Nizaan suimilam zinglei 8:00 hrawngah Magwe ramthen, Poh pengkulh, Tatgone khuate khuate leiin nitlak lei ah a um mi Tatsin tlang pawngah mipi kan ralkap PDF hna nih bomb an chiah mi i lamh sual ruangah Poh pengkulh, Kaanlay khuate ah a um mi Ma Khin Htu Zar Htwe le Ma Zar Zar Htwe pa hnih hna cu mipi kan ralkap hna nih Bomb an chiah mi nan i lam sual ruangah hlaim faktuk in an tuar i an nunnak lam a har tuk caah siizung ah an kal pi hna tiah theih a si. A tu an sining an dirhmun hi an nunnak caah ruahchanhnak an tlawm ngai tiah theih a si.
Chin ramkulh, Matupi ah SAC ralkap kuttang sianginn ah kai lo ding le ap lo ding in Matupi Education Board nih, mizapi ralrin peknak cathanh an chuah. An cathanh chungah kannih CDM Saya/ma cu, kan zeizong vialte kaltak in SAC ralkap kan doh. Ei awk le din awk hmanh ngei huaha loin kan doh.
Tuabia cahmai ah a dik lomi a ṭanhtu an si, tiah ṭial ding kan duh lo caah SAC ralkap kan doh. Sihmanhsehlaw CDF-Matupi le CDM saya/ma hna zawnruat loin, Matupi peng ah SAC ralkap nih an hunmi sianginn ah kai aa timmi nan um thawng kan theih cu kan ngaih a chia, kan khuaruah a har. NUG nih siangngakchia ca ah caan karlak cacawnnak tuah a timh mi a um ko. Cucaah SAC ralkap kuttang sianginn ah nan kai lo ding le nan kai ahcun mizapi lei nan ṭan a si lo caah miphun leirawitu nan si lai, tiah Matupi Education board nih ralrin peknak cathanh an chuah.
Shan Nationalities League For Democracy(SNLD) cu uknak lak hnu in SAC ralkap lei ṭan lo ding le a dikmi le a dik lomi thil pahnih cungah, a dikmi lei in dir ding ah biachahnak kan tuah cang, tiah SNLD Chairman Sai Nyunt Lwin nih mizapi sin ah theihternak a tuah. May 26 Taungkyi khua SNLD tonbiaruahnak ah Myanmar ram kong he pehtlai in a chimmi a si.
“Uknak lak hnu in buaibainak ah i tel lo ding ralring tein kan um i, a dikmi lei in kan dir. Tulio rampi buaibainak ah anak le a raang hi zeidah a si, tiah ṭha tein kan zohfial hnu ah a dikmi lei ṭan ding ah biachahnak kan tuah,” tiah a chim. Buaibainak hi an sersiam khawh lo ahcun Myanmar ram cu zorchuk lei a panh lai i, Ne Win thok in mi pakhat uknak in rampi a rawk dih lai, tiah SNLD Chairman nih a chim.
“Tulio rampi buainak sersiam khawh lo ahcun zorchuk lei a panh ciahmah ko lai. Mi pakhat uknak lawng in zeitik hmanh ah ram a ṭha ballo. Fiang tein chim ko ahcun 1962 thawk in nihin tiang mi pakhat uknak in kan kal, rampi a ṭhangcho maw ti ahcun a ṭhangcho hrimhrim lo. Cucaah hruaitu pakhat lawng nih ukmi ram a ṭhancho lo ning a fiang tuk,” tiah a chim. “Anmah le anmah an thinlung an i remh khawh hlan ahcun rampi thlen timh cu a si kho lo tukmi a si. Cu ve bantukin SAC ralkap doh cuahmah lio le tuk cuahmah lio ah hramhram uknak lungthin kan ngeih ahcun uknak chuttu bantuk kan si ko hnga! tiah ralrin peknak zong a chim.
“Hriamnam in ram hi ser a si, hriamnam ngeih lo ahcun hmai a hngal lo. Hriamnam hman a hauh ahcun kan hman ve a hau. Tulio ram buainak ruangah hriamnam lawngte tlaih a si tikah fiamcawnnak le ngandamnak kongkau ah harnak a tamnak kong cu, SNLD Chairman Sai Nyunt Lwin nih a chim.
Leave a Reply