Mindat-Matupi Thawngpang Kan Theih Mi Cu A Sunglawi Kho Taktak E (+Thawngdang)

Cu a rawk mi motor cu SAC ralkap hna nih a ke cu an laak i, a pum cu thingkung thlukhnawh in an thuh, tiah CDF- Mindat nih cathanh an chuah. Matupi in Mindat lei ah a kal mi SAC ralkap motor run cu Mindat khuachung 274 battalion sin a phan cang, tiah an langhter chih.

Matupi ah minung thazaang an chap khawh in a kir mi SAC ralkap motor run le CDF-Mindat cu nihin May 12, zaanlei ah faak ngai in an i kap ṭhan, tiah CDF-Mindat nih an thanh. Phone line hman khawh a si lo caah ralhmai kal hna he pehtlaihnak tuah zong a har i, thawngpang i thanhnak ah harnak kan ngei, tiah an langhter.

Nihin Kahdohnak a chuahnak hmun hi Mindat-Matupi lampi mengtung 14 ah a si. CDF-Mindat nih SAC ralkap motor ruun cu an kah pah lengmang hna caah nihin hi Mindat phan ding an si cang nain khoika an phanh a fiang rih lo, tiah CDF-Mindat in chimphuannak nawlngeitu Salai Ha Uam nih a chim.

SAC ralkap motor run cu Matupi in April 27 ah khan an chuak i, CDF Mindat nih April 30 in nihin May 12 tiang nitin ngawt in an rak kah hna. Meng 6 tluk a hlat mi khuallam cu nihnih hna an kal, tiah Salai Ha Uam nih a chim.

“Meng 100 tluk a hlatnak khuallam cu zarhhnih hrawng an kal i, nawlpek an si caah nawl zul in a kal mi an si, thihnak lampi ah kal mi bantuk an si ko,” tiah a chim chap. CDF-Mindat nih cun rallam a sialtu SAC ralkap motor run hna cu Mindat an phak hlan lo faakpi in kan kah peng hna lai, tiah an chim.

 

Bago ramṭhen, Nattalin peng Tawngngyo Myotit pawng ah SAC ralkap hna cu Bago ramṭhen tualchung hriamtlai phu hna nih an rak kah hna i, SAC ralkap 3 an thi, tiah Bago Region PDF nih an thanh. Nihin May 13, zinglei suimilam 8:00 hrawng ah Tawngngyo myotit pawng Gwaygyi(ဂွေ့ကြီး) khua le Ngawnglaypin(ညောင်လေးပင်) khua kar ah minung thazaang 30 hrawng he rallam a sialtu SAC ralkap hna cu Bago ramṭhen tualchung hriamtlai phu le Tayawady penkomh PDF battalion no. 3801 tat- khuai 2 le tat- khuai 3 nih an kah hna, tiah theih a si. Cu kahdohnak chung ah cun SAC ralkap 3 an thi i, hliamhma tuar mi zong an tam. Tualchung hriamtlai phu lei hliamhma tuar um lo in hnu an tolh ṭhan, tiah theih a si.

Myanmar ram ah SAC nih nawlngeihnak a laak hnu kumkhat leng chung ah sualnak ngeilo minung 5,645 tiang an nunnak a liam cang, tiah ISP nih nizaan May 12 ah a thanh. Tutan Myanmar nih a ton mi le SAC ralkap nih minung nunnak an laak mi bantum hi cuhlan tuanbia ah rak ton bal lo mi a si, tiah ISP Myanmar in U Kyaw Htat Aung nih RFA ah a chim.

SAC ralkap nih nawlngeihnak an laak hnu in Myanmar tuanbia ah ton bal lo mi hmuhton a si; firnak a tam, i dohnak le remlonak a karh, kahdohnak zong a tam caah mipi nunnak zong tampi a liam. Cu chung in SAC ralkap uk duh lo langhternak ah kah a tong mi le tlaihkhih ton hnu ah nunnak liam mi hna hi 1831 an si. Sagaing ramṭhen ah nunnak tam bik a liam i, nunnak a luam mi dihlak hi 599 an si. SAC ralkap nih uknak a laknak cu kumkhat leng a si cang nain, tlaihkhih tong mi le hrem a tong mi an tam rih caah nunnak a liam mi cazin langhter mi cu karh lei a panh peng, tiah ISP Myanmar nih cun a langhter.

SAC ralkap sakhan pakhat in ralbawi pakhat le SAC ralkap pakhat cu an hriamthil tampi he CDM an tuah caah Pyituh Pantai(ပြည်သူ့ပန်းတိုင်) nih phaisa sing 30 an pek hna lai i, NUG Ministry of Defence(MOD) nih laksawng an pek chap hna lai, tiah Pyituh Pantai(ပြည်သူ့ပန်းတိုင်) phu nih an thanh. SAC ralkap hmaikal sakhan in ralbawi pakhat le SAC ralkap pakhat cu SAC ralkap kuttang um duh ti lo in, chuah an duh caah Pyituh Pantai (ပြည်သူ့ပန်းတိုင်) phu sin ah pehtlaihnak an tuah. Pyituh Pantai nih NUG- MOD le KPICT sin ah bawmhnak an halpiak hna i, a himnak hmun ah an kal kho cang. Hriamthil tampi an i put khawh caah Pyituh Pantai phu nih sing 30 an pak hna lai i NUG Ministry of Defence zong nih laksawng an pek chap hna lai. SAC ralkap sakhan in hriamthil he CDM tuah a duh mi hna nih Pyituh Pantai phu sin ah pehtlaihnak tuah khawh kan si, tiah an langhter.