Kahdohnak Thawngpang Tha Fonh!!
===================
Karenni ramkulh, Bawlakhe ah SAC ralkap an umnak gate cu tualchung hriamtlai phufonh nih luhhnawh in an kahdoh hna caah SAC ralkap 7 an thi, hliamhma tuar zong an tam tiah KNDF battalion 10 nih October 20 ah cathanh an chuah tiah theih a si. October 18, ah Bawlakhe khua luhnak inn dot li cung ah umhmun khuarmi SAC ralkap hna cu, lampi lamkam pawng an umnak gate sakhan le Pon tiva hleidonh ah gate tuah in ummi SAC ralkap hna cu KNDF battalion 10, battalion 21, KA phufonh nih kalhnawh in an kahdoh hna tiah theih a si.
SAC ralkap umnak gate cu luhhnawh in kahdoh an ton caah SAC ralkap 7 an thi, 7 leng nih hliamhma an tuar. Tualchung hriamtlai phufonh lei hliamhma tuarnak umlo in hnu an tolhkho tiah theih a si.Kayin ramkulh, Kyaphyu hmunram ah cycle khalh in phaisa kawlnak tuahtu bantukin ai um ter i a thliin hlathlainak a tuahtu SAC ralkap kuttang um duh-aya-khah-bu-bu(ဒုအရာခံဗိုလ်) Soe Myint cu pistol, kut cheh bomb le motor pakhat he Justice Soldier- PDF phufonh nih an tlaih tiah theih a si.
Lion Battalion Commando Special Force le KTL Army phufonh nih cawlcanghnak an tuahnak hmun chung ah, cycle i khalh in phaisa kawlnak tuahtu bantukin ai um ter i hlathlainak tuahtu ralbawi pakhat cu tualchung hriamtlai phufonh nih a thilri he an tlaih hi a si. Tlaih a tongtu ralbawi pa cu U Soe Myint cu khah-lah-yiah 97 in aya-khan-bu rengin rian a rak ṭuan bal mi a si i a thli in SAC ralkap ca ah rian a tuan tiah theih a si.
Sagaing ramṭhen, Yinmapin peng Yinpaungtaing khua in a chuakmi SAC ralkap hna cu bomb puahhnawh in doh an ton caah ralkap 9 an thi tiah Yinmapin pengkomh battalion 2 in ṭuanvo ngeitu pakhat nih a chim tiah theih a si. October 20, zinglei ah Yinpaungtaing khua ah umhmun khuar in rallam sialtu SAC ralkap hna cu khuachung in an chuah lioah tualchung hriamtlai phu hna nih bomb puahhnawh in an doh hna hi a si tiah theih a si.
“Yinpaungtaing ah helicopter in minung thazaang an chapmi ralkap hna cu bomb puahhnawh in kahdoh an ton caah ralkap 9 an thi” tiah Yinmapin pengkomh battalion 2 in ṭuanvo ngeitu nih a chim. SAC ralkap hna cu Yinmapin pengkomh battalion 2, Yinmapin peng battalion 1 le Daungmin phufonh nih an kahdoh hna tiah theih a si.
October 20, zinglei suimilam 4:00 in CDF-Kanpetlet le SAC ralkap kar fakngai in kahdohnak a chuak i SAC ralkap 4 an thi, hliamtuar an tam tiah theih a si. Kaphnih kar i kahdohnak cu zinglei suimilam 8:00 in chun suimilam 12:00 tiang a rua, fakngai in hliamh a tongmi SAC ralkap hna nih hriamngan he Kanpetlet khuachung lawng si lo in khua kiangkap zong an kah chih.
A tu ah SAC ralkap hna cu Kanpetlet le Cindoi khua ah vanlawng in hriam thazaang le minung thazaang an chap caah, CDF- Kanpetlet phu hna he kahdohnak fak a chuak kho ṭhan mi a si tiah theih a si. Cucaah Kanpetlet khua pawnghrawng ummi hna nih SAC ralkap nih an duh paoh in hriamngan an hmang tikah siseh, vanlei kahdohnak an tuah tikah siseh i dornak ding caah timhcia tein bomb khur cawhcio ding ah Chin Defense Force – Kanpetlet nih cathanh an chuah tiah theih a si.
Magway ramṭhen, Gangaw peng Gan khua palik sakhan in palik pakhat cu a hriamtling he CDM cawlcanghnak a tuah caah, October 20 ni ah sing 50 laksawng kan pek tiah Gangaw pengkomh battalion 1 nih an thanh tiah theih a si. Gan khua palik sakhan in palik pakhat nih Gangaw pengkomh battalion 1 sin ah October 16 ni ah CDM a tuah hi a si. CDM a tuah ah G3 meithal pakhat, kuanfang 89, kuanbawm 2 a hun I ken chih caah October 20 ni ah phaisa sing 50 an pek tiah theih a si.
Pago ramṭhen, Paungde peng Seinpanpin(စိန်ပန်းပင်) khua pawng ah nizan October 19 chun ah SAC motor 3 cu, bomb kan puahhnawh caah palik 1 an thi, 2 hliamhma an pu, tiah Paungde People’s Defense Force(PPDF) nih cathanh an chuah tiah theih a si. “Cycle in an ra i, khuabawipa zong ai tel. Tangka in lentecelhnak tuahmi hna ngunkhuai khawlh ah an kal, cun PDF he ai pehtlai mi paoh an kawl hna pinah an zumh lomi hna cu tangka an hal hna,” tiah tualchung mi pakhat nih a chim.
Cu kahdohnak ah PPDF Battalion 3601, Companny 5 nih kan kahdoh hna. Kanmah lei in a thimi le ai hliammi kan um lo, tiah PPDF nih an langhter.October thla thawk in, ni 19 tiang ah SAC kuttang palik 20 leng nih, CDM an tuah cang i mi tam deuh cu mino deuh an si, nifatin ti awk in CDM tuah kan duh tiin an kan chawnh, tiah CDM lei tawlreltu pakhat nih a chim tiah theih a si.
SAC nih palik CDM a tuahtu an tam tuk caah khua chung um palik sakhan cu ṭha tein zohkhenhnak an tuah, tiah CDM palik bawi pakhat nih a chim. “Atu bantukin palik CDM a tuahtu an tam caah sakhan hmu tiang in an rengh hna. An phone zong an chuh hna pinah a caan caan lawng ah leng an chuahter hna. CDM palik pawl cu a himnak hmun ah kan chiah cang hna, tiah a chim chap.
Cun kan hnu nai te ah camipuai phit(distance) dingin a kalmi palik cheuthum cheuhnih zong kir ti loin an tlau beh i pehtlaih khawh an si ti lo, tiah theih a si. SAC nih nawlngeihnak an lak hnu in SAC kuttang palik CDM a tuahtu hi 20,000 hrawng an si cang, tiah theih a si. Pago ramṭhen a hnulei Ohphu palik sakhan cu, October 20 zinglei ah PDF nih an kah caah palik 5 an thi, tiah Mae Oh(မြေအောက်) Guerrilla Ohphu in ṭuanvo ngeitu nih a chim tiah theih a si.
Ohphu peng, Wai khuakomh palik sakhan cu October 20, zing sml 2:00 hrawngah minutes 17 chung PDF nih an kah hi a si. “Palik sakhan ah a ummi hi 12 tluk an si. Kaphnih kar kahdohnak a chuak i, palik 5 nak tlawm lo an thi. PDF lei a thimi le aa hliamni kan um lo. An sakhan hauhruang tiang kan naih hna i, kan kah hna. Hriamnam aa thlau tuk caah hnu kan kir than,” tiah Ohphu PDF in ṭuanvo ngeitu pakhat nih a chim. Ohphu hmunram ah PDF le SAC ralkap kahdohnak a chuah lengmang caah tualchung mi a za leng an zam cang, tiah theih a si.
Yangon ramṭhen, Hlaing peng Thiri Myaing 13 sang ah October 20 zinglei ah SAC ralkap officer nuva le an chungkhar pakhat cu an kah i an thi, tiah tualchung mi hna sinin theih a si. October 20 zinglei sml 9:30 ah Hlaing peng Thiri Myaing 13 sang um Thiri Myaing motor dirnak(မှတ်တိုင်) pawngah inn a tlung liomi SAC ralkap officer nuva le an chungkhar pakhat an kah hna hi a si, tiah theih a si.
“SAC ralkap officer le a nupi nih an bawile nawl an hal hna i, an chungkhar va ton dingah an kal lio Thiri Myaing motor dirnak pawng an phanh ah an nuva le pa pakhat thah an ton hi a si,” tiah tualchung mi pakhat nih a chim.Kalay chaklei Kalay-Tamu lampi, meng 55 sakhan in October 17 zinglei sml 6:30 hrawngah SAC ralkap 70 hrawng cu Kalay lei hoih in motor ngan 2 le ke in rallam an sial, tiah Zomi PDF nih cathanh an chuah.
Zing sml 7:30 hrawngah Kanhla khua chaklei hlei pawng in kan bawh hna i, Zomi PDF, Kalay PDF Battalion 8, 12 le 3 hna i bawm in minutes 20 chung hrawng kan kah hna, tiah Zomi PDF nih an langhter. October 17 zing sml 10:00 ah ke in rallam a sialmi SAC ralkap pawl cu Myalay Taung pura pawngah Kalay PDF nih bomb in an puahhnawh ṭhan hna ca ah October 17 kahdohnak chungah SAC ralkap 5 an thi i, 1 hliamhma a pu, cun Zomi PDF ralkap pakhat hliamhma hme a pu ve, tiah an langhter. Crd-The Chin Post
Relchap, Thla 5 Chungah Myanmar Rammi 50,000 Leng Thailand Ram An Phan, Thailand-Myanmar kaphnih hnatlaknak tuahnak he phung ning tein thla 5 chungah Myanmar rammi 57,000 leng Thailand ram an phan cang, tiah theih a si. Myanmar rammi 57,000 leng chungah zatuak 80 cu Foreign Job Search Agencies hna nih an thlahmi hna an si. Zatuak 20 hrawng hi Agencies nih thlah mi siloin hmun dang ah rian a ṭuanmi an si, tiah Mesauk hrambunh Jane Addams Children’s Book Awards(JACBA) Chairman Moe Gyu nih a chim.
Zatuak 80 tluk hi Agencies hna nih an auh hna i, rianṭha an ṭuan. Zatuak 20 hi thil ṭhit rianṭuan ding an si ko nain rubber dum ah rian an ṭuan, tiah theih a si. A luancia October 19 ah Ratphone(ရတ်ထဖုန်) pengkomh Sone khala peng chungah Myanmar rammi 50 cu Thailand palik nih an tlaih hna, cun October 18 lio zongah Malaysia kal ai tim mi Myanmar rammi 30 cu Ratchaburi pengkomh ah tlaih an rak tong than.
Mizoram Palik Nih Bing Rang Rupees Sing 2,800 Leng An Tlaih, India-Myanmar ramri Mizoram ramkulh, Champhai pengkomh palik nih, nikhat chungah Rupees sing 2,800 leng man bing rang cu hmun li ah an tlaih, tiah theih a si. Nizan October 19 zanlei sml 11:30 hrawngah Champhai pengkomh Tuipui pawngah motor pakhat cu checkhlatnak kan tuah i, Zokhawthar khuami 2 sinin bing rang 5 gram leng kan tlaih, cun zan sml 9:00 hrawng ah Vaphai khuami pa pakhat sinah bing rang 24 gram a ritmi kan tlaih ṭhan, tiah Mizoram palik nih cathanh an chuah.
Cu pinah nizan ṭhiamṭhiam ah Kankawn check gate ah tualchung mi pakhat le Myanmar rammi pakhat sinah bing 24 gram kan tlaih ṭhan. Tarpho khuami pa pakhat sinah bing rang 156 gram a ritmi kan tlaih chap, tiah an langhter. Mizoram palik nih nikhat chungah bing rang 5.688 KL, Rupees sing 2,800 leng man kan tlaih, tiah cathanh an chuah.
Kalay Airport Remh An Timh Caah November Thla Chung Zarhkhat Ni 3 Ai Din Lai, Sagaing ramṭhen, Kalaymyo Airport remh an timh caah November thla chung cu zarhkhat chung ah ni 3 hrawng vanlawng zuan ai din lai tiah vanlawng tickets zuarbak lei ṭuanvo ngeitu nih an chim tiah theih a si.
Kalaymyo airport remh an timh tuan ah an liim dihlo a si ah cun November thlakhat chung cu zarhkhat ah niruk ni, zarhpi ni, nikhat ni paoh vanlawng zuan ai din lai, tuan ah an dih a si ah cun zarhkhat, zarhhnih chung hrawnglawng i dinh a si lai. Asinain ni dang tu ah cun a mah kel tein a zuangko lai tiah vanlawng tickets zuarnak lei ṭuanvo ngeitu hna nih an chim. Sagaing ramṭhen Kalaymyo peng ah ramkhel lei daihnak a umlo caah mi tampi cu motor in khualtlawng mi an tlawm i, vanlawng hmangmi an tam deuh cang tiah tualchung mi nih an chim tiah theih a si.
Nu Pakhat A Tlaihhremtu AA Ralkap 2 Kum 20 Chung Thong Thlak Ding In AA Nih Biakhiahnak A Tuah, Rakhine ramkulh, Butitaung(ဘူးသီးတောင်) peng Kyaungtaung(ကျောင်းတောင်) khua um, kun 30 tluk asimi nutung pakhat cu AA ralkap 2 nih an sualpi caah, kum 20 chung thong thlak leng ah fungtuk sualphawt biakhiahnak tuahpiak an si tiah AA nih October 20 ah cathanh an chuah tiah theih a si.
AA ralkap 2 nih ka umnak inn lila ah hriamnam thazaang i bochan in an ka sualpi tiah, tlaihhrem a tongtu nu nih AA sinah report (phuannak) a tuah caah bia ceihnak tuah in checkhlatnak an tuah hnuah atu bantukin biachahnak an tuah hi a si. Nutung nu a sual pitu AA ralkap 2 zong nih cun zu rit a luan caah kan tlaihhremnak a si tiah chimphuannak an tuah tiah an thanhmi ah cun an langhter.
Cucaah palhnak a tuahtu ralkap 2 hna cu ralkap upadi he aa tlak in 2022, October 20 ah an palhnak he aa tlakmi sualphawtnak cu tlaihhrem a tongtu nu a chungkhar, khuachung hruaitu hna le Biaknak lei hruaitu upa cheukhat hmai ah rianhrang ṭuan le kum 20 chung thongthlak ding biakhiahnak an tuahpiak leng ah, voi 30 fungtuk ding in biakhiahnak tuah piak an si i, fungtuknak cu kan tuahcang tiah an thanhmi ah cun an langhter chihtiah theih a si.
Vanral Vennak Hriamnam Caah Kan Chawva Funtom A Herh, Dohthlennak dirhmun kan zoh tikah NUG le dohthlennak ralkap hna nih ramhcung hmunhma zatuak 52% leng an uk khawh cang. Tanglei kahdohnak kip ah SAC ralkap a thimi an tam i an sung lengmang fawn. A lamkip in SAC dirhmun cu chiatlei a panh cang. Asinain an ṭhawnnak pakhatte a um. Cucu cunglei kahdohnak a si. Cunglei kahdohnak hi tangka tam tuk a dih caah SAC nih an duhning in an tuah kho rih lo, asinain teinak an hmuh khawh nakding ah a lam umchun a si caah cunglei kahdohnak hi fak chinchin in an tuah ko lai.
Cu SAC nih cunglei kahdohnak a tuahmi cu dohthlennak ralkap hna nih khamnak le i runvennak hriamnam an herh. Cunglei kahdohnak caah vanlawng ṭhaṭha an ngeih lo hmanh ah i runvennak le khamnak hriamnam tal cu an ngeih hrimhrim a herh. Cuti a si lo ahcun SAC teinak lam a har ngaingai lai. Kan hnulei ah NUG Cozah chimnak nawlngeitu U Kyaw Zaw le NUG ramkomh vuanci U Htin Lin Aung nih hmun cheukhat ah cunglei kahdohnak i runvennak hriamnam kan bunh cang tiah an chim bal.
Dohthlennak ralkap hna nih SAC vanlawng le Helicopter kah khawhnak hriamnam ngei hna sehlaw dohthlennak boruak hi aa thleng hrimhrim lai. NUG nih kan ngeih an timi hi tlangcung hriamtlaibu cheukhat nih an ngeihmi China ser FN-6 miakpi a si lai tiah thiamsang tampi nih an zumh. Hi nak ṭha an ngeih ding hi cu zumh a um rih lo. FN-6 miakpi nih cun niamte tiang lawng a kah khawh caah SAC ngeihmi Su-30, MiG-29 le Yak-130 vanlawng pawl a kap kho lai lo ti a fiang.
Cucaah NUG nih an ngeih tiah ruahmi FN-6 miakpi an hman tawnnak Karen le Kaya ramkulh ah SAC nih niam tein a zuangmi Helicopter hmang ti loin sangpiin a zuang khomi raldohnak vanlawng in bomb an thlak lengmang nak a si. NUG nih vanlawng kahnak kan ngei cang tiah an thanh a thaizing ah Sagaing ramṭhen Watlet peng ah SAC nih cunglei kahdohnak fak ngai in an tuah i PDF riahbuk pakhat an lak. PDF lei a thimi zong an um tiah theih a si. Sagaing ramṭhen lawngah a si lo. SAC nih cunglei kahdohnak an tuahnak hmun paoh ah dohthlennak ralkap an sung, asiloah hnu an tolh lengmang.
NUG nih kumkhat chungah dohthlennak kan donghter lai an timi cu vanral vennak hriamnam ṭha ngeih loin a si kho lo ti a lang.
Khatlei ah CDM ralbawi hna nih SAC ngeihmi vanlawng kahnak hriamnam lakpiak dingin timhtuahnak an ngei ve. Ramchung hmunkip ah SAC nih vanlawng kahnak hriam an chiah. Cu hriamnam an chiahnak i a ummi ralkap hna cu vanlawng kahnak he CDM an tuah ahcun dohthlennak ralkap hna nih vanral vennak hriamnam an ngei kho hnga. Cun SAC sakhan kha va doh i an hriamnam lakpiak khawh zong a si. Asinain cucu a si khawhnak ding lam a tlawm tuk fawn.
Ka bia vun nolh ṭhan ko ning! SAC cu a zeilei paoh in chiatlei an panh chin lengmang, ṭhawnnak pakhatte an ngei, cucu cunglei kahdohnak a si. Cunglei kahdohnak kan kham i kan i runven khawhnak dingah vanlawng kahnak kan herh. Cu vanral vennak hriamnam cawknak ah kan chawva kan bungh cio a herh. Mizapi thawhmi tangka hmannak lei i ṭuanvo ngeitu hna zong nih zeidang nakin vanral vennak hriamnam hi biapi deuh ah an chiah a herh. Vanral kan i ven khawh ṭung lo ahcun kan khua, kan ram le kan mipi hna an him hlei lo.
Cu bantuk caah, kha bantuk caah ti len rih ding a si lo. Kan chawva dihlak hi vanral vennak hriamnam caah aa fun dih a hau. Mipi nih kan thawhmi a tam ngai cang ko nain a hmannak ah a funtom ti lo i aa ṭhenṭhek dih caah hmual a ngei lo ti khawh a si. Cucaah dohthlennak ah kan chawva kan bungh cio lai i cu chawva cu zeidang caah si loin vandal vennak hriamnam caah hman ve ding a si.
Atu lioah cun zeidang chunmang manh len hlah, na him hnuah na manh te lai. Cun zeidang caah tlangau len hlah, vanral vennak hriamnam caah tlangau cio usih. Mipi thawhmi chawva hi zeidang dang caah hman rih loin kan khua, kan ram le miphun himnak a simi vanral vennak hriamnam caah hmang dih ko usih. Kan tei i kan him hnuah chunmang ṭhaṭha kan manh cio lai i zeidang dang caah tlang kan au te hna lai. Crd-The Chin Post
Leave a Reply