Sagaing ramṭhen, Myinmu peng Le Ayardaw Peng Kahdohnak Ah SAC Ralkap 17 An Thi+Riahcaw Laak Ah A Kalmi SAC Ralkap 7 Cu Bomb Puah Nakin An Thi Dih+Tamu-Kalay Lam Cung Bomb Puahnak Ah SAC Ralkap 20 Hrawng An Thi
======================================
Sagaing ramṭhen, Myinmu peng le Ayardaw peng aa tonnak hmun ah, kee in rallam sialtu SAC ralkap 60 leng cu Taw Kyi Kan( တောကျီးကန်း) min bunh in tualchung ralkap 7 nih an kah hna i, SAC ralkap 17 an thi, tiah Zero pah-kah-phah Myinchain nih cathanh an chuah. Tualchung hriamtlai phu Zero pah-kah-phah Myinchain chungtel, Taw Kyi Kan(တောကျီးကန်း) ralkap 7 nih SAC ralkap hna cu pe 150 tluk a hlatnak hmun in an kah hna i, Leikuang lak ah SAC ralkap 17 an thi, tiah Zero pah-kah-phah nih cun an thanh.
Tualchung ralkap pawl nih an kah mi SAC ralkap hna cu nizaan August 4, zinglei suimilam 10:30 hrawng ah Myinmu peng le Ayardaw peng ramri Yuata(ရွာသာ) khua le Minyua(မင်းရွာ) khua kar i a um mi khuami hna thilri a firtu an si, tiah theih a si. Tualchung hriamtlai phu lei cu SAC ralkap nih hriamngan le hriamhme in an kahdoh hna leng ah, helicopter nih van lei in a kah hna nain hliamhma tuar um loin hnu an tolh kho, tiah tualchung hriamtlai lei nih an langhter.
Riahcaw Laak Ah A Kalmi SAC Ralkap 7 Cu Bomb Puah Nakin An Thi Dih: Sagaing ramṭhen, Pale peng ah riahcaw laak ah a kalmi SAC ralkap 7 cu nizan August 3 zinglei ah PDF nih bomb an puahhnawh hna caah an dihlak in an thi dih, tiah theih a si. Nizan zing sml 6:45 hrawng ahkhan ralkap 7 cu Pale peng Tapikung khua pawng Natsinkung Zayet tlang lei kap ah bomb lung 6 in kan puahhnawh hna, tiah Royal Eagle People Defense Force-Pale in ṭuanvo ngeitu nih a chim.
“August 3 ah Pale in SAC ralkap 80 hrawng nih rallam an rak sial. Mintaingpin phungki sianginn ah zan khat an riak. Rallam a sialmi bochan in Innmahti(အင်မထီး) khua ah riahcaw la ding in a rami SAC ralkap 7 cu bomb lung 6 in kan puahhnawh hna,” tiah a chimchap. A thimi ralkap 7 cu Mintaingpin phungki sianginn ah a riakmi hna he phu khat an si, tiah theih a si.
Kahdoh an ton hnu in a taangmi ralkap pawl nih Mintaingpin khua he aa naihnak ah a ummi Tharyarkung khua cu an khangh caah inn 30 leng a ciam cang. Cu pinah ngandam lo in, ral a zaam kho lomi Mintaingpin khuami Htet Htet, kum 30 cu a inn ah an kah thah, tiah theih a si.
Tamu-Kalay Lam Cung Bomb Puahnak Ah SAC Ralkap 20 Hrawng An Thi, Tamu in Kalay lei a kalmi SAC ralkap 60 hrawng le motor run 24 cu bomb fimhlawm dingah hmai ah an rat caah Kalay peng, mengtung 55 pawng ah August 4 zing sml 11:00 hrawng ah bomb kan puahhnawh i, ralkap 20 hrawng an thi, tiah PDF-Kalay nih cathanh an chuah. Bomb kan puahhnawh hna hnuah SAC ralkap nih an pawngkam um khuami cheukhat cu an tlaih hna. Zanlei sml 6:30 hrawng ah SAC ralkap nih Yarsagyo khuachung cu hriamngan an kah tuk caah CDF-Tonzang, PDF-ZaJu le PDF (Kalay) he kahdohnak a chuak, tiah theih a si.
Mizoram Ah Myanmar Mi Pakhat Cu Kyats Sing 5000 Leng Man Bing He An Tlaih! India ram, Mizoram ramkulh khualipi Aizawl khuapi ah Chin miphun, Tedim peng Darkhai khuami Khup Za Tung, kum 42 sin in 428.04 gram a ritmi bing cu August 4 ah Mizoram palik le Assam Rifle nih an tlaih, tiah theih a si.
An tlaihmi bing cu Rupees sing 214 man a si i, Myanmar phaisa in sing 5770 leng a si. Myanmar ralzam hna a cohlangtu Mizoram ah Myanmar ram in rithaisii phorh lo ding in Chin hriamtlai phu, media le zatlang bu hna nih phihkhamnak an tuah ko nain atu le tu Myanmar mi hna sinin rithaisii an tlaih lengmang.
Atu bantuk ram boruak chiat lio caan cu caan ṭha ah i lak riangmang in phung lut lo sii zuar hi Mizoram um, Myanmar mi hna ca ah himlonak le thil ṭha lo a chuahter khawh tiah chimceih ngai a si. Mizoram i rithaisii tlaihnak kong ah hin a cawtu taktak le a ngeitu taktak nakin an kuttang ah a phortu hna cu an tlaih deuh hna, tiah theih a si.
Russia Embassy Cu Naypyitaw Ah Ṭhial Ding In Min Aung Hlaing Nih A Chim: Russia ramleng Minister he tonnak an ngeih lio ah Min Aung Hlaing nih Yangon ummi Russia Embassy cu Naypyitaw ah ṭhial ding in a chim, tiah Russia thawngthanhnak zung TASS nih a ṭial.
Yangon in meng 200 leng a hlatnak Naypyitaw ah Than Shwe chan lio 2005 ahkhan cozah zung cu rak ṭhial a si. SAC ralbawi hna nih an mah lung tling tein an sermi Naypyitaw ah ramkip Embassy cu ṭhial ding in aa thlengmi cozah kip nih, an rak i zuam ko nain Tuluk Embassy lawng an ṭhial khawh.
Russia cu Myanmar ram hawikom ṭha a si bantuk in nawlngeihnak lak hnu in Min Aung Hlaing cu, Russia ah voi hnih a tlawng cang i, Russia le SAC kar ah kaphnih tonbiaruahnak a um pah lengmang. SAC nih Russia ram ah Council zung pahnih hun ding in timhtuahnak a ngei, tiah Naypyitaw ah a voikhatnak bik a phanmi Russia ramleng Minister nih a chim.
Mindat Ah CDF Hriamnam Chiah Ding In Kan Chimhpiak U, Tiah SAC Ralkap Nih Tualchung Mi An Fial Hna: Chin ramkulh, Mindat khua ah CDF pawl cu hriamnam chiah ding in chimhpiaktu ah SAC ralkap nih tualchung mi cu an lemsawi hna, tiah tualchung mi sinin theih a si.
August 2 zing sml 10:00 hrawng ah SAC ralkap nih Mindat khua pumpululh certual pawng RC Biakinn hmun chung inn pakhat ah, Bowathit le Ashipin(ဘဝသစ်နှင့်အရှေ့ပြင်) sang mi hna cu an lem hna, tiah theih a si. “SAC ralkap nih khuami biachimhnak an ngeih hna lio ah CDF hriamnam chiah ding in nanmah nih nan kan chimhpiak hna lai, tiah ralkap nih an ti hna. Cu biachimnak a ngaimi le a rami hna cu ralkap nih khiangthawng pakhat cio an pek hna,” tiah tualchung mi pakhat nih a chim.
Cu pinah khual nan ngeih ahcun nanmah tlaih nan tong lai, tiah an tlerh rih hna. A luancia July 31 lio ah Mindat sii-inn pi ah kum nga tang covid raikhamsii an rak chunh hna. Cu an chunh hna lai ah cun Chin ca le Kawl ca in ṭialmi kutken ca an phawt hna, tiah theih a si. Cu kutken ca an chuahmi cu SAC ralkap, khuanu khuapa le biaknak pastor cheukhat nih an phawt hna.
Ca an ṭialmi chung ah cun NUG le CRPH cu ralhrang an si. Nan hriamnam vialte chiahtak in kan sin nan rak luh ahcun lunglawm tein kan in don hna lai, tiah aa ṭialnak kong cu tualchung mi pakhat nih a chim.
Leave a Reply