tlai hlan ah kan hrialmanh hna caah minung i hliamhnak cu a um lo nain kan thir khawhlomi thilri meiseh, solar, motor, cycle le zeidang thilri hna cu an kangh dih” tiah a chim chap.

Cun Monywa hrambunh, Black Dragon phu hna umnak Nyaungpin(ညောင်ပင်) sakhan cu September 17 ah SAC ralkap nih an luhhnawh ṭhan tiah Black Dragon phu nih September 18 ah cathanh an chuah. PDF chuugtel hliamhma tuarmi an um lo na in, cycle, kutser meithal, 40 mm bomb le hriamthil dangdang hna an lak i, sakhan cu mei an khangh ta. Sing 200mmk man tluk hrawng kan sung tiah an thanhmi ah cun an langhter.

Pyin Oo Lwin ah ngakchia kum 12 pakhat telhin minung 5 an thah hna, Mandalay ramṭhen, Pyin Oo Lwin peng Sika khua ah Ar zuatnak dum pakhat ah nihin September 18 ni ah thah a tongmi ruak 5 hmuh a si tiah theih a si. “Thah a tongmi hna hi nu 3 le pa 2 an si i ar zuatnak dum chungah thah an ton hi a si, thah a tongmi hna chungah kum 12 tluk ngakchia pakhat aa tel” tiah Pyin Oo Lwin mi bawmchantu phu nih an chim.

“Zinglei suimilam 11:00 tluk hrawng ah ar zuatnak dum chungah thah an ton hi theih a si. Thah a tongmi hna hi an chungkhar ningin an si. Pakhat cu a thaw a um rih nain sizung phanhpi hnu ah a nunnak a liam ve. Thah an ton hi zaan ṭim a si lo ah zing deilei a si kho tiah zumh a si” tiin Pyin Oo Lwin mi bawmchantu phu chungtel pakhat nih an chim.

Taze kahdohnak ah SAC ralkap chungtel 10 an thi, Minkin ah SAC ralkap 2 an thi ṭhan, Sagaing ramṭhen, Taze peng, September 17 ni kahdohnak ah SAC ralkap chungtel 10 an thi tiah Taze PDF nih an thanh. Taze peng Aungchainta khua mei a khangtu SAC ralkap hna cu Taze PDF battalion 6, battalion 7, battalion 8,battalion 10, battalion 16, battalion 25, battalion 26, KPK, PLA le pah-kah-phah phufonh hna nih nihin zinglei suimilam 11:00 hrawng ah hriamngan le hriamhme he an kah hna caah SAC ralkap a thimi an tam tiah theih a si.

YeOoGone(ရေဦးကုန်း) khua lei ah rallam sialin a kalmi SAC ralkap ṭat-mah 33 in ralkap hna cu Taze PDF battalion 6 le battalion 7 nih nihin chunhnu suimiliam 12:20 ah an bawh hna i minutes 10 hrawng an kah hna caah SAC rallap 10 an thi tiah theih a si. Kahdohnak a dih hnu zaanlei suimilam 5:30 hrawng ah hliamhma tuarmi SAC ralkap hna cu Lawng 2 cungah an khin hna i an kalpi hna tiah theih a si.

September 17, chunhnu suimilam 1:00 ah Minkin peng Taunglat hmunram ni chuahlei zawnah umhmun khuarmi SAC ralkap le pyusawhṭi hna cu Minkin peng tualchung hriamtlai phufonh nih an kah hna caah SAC talkap 2 an thi tiah theih a si. Crd-The Chin Post

Facang Man Tum Deuh Timi Um Loin A Kai Chinchin lai! Innpa ram a si mi India ram ah rikhiah in facang kuat a si lai timi thawngpang ruangah Asean ram chungah facang zuar le cawk man cu a kai ter i, ram chung facang man zong hinak a let in a kai kho tiah facang cawk-zuarnak (facang zuar le cawk nak leiin chawlehnak nak a tuah tu, facang man sining a theitu hna nih an chim.) man chungin facang phortu hna nih an chim nakin theih a si.

Ram chung Facang man cu zarhkhat chungah facang cu an mah le a phun ningin a man cu a hung kai deuh i Kawlram facang lei phu nih cathanh an chuah mi facang man ning ah cun Shewbo Pawsan (ရွှေဘိုပေါ်ဆန်း ) cu tunkhat ah 93000ks (Thawngsawmkua le thawngthum) tiang a phan.

Facang le grain (Sapa) Commodity depot chiahnak ah Pawsan facang phun pawl cu tunkhat ah 50000ks (thawngsawmnga) in 90,000ks (Thawngsawmkua) tiang a phan i, a tu Kawlram chungah kan ei cuahmah mi a tu lio facang man ningah Pawsan cu tunkhat ah ting khat leng tiang a si.

Facang man cu a tu lio ah thla fatin te a kai hi, thla 4 le thla 5 lei a si cang. A cawk zong an cawk kho cio ko, tum deuh timi cu a tu thla a donghnak lei ah cun aum ti lo. kawl ram ah kan ei mi facang man laak ah a man fak bik lei zong a si ve mi, phun tha zong a si mi Shwebo Pawsan pawl cu kum dang ah cun tunkhat ah 60000ks (Thawngsawmruk) a si.

A tu ah cun tunkhat ah 60000ks (thawngsawmruk) in 90000ks (thawngsamkua) in 100000ks (tingkhat) lei a phan. Tum deuh timi um loin hinak in facang man a kai rih lai caah facang a chuah caan ah facang tampi chuah a hau. Facang man a tum deuh lai timi caan cu a ruah zong ruah khawh a si ti lo. Tum deuh timi zong a um lai, ti ruah a si lo. Mipi zong hinak in kan harsa deuh chinchin cang lai., tiah a chim. Facang man hlei in grain (စပါး) man lei in ramchung စပါး man cu ting 12 in ting 15 kar a phan tiah kan theih.

Cu bantuk thiamthiam in Chiti le ngapih, eidin a tuktek zong hi nak in a kai deuh lai tiah theih a si. Tahchunhnak ah Laitlang ah kan ei bik mi facang hi Hmawbi phun a si hei ti ko usih law, kum dang ah cun tunkhat ah zatuak in 20000-25000ks a si i, a tu ah tunkhat ah 50000-70000ks leng tiang a kai kho tiah kan theih.

Relchap; (Crd-The Chin Post) National People Defence Force – NPDF Cu Hriamthil An Ngeih Lo Caah Dohthlennak In I Din Cang! Sagaing ramṭhen ah umhmun khuarmi National People Defence Force – NPDF cu SAC ralkap dohnak dingah hriamngan kan ngeih lo caah dohthlennak ah kan i din cang, tiah fianternak an tuah tiah theih a si.

National People Defence Force – NPDF cu SAC nih nawlngeihnak a lak hnu in SAC ralkap le NPDF karah voi 5 lawng kahdohnak a chuak, tiah theih a si. NPDF hruaitu bawino Thu Rein nih, “Dohthlennak chungah hriamnam le minung thazaang kan chambau tuk ruangah ralkap hna hi kahdohnak hmun ah ka thlah ti hna lo. A ruang cu hriamnam loin ralram ah thih ding ka siang hna lo,” tiah a chim.

Ni 15 Chungah Sagaing Peng Tualchung Mi 7 Nak Tlawm Lo Thah An Tong, Sagaing ramṭhen, Sagaing peng khuate ah September 1-17 tiang ah tualchung mi 7 nak tlawm lo thah an tong. A thimi hna chungah khuabawi zong an i tel, tiah mi bawmchantu phu sinin theih a si. “Nizan September 16 ni zinglei sml 2:00 hrawng ah Sagaing peng Sinmay(ဆင်မြေ) khuami Nan Aung Thu(50) le Phyo Min Thu(35) hna cu an inn ah hriamtlai phu khat nih an thah hna,” tiah mi bawmchantu pakhat nih a chim.

September 14 zan sml 11:00 hrawng ah Sagaing peng Aungsipin(အောင်စည်ပင်) khua i, inn zaa uktu Win Khine cu a inn ah a um lioah hngalh lomi hriamtlai phukhat nih an thah, tiah theih a si. September 12 zanlei sml 4:00 hrawng ah Sagaing khua Nilar sang No.3 Sagaing-Shwe Bo pengkomh kalnak lam ah kum 20 tluk nu pakhat le kum 30 tluk nu pakhat cu an hmai hup buin thah an tong. An ruak pawng ah kum 2 tluk ngakchia pakhat zong an hmuh, tiah theih a si.

September 8 zanlei sml 1:00 hrawng ah Sagaing peng Htantaw(ထန်းတော) khuami Zaw Ye Aung cu a inn ah hngalh lomi hriamtlai phu nih nam in an sawh i a thi. September 1 zinglei sml 6:00 ah Sagaing khua Seti(စည်တီး) sang ummi Kyaw Naing zong minung 2 nih an rak kah thah. Bukalay Khua Ah Rohingya 58 Cu Thong Kum 2 Cio Thlak Ding In Bia An Kiahpiak Hna, Ayeyarwaddy ramṭhen, Bukalay pengah rammi sinak a ngei lomi Rohingya 58 cu, thong kum 2 cio thlak ding in biaceih zung nih September zarhhnihnak ah bia an khiahpiak hna tiah theih a si.

“An dihlak minung 58 an si, cu chungah kum tlinglo nu 15 le pa 9 an I tel. Mino chiahnak sakhan lei ah an kuat hna,” tiah palik pakhat nih a chim. Rohingya 58 cu an umnak Rakhine ramkulh in Yangon lei an kal lio a luancia August 28 ah an kalnak tilawng a rawh caah an rak tlaih hna hnu zarhhnihnak ah kum 2 cio thong thlak ding in biaceih zung nih bia khiahpiak an si hi a si.

MyitNge Khua Tlanglanwg Sehzung Uktu Nu Kahthah A Tong, Mandalay ramṭhen, MyitNge(မြစ်ငယ်) tlanglawng sehzung general manager zung uktu nu pakhat cu meithal in kahthah a tong tiah theih a si. Amarapura(အမရပူရ) peng Satu Setkwe(စာတိုး စက်ကွေ့) sangah a ummi zung uktu Kyi Kyi San cu nizaan September 16 ni zung a lawi pahah hngalh lomi phu nih meithal in an kah i, a hmun ah a thi colh, tiah theih a si. SAC nih nawlngeihnak an lak hnu in CDM tuahtu tlanglawng rianṭuan hna cu an tlaihkhih hna i, an umnak inn in an rak chuah hna.

PDF Bantuk In Aa Umtermi Pyusawhti Phu Cu PDF Nih An Kah Hna Caah Minung 7 An Thi, Tawpu(တောပု) khua pawngah PDF bantuk in aa umtermi Pyusawhti hna nih tualchung mi hna checkhlatnak an tuah len hna caah kan kah hna, tiah People’s Defence Force – South Monywa nih cathanh an chuah. Nizan September 16 zaanlei sml 1:25 ah Tawpu khua pawng Sepauktwe(ဆယ်ပေါက် တွဲ) hmun ah Pyusawhti nih PDF bantuk in an i umter i, mi chawkvai an checkhlat len hna, tiah theih a si.

Pyusawhti nih chekhlatnak an tuah tik hna ah cycle, phone le tangka tibantuk nan fir lai lo, ralkap thawngpang mi nan pe hna lai lo, cuti nan tuah ahcun kan in thah hna lai, tiah an tlerhnak hna, cucaah khuami nih PDF an chimh hna i PDF nih an kah hna hi a si, tiah theih a si. Pyusawhti pawl cu 40 mm lung 4 in kan kah hna caah 7 an thi. An hawile bawmtu dingah an rat caah an hriamnam kan la hmanh lo, tiah PDF- South Monywa nih cathanh an chuah.

Hpapon Pengkomh Ah Kahdohnak Voi 60 Leng A Chuak I, SAC Ralkap 50 Leng An Thi, Hpapon pengkomh ah KawthuLay No.(5) Brigade le SAC ralkap karah zarhhnih renglo chung kahdohnak voi 60 leng a chuak i, SAC ralkap lei in 51 an thi, tiah Mutraw News nih an langhter. September 1 in 15 tiang Mutraw pengkomh, Kawthu Lay No.(5) Brigade hmunram ah Brigade 5 kuttang ralkap hna le SAC ralkap karah voi 68 kahdohnak a chuak i SAC ralkap 51 an thi, 31 hliamhma an pu, tiah theih a si. SAC ralkap a thimi chungah ralbawi 3 an i tel i, hliamhma pumi chungah Deputy Battalion Commander 2 ai tel. Kawthu Lay ralkap lei in ralkap 1 a nunnak a liam i, 11 hliamhma an pu, tiah Mutraw News nih a langhter.

Kalaymyo Peng SAC Sinah PDF Chungtel An I Ap Tiah Timi Cu Anmah SAC Ralkap Lila Nih An Tlaihmi Hna An Si, Kalaymyo peng PDF chungtel minung 4 cu phungning tein SAC ralkap sinah an i ap i September 15 zinglei ah biahrennak minsen kan thutter hna hnu ah kan thlah hna, tiah SAC nih a dik lo ningin thawng an rak thanh.

SAC sinah an i ap tiah timi Nu 4 hna cu PDF chungtel an si lo pinah pehtlaihnak a ngeimi hmanhh an si lo tiah theih a si. A luancia September 4 ni lioah Mawleik peng SAC ralkap nih, Kaungkwe(ကောင်းကွေ) khuami nu 2, Hmanngwe(မှန်နွဲ) khuami nu 2 hna cu an rak tlaih hna i Kalaymyo ah kan in thlah te hna lai tiin an rak timi hnatu an si, tiah tualchung mi hna sinin theih a si.

SAC Ralkap Hriamngan Kahmi Bangladesh Ram Ah A Tla Ngakchia Pakhat A Thi! Nizaan september 16 ni ah, SAC ralkap nih Bangladesh ramri thluangthluan hriamngan in an kah i an kahmi hriamngan kuan Bangladesh ramchung ah a tlak caah Rohingya ralzam kum 17 ngakchia pakhat a thi i minung paruk hliam an tuar tiah, tuanvo ngeitu hna nih cun an chim.

SAC ralkap le AA kar kahdohnak hi ramri hmun tampi ah a cang i kan nih lei zong nih ramri vengtu ralkap thazang kan chap len ve tiah, Bangladesh Bandarban District Deputy Commissioner(DC) nih a chim. SAC Ralkap hriamngan kuan hi Bangladesh ramchung ah atu le tu a tlak tawn caah, SAC khinhmi Ambassador zong kan kawh i kan lungtlin lonak zong kan chim len cang tiah, a chim chap.

SAC ralkap nih hin Rohingya ralzam mi Myanmar ramchung kir than dingmi timhtuahnak hi a hlawhtling hlah seh tiah, Rohingya ralzam umnak cu hriamngan in a rak kah tawn tiah Rohingya ralzam hna nih cun an chim ve.

AA Nih An Tlaih Hna Hnuah An Thlah Thanmi SAC Ralkap Nih Thong A Thlak Chap Hna, Rakhine hriamtlai AA nih an tlaih hna hnu ah dam tein an thlah thanmi paoh cu SAC ralkap nih thong an thlak chap ve hna tiah theih a si. Kaphnih kar ikahdohnak chungin AA nih an tlaihmi hna SAC ralkap pawl cu tha tein zohkhenh le fimtawl an si hnu ah AA nih an thlah than ko hna nain SAC ralkap nih an zumhraih ti hna lo caah Rakhine ramkulh Sittwe khua thonginn ah thong an thlak chap hna hi a si.

AA nih tlaihmi lawng siloin SAC ralkap sinak in a zaam mi hna zong thongthlak chih an si i Sittwe thonginn ah a um mi hi minung 90 hrawng an si tiah theih a si. SAC ralkap chungah khat le khat i hmuhthiam lonak le i entainak a karh chin lengmang i an hruaitu le cungah mawhchiatnak a faak chin lengmang tiah SAC ralkap chunglei theitu pakhat nih a chim.