Kan Theih Khawh Mi Chungin Thawngpang Chia Fonh!!
=====================
Thailand, Kanchannaburi pengkomh ah phungninglo in a lut mi Myanmar mi minung 45 cu Thailand ram nawl ngeitu hna nih October 25 ah an tlaih hna tiah Bangkok Post nih a langhter. Kanchannaburi pengkomh Maung hmunhma ah phungning lo ramri lonh in a lutmi Myanmar mi hna cu phu hnih in hmun hnih ah kan tlaihhna tiah Thailand palik phu nih an chim tiah theih a si.
Tlaihkhih a tongmi hna hi Dawei khuami, Nay Pyi Daw, Bago, Yangon, Magway le Mawlamyine ummi an si tiah Thailand nawl ngeitu hna nih cun an chim. Tlaihkhih a tongmi hna hi Htikhi in Thailand ram Kanchanaburi pengkomh chung ah ramlak in ramri lei an tan i, hmun dang panh thannak ding caah an mah a autu ding puai-sa an hngah lio ah tlaihkhih anton hi a si.
Riantuanding in ramleng chuah ai timmi Myanmar mi hna nih cun rian an tuankhawnak ding ca le an khuallam caah tiin puai-sa sin ah Baht 18000 in 25000 an pek tiah an thanhca ah cun an langhter chih. A luancia October 22 ni zong ah Kanchannaburi pengkomh le Rachburi pengkomh chung ah phungninglo in a lutmi Myanmar mi 96 tiang tlaihkhih an si dang tiah Thailand nawl ngeitu hna nih cathanh an rak chuah.
Sagiang ramthen, Butalin peng Magyioak(မကျီးအုပ်) khuachung ah SAC ralkap nih hriamngan an kah caah nu pakhat telh in tualchung mi 2 an nunnak a liam, minung 3 nih hliam hma an tuar tiah theih a si. October 25, zinglei suimilam 5:00 hrawng ah Butalin in a chuakmi SAC ralkap hna nih Magyioak khuachung cu hriamngan an kah bu in an lut. “Magyioak(မကျီးအုပ်) khuachung ah SAC ralkap hna cu hriamngan thlahpah in an lut, Butalin in rallam sial ah a chuakmi an si, hriamngan an thlah caah khuachung um tualchung mi nunnak liamna le hliamhma tuarnak tiang a chuak” tiah tualchung mi nih an chim.
Yangon ramṭhen, North Dagon peng cozah hmunram chungah a ummi Ngein Chan Win le a nupi karah i sikvelhnak a chuak an ti i, inn zaa uktu le inn hra uktu hna nih, Ngein Chan Win cu a luancia October 7 lioah an rak tlaih i wire hri in an ṭem hnuah an tuk an velh i an thah beh, tiah theih a si. An nuva in i sikvelhnak a chuah caah inn zaa uktu le inn hra uktu hna nih Ngein Chan Win cu an tlaih i, an hrem caah a nunnak a liam. A thattu hna cu SAC ralkap nih dantatnak zeihmanh an tuah hna lo, tiah sang chung ummi pakhat nih a chim.
“Sangmi nih an i sikvelh thawng cu hna a chet tuk an ti i, inn zauk tu sinah an phuan hna caah Ngein Chan Win lawng si lo a pa Htey Wa zong an tlaih. A thaizing October 8 zingka ah a chungkhar cu a ruak rak lak ding in an auh hna,” tiah a chim chap. Hi kong ah Ngein Chan Win a pa nih inn zauk tu hna cu taza a cuai hna nain atu tiang zeihmanh bialehnak a um rih lo, tiah tualchung mi pakhat nih a chim.
Tanintharyi ramṭhen, Baukpin peng ah zan sml 10:30 hrawngah lung phur motor khaltupa Maung Soe cu, a ruang um loin SAC ralkap nih an kah i a thi, tiah tualchung mi hna nih an chim. A luancia October 22 zan sml 10:30 hrawngah Baukpin peng Pyigyi Manaing(ပြည်ကြီးမဏ္ဍိုင်) sang ummi Maung Soe(kum 27) cu lung a phurh lioah SAC ralkap nih a ruang um loin motor hmai lei in an kah caah a hmun ah a thi colh, tiah theih a si.
“Motor a dir duh lo ruang zong ah a si lo. Motor hmailei in zan sml 10:30 ah an kah hi a si. Timh ciammam tein an kahmi a si caah Maung Soe cu a ṭaang ah meithal kuan nih a khen i a nunnak a liam, tiah tualchung mi pakhat nih a chim.
Yangon ramthen, Shwepyita peng Pyidawta sang khuabawi hna nupa cu meithal kah an ton caah a nupi a thi tiah tualchung hriamtlai pah-kah-phah nih an chim. October 24, chunhnu suimilam 3:45 ah Pyidawta sang khuabawi zung ah khuabawi Myo Min Tan le a nupi Mala Maw le zung riantuantu pakhat tiin minung pathum an um lio ah chaklei pengkomh tualchung hriamtlai phu le Yangon Urban Guerrilla Army(YUGA MO 7 Egale) phufonh nih an kah hna i Daw Mala Maw cu hmakhat te ah a thi tiah theih a si.
Cu khuabawi zung nih cun zung ah theihpinak ca a la mi hna le khualtlung cazin min petu hna cu bo ngai in an chawnhbiak hna leng ah phaisa kholhnak zong an tuah tiah tualchung mi pakhat nih a chim.
Karenni ramkulh Demoso peng kahdohnak a rakchuahnak hmun pakhat simi khuate pakhat cu tualchungmi pawl himte in khua an kir khawh nak hnga thianhhlimh nak an tuah lio ah PDF pakhat cu bomb lamh sualnak in a nunnak liam tiah DMO Local PDF sin in theih a si. October ni 20 zaanlei suimilam 5 hrawngah tualchungmi hna cu khualei kir dingin an i timh caah himtein an kir khawh nak hnga ti in hmunhma thianhhlimhnak an tuah i cu lio ah cun SAC leinih an hmanh ta mi bomb ai lamh hi a si tiah theih a si.
A hlan ah thianhhlimhnak cu kan rak tuah bal cang ko nain bomb kawlnak seh kan ngeih lo caah kan mit in kan kawl i ka hmuhthlu lo mi a rak um ruang ah a tu ban tuk in ruahlo pi in kan ton hi a si tiah DMO Local PDF in ṭuanvongeitu pakhat nih a chim. Cu puahlehnak ruangah cun DMI PDF Battalion-G in tat-suh-hmu U Josep kum 41 cu a hmunah a ke pahnih ning in a bul i a nunnak liam i October ni 21 zing ah an vui tiah theih a si. Demoso PDF chungah a tubantuk in bomb thianhhlimhnak ruangah minung 13 nih hliamhma an tuar i a nunnak liam mi he cun 20 hrawng an si cang tiah theih a si.
Sagaing ramṭhen, Kanbulu peng chaklei Zawchaung khua cu SAC ralkap nih October 24, zinglei ah a voi 5 nak an khangh ţhan tiah Kyunhla khua cawl canghnak a tuahtu phu nih cathanh an chuah tiah theih a si. Kotaungbo(ကိုးတောင်ဘို) hrambunh khah-mah-yiah 363 in SAC ralkap nih cu ka khua cu mei khangh in an hrawh caah, tualchung mipi umnak inn 8 le Shwe Bune Daw Toe(ရွှေဘုန်းတော်တိုး) mi bawmchantu phu inn le motor pakhat an hrawh tiah theih a si. Zawchaung khua cu SAC ralkap nih voi 5 tiang mei khangh in an hrawh caah mipi umnak inn 147 tiang a kaang cang tiah theih a si.
Indonesia ram ah mithlah/dongtu tilawng(ferry) pakhat a kangh caah minung 13 an nunnak a liam, tiah theih a si.Nizan October 24 Indonesia ram nichuah lei ah minung 250 leng aa citmi tilawng pakhat a kaang, tiah Ministry of Transport nih cathanh an chuah. Tilawng chung rianṭuantu he minung 254 an i cit i, cu chungah 13 an nunnak a liam i 241 cu kan khamh khawh hna, tiah meithat le bawmchantu zung in ṭuanvo ngeitu nih a chim.
Tilawng a kangh lioah khualtlawng mi hna cu an lau tuk buin ti chungah an zuan caah an nunnak a liam hi a si, tiah mithmutu hna nih an chim. Tilawng a cung dot in mei kangh hram aa thawk i, zeitindah a kangh ning a si ti belte cu hngalh a si rih lo. Meithat phu tilawng 3 pinah nga tlaitu tilawng hna i bawm in an bawmhchanh hna, tiah theih a si.
Indonesia ram cu tikulh 17,000 a umnak ram a si i, rammi hna nih pawcawmnak ah ti lam hi an hman bikmi a si. Asinain humhimnak ca ah ṭihnung ngaingai a si. A luancia kum 2018 lio zong ah vawleicung tikulh vialte lakah a thuk bik ah aa telmi rili ah tilawng pakhat a rak pil i, minung 150 leng an nunnak a rak liam cang.
Philipine ram ah khualtlawng mi 170 leng a phurtu vanlawng pakhat cu a tliknak lam a nal caah aa let, khualtlawng mi tu cu an him, tiah theih a si. October 23 ah S. Korea ram khualipi Soel in Cebu ah a zuang mi A330 vanlawng cu, a ṭum lei ah a tliknak lam a nal i hramh cung in a tli, tiah theih a si.
A330 vanlawng cu ṭum ding in voihnih tiang aa zuam ko nain nikhua a chiat tuk caah a voithumnak lawng ah a ṭum kho i, a tliknak lam a nal caah hramh cung in a tlik hi a si. Khualtlawng mi 173 cu thinphang thlalau in an um ko hna nain hliamhma pumi pakhat hmanh an um lo. Vanlawng tual pawng ummi hotel ah kan chiah hna i khuallam a peh hnikmi hna cu vanlawng dang ah kan tawlrel piak hna, tiah nawlngeitu hna nih an langhter. Crd-The Chin Post
Relchap, SAC Jet Fighter Nih Kachin Rammi Bomb A Thlakmi Hna Cungah Facebook Profile A Nakmi A Thlengtu Ralkap Siibawipa Ralkap Nih An Tlaih, Kachin ramkulh, Hpakan peng A Nang Pa khua ah SAC ralkap Jet Fighter nih bomb an thlak caah minung 80 hrawng an nunnak a liam i, 100 leng hliamhma an putmi cungah Naypyitaw ihkhun 300 sii-inn ah rian a ṭuan liomi SAC ralkap siibawi Major Dr. Kyaw Phone Myint cu a facebook profile ah a nakmi aa tar ruangah SAC ralkap nih nihin October 25 zinglei ah an tlaih, tiah theih a si.
October 23 zan ah KIO kum 62 tlin ni an don zan ah hlasak thiam hna nih ring awn le aw-zai in mizapi an lawmupi hna lioah SAC Jet Fighter nih bomb an thlak hna caah minung 80 hrawng an nunnak a liammi cungah SAC ralkap siibawi Major Dr. Kyaw Phung Myint nih a nakmi profile aa tarnak hi a si. Amah hrimhrim zong nih minung tam tuk an thih caah a nakmi profile kaa tarnak a si, tiah comment ah a ṭial.
“Naypyitaw sii-inn ihkhun 300 ah rian a ṭuan liomi Major Kyaw Phung Myint cu a facebook profile ah a nakmi aa tar caah ralkap nih an tlaihnak a si. Dalan a si lai ti an zumh caah SAC kuttang rianṭuantu lobby hna nih cun thah ding tiang in khua an khang,” tiah Khit Thit Media nih cun an langhter.
Mandalay Ah Nikhat Chung Ah Phone Dawr 2 Luhhnawh In Thil Firpiak An Tong, Mandalay ah nikhat chung ah phone zuarnak dawr 2 luhhnawh le thil firpiak an tong tiah Mandalay khuachung ummi nih an chim tiah theih a si. Mandalay, Chainmyatarsi peng phungki sianginn pawng phone (second) kan zuarnak dawr cu October 25 ah luhhnawh in phone chuh kan tong tiah dawr ngeitu nih a mah social media ah a tar.
Dawr ngeitu he naihniam in ummi pakhat nih cun, minung 9 hrawng nih phone dawr cu an luhhnawh, phone a zuartu dawr cu thawng thanhnak i tuahcio a si, an lakmi hi sing 700mmk man hrawng a si lai” tiah a chim. Cun October 25, zinglei ah Mandalay, Maharaungmay peng Maharmyine no.1 sang lam 68 nak 38/39 kar ah ummi phone dawr cu meithal lem he luhhnawh an tong, asinain cu misual hna cu tlaih an tong tiah palik he naihniam in ummi hna sin in theih a si.
“Phone dawr ah misual nih luhhnawh an tong tiah thawng theih a si caah zuanhnawh cio a si, phone dawr a luhhnawh tu pa cu a meithal lem he tlaih a tong” tiah palik he naihniam in ummi pakhat nih a chim.
Cyclone Thlichia Hran Ruang Ah Rakhine Ramkulh Poahtaw Peng Hngatchaung IDP Camp In Sing 4000 Leng An Sung, Rakhine ramkulh, Poahtaw peng Hngatchaung(ငှက်ချောင်း) IDP Rohingya camp ah October 24 ah Cyclone thlichia “SITRAN” a hran caah sing 4000 leng sunghnak an tong tiah theih a si. Cyclone thlichia a hran ruang ah Hngatchaung(ငှက်ချောင်း) IDP Rohingya camp inn an rawk i, ti a lianh caah camp chung um inn hna le leikuang tamtuk an rawk i sing thong man leng sunghnak kan tong tiah tualchung minih an chim.
“Zaan suimilam 9:00 hrawng ah ti lianh ai thawk hi a si, IDP camp ah aa dormi hna riahcaw le an thilri tampi an sung, Lei kuang facang hna zong an rawk dih, thlichia a hran ruang ah inn zong an rawk” tiah tualchung mi pakhat nih a chim. Hngatchaung(ငှက်ချောင်း) IDP camp in Rohingya hna cu 2012 buainak lio ah nawlngeitu hna nih cuka hmun ah cun an rak umter hna i, chungkhar 1000 hrawng in milu 5000 leng cu hartong dirhmun in an um. Inn 1000 leng le milu 5000 leng an umnak Hngatchaung(ငှက်ချောင်း) IDP camp ah cun thlichia a hran ruang ah inn 300 leng a rawk tiah theih a si.
Hpakan I A Nang Pa Cu KIA Sakhan A Si Lo Tiah Bochoh Gun Maw Nih Min Aung Hlaing Sin Ah Ca A Kuat, KIA commander in chief, Bo-choh Gun Maw nih A Nang Pa cu KIA sakhan a si lo tiah October 25, ah a mah social media ah a langhter tiah theih a si. Bo-choh Gun Maw nih a mah social media ah Min Aung Hlaing sin ah a kuatmi ca le A Nang Pa hmanthlak cu hmunkhat ah a langhter.
Min Aung Hlaing sin ah a kuatmi ca chung ah cun “A Nang Pa cu KIA sakhan zong a silo, khualtlawng mipi hna nih chikhat an i dinhnak hmun le dawr khan dal fa tete a umnak a si” tiah a tial. Cun mizapi nih an ngaihchiatnak mitthli hna cu man khiah khawh lomi pekchanhnak ah a cang lai tiah a catialmi ah cun a telh chih. Min Aung Hlaing a ralkap hna nih October 23 ah Hpakan ah KIO kum 62 tlinnak an tuahlio ah vanlawng 3 hmang in bomb thlaknak an tuah caah tualchung mi minung 70 leng an nunnak a liam pinah minung tampi nih hlaimhma an tuar tiah theih a si.
Myit Thar Tiva Ti A Lianh Caah Pawngkam Cinthlakmi An Rawk Dih, Kalaymyo peng thlanglei Myit Thar Tiva (မြစ်သာမြစ်) ti a lianh caah pawngkam cinthlaknak dum le cinthlakmi vialte cu ti nih a phum hna i an rawk dih, tiah theih a si. Tukum fur a dongh lai ah voithum tiang ti a lianh cang i, cinthlakmi vialte an rawh dih caah kan sung dih, tiah cinthlaknak dum ngeitu pakhat nih a chim. Tukum cu ral he kokek thil cangmi ti lianh ral he aa thuat caah a har ngaingai. Chiat kan ton kum a si ko, tiah a chim chap.
Hpakan Ah KIA Nih SAC Ralkap An Bawh Hna I An Kah Hna, SAC ralkap tat-mah 33 cu October 25, zinglei suimilam 11:00 hrawng ah Hpakan peng, Tamakhan khua pawng ah KIA brigade 9 kuttang um battalion 6 nih an kahdoh hna tiah Hpakan khuami pakhat nih a chim. Cu kahdohnak cu SAC ralkap nih October 23, zaan KIA brigade 9, A Nang Pa hmunhma ah vanlawng hmang in bomb thlaknak an tuah i minung 100 renglo nunnak a liam hnu in KIA nih a voi khatnak kahdohnak an tuah mi a si.
Khuami pakhat nih cun “tutan kahdohnak hi Hwaykha(ဝှေခါ) lei ah a si, SAC ralkap lei nih hriamngan in kahdohnak an tuah ve, A Nang Pa thlanglei ah kawl ralkap tam taktak an um, Hpakan gate hmunkip ah checkhlatnak an tuah” tiah a chim. Tualchung mi pakhat nih cun “A Nang Pa lei ah cun phone line zong a umlo, bomb thlakhnawh ton lio ah hliamhma a tuarmi hna zong si thlop ding in chuahpi khawh an si lo, an umnnak hmun ah si va thlop ding in luhnak nawl an kan pe lo, cucaah SAC ralkap cung ah hin vawlei dong tiang kan lung a tling kho lai lo” tiah a chim tiah theiu a si.Crd-The Chin Post
Leave a Reply