Sagaing ramṭhen Pale peng chungah tualchung mizapi hriamtlai hna nih Drone hmangin ralhrang an doh hna i ralhrang 9 an thi, hliamtuar zong an tam tiah theih a si. Dec 30 ah Pale peng ah Pale-Kandongh lei ah a ṭum mi ralhrang mawṭaw rual (ralhrang 150 hrawng an um) hna cu Aungsan Battalion le Pungtaung Tiger Battalion hna nih Kandongh khua in nitlak lei titdaw zung pawng an phak lio, 10:37am ah voikhat,
Nagamah tlangin a rak chuakmi ralhrang mawṭaw rual cu Wunbecheih khua pawng, 1:16pm ah voikhat le cu ralhrang mawṭaw rual ṭhiamṭhiam cu Kandongh khua pawng an phak lio 3:24pm ah voikhat, a zatein voithum Drone ah bomb an thlaih i cunglei in an thlak hnawh hna. Cu ralhrang mawṭaw rual cu Pungtaung Tiger battalion nih bomb dang in an cheh chap hna caah ralhrang 5 an thi fawn. Cu bantukin ṭhiamṭhiam in Karenni GZ nih Dec 25, Christmas ni ah khan palek riahbuk pakhat cu Drone ah bomb thlaih in an doh caah cang tiah theih a si. Ref: Khet Thit Media
Russia President Vladimir Putin nih US President a chawnh duh kong US White House Security Council nih Present Biden an thanh hnu ah Biden le Putin hi phone in an i chawnh lai kong Al-Jazeera nih a tial. Tutan Putin le Biden biaruah ding mi hi Russia le Ukraine buainak kong a si lai, tiah an chim. Kan hmai thla January ah US President Joe Biden le Russia President Vladimir Putin hi Geneva ah hmaihtonh in aa tong ding an si.
North Atlantic Treaty Organization (NATO) le European Union (EU) ram hna nih Russia le Ukraine buainak kong ah Russia hi voi tampi an rak tlangtlak cang. Ukraine ramri ah Russia nih ralkap le hriamnam zeimawzat, a ngan le hme a chiah caah Russia hi hnukir ding in voi tampi thlanglei ram hna nih an chimh. Sinain, Russia nih thlanglei ram hna cu a hro in a hro chih hna. Hi kong pehtlai hi hmai thla January 12 ah NATO Secretary General le Russia President nih hmaihtonh in an i ceih rih lai. The Chin Post
Leave a Reply