Nihin Kahdohnak Thawngpang!
=============
Moeta hmunhma i ninga chung ikahdohnak ah SAC ralkap 20 renglo an thi, Sagaing ramṭhen, Kata peng Moeta(မိုးတား) hmunram ah ninga chung kahdohnak a chuak i SAC ralkap 20 renglo an thi tiah Kata tualchung hriamtlai pah-kah-phah phu nih cathanh an chuah. September 12 in September 16 tiang Kata khua chaklei Moeta(မိုးတား) hmunram ah tualchung hriamtlai phufonh le SAC ralkap kaphnih kar ah voi nganak tlawmlo kahdohnak a chuak tiah an langhter.
SAC ralkap hna cu Moetalay in Kata lei hoih in rallam an sial lio ah tualchung hriamtlai phu hna nih an hmanhmi bomb hrial in lamchak a tlanglei in an kal, cuti an kal pah ah lam a min i ralkap ruak pakhat a rak thi, cu athimi SAC ralkap ruak cu kan hmuh tiah hmanthlak he an langhter chih tiah theih a si.
Tualchung Mipi Harnak Petu SAC Ralkap Le Pyusawhti Bomb Puah Hnawh An Tong, Minung 6 An Thi, Mandalay ramṭhen Meiktila peng Ywartanse (ရွာတန်းရှည်) le Sepyar (ဆယ်ပြား) khua ah lut in mipi harnak pe tawntu SAC ralkap le Pyosawhti minung 8 cu cycle 4 in an kal lio ah tualchung hriamtlaiphu hna nih an bawh i bomb an puah hnawh hna caah hmakhat te ah 6 an thi 2 hliamfak an tuar tiah Myaing tualchung hriamtlaiphu hna nih cathanh an chuah.
Cu kahdohnak ahcun tualchung hriamtlai phu lei nih meithal zun 1, kuanbawm 1 le kuan 22 kan lak khawh tiah an thanh chih.
“Nihin septber ni 16 chun suimilam 12 hrawngah Meiktila , Ywartanse le Sepyar khua ah lut in tualchung mi a hrem tawn tu SAC ralkap le Pyosawhti 8 hna cu cycle 4 in an ra ti kan theih caah kan bawh hna i bomb kan puah hna hi a si tiah an cathanh ah cun an langhter. Cu kahdohnak cu Myaing tualchung hriamtlai phu tetyin 1, tetkhuai 1 le Bamathih latnatkyi (ဘာမထီလက်နက်ကြီး) phu hna nih an tuahmi si tiah theih a si.
Taze peng OhPhoAi khuapawng kahdohnak ah SAC ralkap 8 an thi, Sagaing ramṭhen, Taze peng OhPhoAi(အုတ်ဖိုအိုင်) khuapawng ah nihin September 16 ah kahdohnak a chuak i, SAC ralkap 8 hrawng an thi tiah Taze PDF chungtel nih an chim. Nihin September 16, zinglei suimilam 5:45 ah Taze chaklei meng nga tluk a hlatnak OhPhoAi(အုတ်ဖိုအိုင်) khua lei ah rallam sialtu SAC ralkap ṭat-mah 33 in ralkap thazaang 60 hrawng cu Taze PDF, Shwebo pengkonh battalion 6 le battalion 7 in ralkap hna nih hriamngan le hriamhme hmangin an kahdoh hna caah SAC ralkap minung 5 nak tlawmlo an thi tiah Taze PDF sin in theih a si.
Kahdohnak a dih hnu zinglei suimilam 6:00 hrawng ah SAC ralkap hna cu Okehpoaing(အုတ်ဖိုအိုင်) khualuhnak ah bomb puahhnawh ṭhan caah minubg 3 hrawng an thi ṭhan, tualchung hriamtlai phu lei hliamhma tuarnak umlo in hnu an tolh kho tiah theih a si. SAC ralkap hna nih cun zinglei suimilam 10:00 hrawng ah OhPhoAi(အုတ်ဖိုအိုင်) khuachung ah an lut i inn an khangh caah khuami hna cu an zaam hna tiah PDF sin in theih a si.
Ayardaw, Ngwaydwin khua ah SAC ralkap kahdoh an tong, minung 5 an thi hleiah an sakhaan an khangh piak hna, Sagaing ramṭhen, Ayardaw peng Ngwaydwin khua ah umhmun khuarmi SAC ralkap hna cu September 15 ah tualchung hriantlaiphu nih an kahdoh hna caah SAC ralkap lei minubg 5 an thi tiah Ayardaw peng pah-kah-phah phu chungtel nih an chim tiah theih a si.
Ngwaydwin khua ah umhmun khuarmi SAC ralkap le pyosawhṭi hna cu Monywa pengkomh tualchung hriamtlai phufonh nih zinglei suimilam 4:30 ah an luhhnawh hna i an kahdoh hna. SAC ralkap 2 le pyosawhṭi 5 an thi, minung 3 nih fakngai in hliamhma an tuar leng ah cuka hmun sakhan cu an lak khawh hnuah mei an khanghta tiah theih a si. Kutcheh bomb lung khat le chai pakhat pakhat an lak tiah theih a si. Cu sakhan cu Monywa pengkomh PDF battalion 6, Ayardaw peng tualchubg hriamtlai phu, Myinchain pengkomh battalion 7, MRTF, Tapayngyo(သပြေညို) pah-kah-phah, Danger Force phu le ABNPDF phufonh nih an kahdoh hna tiah theih a si.
Kyauktaw Ah AA Nih Palik Bawi Pakhat An Tlaih, Rakhine ramkulh, Kyauktaw peng Apaukwa(အပေါက်ဝ) khua palik sakhan ah a umm mi palik bawi (Deputy police chief) pakhat cu nizan September 15 zanlei sml 3:00 hrawngah AA nih an tlaih, tiah theih a si. “Palik bawipa cu Apaukwa palik sakhan in sualnak case hlun pawl kha Kyauktaw palik sakhan ah va chiah dingin cycle in a kal lioah AA nih an tlaih,” tiah min langhter a duh lomi pakhat nih a chim.
Tlaih a tongmi palik bawipa a min hi hngalh a si lo. Palik sakhan chungah tualchung mi sawhsawh cu pakhat hmanh an luhter hna lo tiah theih a si. “Palik sakhan in hngalh pinak ca(ထောက်ခံစာ) an kan hal hmanh ah a chungah luh in va hal a ngah lo, a leng in kan pek hna. An sakhan cu thirhri (tanzaka) lawngte in an kulh dih hna. Palik cu tualchung mi hna he naihniam tein um an duh lo caah AA nih an tlaihmi palik pa a min kan hngalh lonak a si,” tiah a chim chap. A luancia June 11 ah Kyauktaw khua ah thil cawk ding in a kalmi SAC ralkap chungtel 2 zong AA nih an rak tlaih hna pinah June 20 ah Kyauktaw khua palik sakhan ah rianṭuantu palik 3 zong AA nih an rak tlaih cang hna. Crd- The Chin Post
Relchap, (Crd-The Chin Post), NLD party chungtel pakhat le NLD party ṭanhtu pakhat ralhmun ah an nunnak a liam, Naypyidaw, Ottarathiri(ဥတ္တရသီရိ) peng NLD party secretary U Zaw Myo Win le Yangon ramṭhen Twantay(တွံတေး) peng NLD party dirpitu Daw Khin Myo Nway(kum 44) cu SAC ralkap nih an tlaih hna hnu caan rau lo teah ralhmun ah an nunnak a liam tiah chungkhar he neihniam mi hna nih nihin September 16 ah RFA ah an chim tiah theih a si.
Ottarathiri(ဥတ္တရသီရိ) peng, NLD party secretary U Zaw Myo Win cu Pyin Oo Lwin peng ah aa dor lio September 13 ah SAC ralkap nih an tlaih hnu ah a nunnak a liam tiah a mah he neihniam in ummi party chungtel pakhat nih a chim. ” SAC ralkap hna nih an chimning ahcun cycle he a zaam caah kan kah tiah an chim. September 13 ah a si i, 14 ah chungkhar sin ah thawng an thanh hna, an ruak zong an hmu hna lo” tiah a chim.
Cun Yangon ramṭhen, Twantay(တွံတေး) peng Ziphyogone(ဇီးဖြူကုန်) khuami NLD party dirpitu pakhat si mi Daw Khin Myo Nway (kum 44) cu a luancia August 27 ah tlaihkhih a ton ni hnih a rauh hnu ralhmun ah a nunnak a liam tiah Twantay(တွံတေး) khuami pakhat nih RFA ah a chim. ” A nih cu NLD party chungtel a si lo, chekhlatnnak an tuah lio ah an kut a luan i sizung an phanhpi hnu ah a nunnak a liam” tiah a chim.
Ayeyarwaddy ramṭhen Pathein pengah Zuu din sualnak in minung 7 an thi, Ayeyarwaddy ramṭhen Pathein peng sapahta( စပါးထား) khua ah mino 7 cu hmunkhat ah zuu an din nakin an thi tiah tualchungmi hna sin in kan theih. Tualchungmi hna chimnak ahcun, hmunkhat ah zuu an ding hna i an dinnak hrai hi rungrulthahnak sii an rak chiahnak sii an chiahnak a si i thiang tein an ṭawl lo caah an thih hi a si tiah an chim. A thimi hna ruak cu mibawm chantu phu hna nih Pathein Sii-inn ah an kal pi hna tiah theih a si. A thimi mino hna hi ramkhel kongkau he pehtlaiin atubantukin an ton siloin anmah ordiriamh nak in an thih hi a si tiah theih a si.
Hpakan khuachung suidawr pakhat sing 500MMK leng chuh an tong, Kachin ramkulh, Mohnyin(မိုးညှင်) pengkomh Hpakan Lungkhin lampi ah ummi Wai Phyu Aung suidawr cu nizaan September 15, zaanlei ah mifir nih an luhhnawh hna tiah Hpakan khuami nih an chim. zaan zaanlei suimilam 4:00 hrawng ah ruahpi a fak ngai, culio ah cun private motor pakhat he hriam aa tlaihmi minung 5 nih Wai Phyu Aung sui dawr cu an luhhnawh i sing 500mmk leng an i kalpi” tiah Hpakan khuachung um sui dawr ngeitu pakhat nih a chim.
Wai Phyu Aung suidawr luhhnawh in an phaisa firpiak an tonnak kongah Hpakan peng palik phu nih hlathlainak an tuah tiah theih a si. A luancia September 14 Hpakan khuachung Lungkhin sang ah lungvar/lunghring kawlmi hna thuam aa hrukmi pakhat nih, meithal i put in motor chuhnak a rak cang bal tiah theih a si.
Russia Ralkap Nih An Kir Takmi Hmun Ah Minung 400 Renglo Phumnak An Hmuh! Russia ralkap nih an zam takmi Ukraine ram chaklei Izyum khua ah minung 400 renglo phumnak khur hmuh a si, tiah palik bawi Volodymyr Tymoshko nih a chim. Russia nih an lak i thlanga chung an rak umnak khuapi ah september 16 ah tu bantuk in minung a phu in phumnak kan hmuh hi a si, hmun dang zongah mithi phumnak an um len tiah, a chim chap.
A thimi hna hi zeiruang ah dah an thih ti cu fiang in theih khawh a si rih lo nain Bomb khuavai ruang le ngandamnak lei tha te zohkhenhnak a um lo ruangah a si lai tiah, zumh a si. Russia ralkap hna an umnak hmun paoh ah thih lohnak a tam tiah, President Zelenskyy nih cun a chim. Ukraine nitlak lei hmun zong ah Russia ralkap nih sualnak ngei lo mipi hna cu an thah hna tiah, Ukraine nih an chim nain Russia nih cun a dik lomi tiah ai pheh ve.
US Nih 600 Million Man Hriamnam Ukraine A Bawmh Lai! Russia ralkap pawl rianrang tein tuk khawhnak dingah Ukraine ram cu 600 million man tluk hriamnam bawmhnak ka pek lai tiah, White House nih september 15 a thanh. Ukraine ralkap nih rianrang tein Russia ralkap an tuk khawh thannak dingah a hawikom ram hna le US nih hriamnam bawmhnak kan peknak a si tiah, Anthony Blinken nih a chim.
US nih Ukraine a bawmh dingmi hriamnam hna hi Russia ralkap hriamnam le eidin an i kuat tawnnak le an chiahnak sakhaan tiang a kap khotu, Heimat missile le hriamngan tampi a tel, cun miles 40 tiang a kap kho tu missile 67 million man zong bawmhnak kan pek lai tiah, a luancia zarh ah The Pentagon nih a rak thanh ve. February 24 ah Russia nih Ukraine ram a tuk hnu in US nih Ukraine ram cu dollars 1.1 billion man hriamnam bawmhnak a pek cang.
Leave a Reply