Min Aung Hliang Nih Kai Cio Dingin Sawmnak A Tuah Cang Hih!!

SAC ralhrang nih tang 8 awng paohpoah tintan kainak an tuah lai
============================
Tang 8 a awng mi paoh paoh nih သမဝါယမ cazin tlaihin pacawm khawhnak tintan sianginn cu Magwe khuapi ah a ra lai mi June thla ni 16 ah hun nak an tuah lai tiah သမဝါယမ vuanci nih a chim. Tintan cawnnak hi kum 2 a si lai ii tintan dih a si ah cun သမဝါယမ le khuate thanchonak, သမဝါယမ fimcawnnak zung Tintan cawnnak chimhtu phu nih Diploma in Business Accounting peek an si lai tiah theih a si.

Mah tintan a kai mi paoh poah cu rampi nih a dih mi eiding tirawl caah thlakhat ah 30000ks peek an si lai pinah hnipuan eihman ah kum khat caah 25000ks peek an si lai ii a lam hlat in a ra mi pawl zong thutum ihnak tuanvo laak piak an si lai tiah theih a si. A tu ah kai dingin a min aa pee mi hi 78 an si ii pa 29 le nu 49 an si tiah theih a si. SAC ralhrang nih mipi leiin kai cio dingin sawmnak an tuah tiah theih a si.

Kutke Tohnun Cawnpiaktu CDF Kan Fanau Hna Federal NUN Cawnpiaktu Hna. Paucan Dohtlennak ah Midang le Mi Cozah bochan in TEINAK kan hmuh men lai tiah kan I ruah. Asi Naisai tilo. Kanmah tein kan cawlcangh hnu lawng ah RALTEINAK kan hmuh deuh ti cu hngalh cio asi. Miphun dang le an cozah nih an kan bawmhchan hi aum rih lo.

Pathian nih amah thawng in kanmah kutke te in RALTEI awk ah an kan timh piak mi asi. Mi roling Bawi Cin Pa kha nung rih sehlaw, Mah Kutke Toh Nun kan ti ko hna hme kha, ka ti reng kha an kan ti ko lai. Miphun dang kutke toh aa fak sak tuk mi le aa nauta tuk mi Mi Roling Pu Hrang Nawl thinlung le Ziaza cu CDF nih an tlinter khitkhet ko. Kutke Tohnun Cawnpiaktu CDF kan fanau le an si.

Federal Muisam cu Practical in an kan hliah tertu CDF an si ko lo ma. CHIN mi kan pa le hruaitu tampi nih Kawlte cozah le bawmhnak an I bochan tuk caah RALTEI loin Nihin tiang kan rau hi asi bik ko. Kawlte tuanphung ah APA nakin AFAPA thlakhat a upa deuh an ti. CDF le Paucan Dohthlennak hruaitu ah kan ruah I, anmah zong nih aa ruah ve mi CHINMI kan pa le nuncan ziaza he rem suup bak.

CDF nih Mah Kutke toh nun an thiam CHINMI kan pa le tampi nih CIATO nun thiam suup ve. CDF kutke Tohnun a nunnak le thahri thisen cu Ramdang um Samaria Miṭha rual CHINMI kan si. Myone ee Pengkulh ee tihi Miphun dang nih tuah piak mi asi. Kanmah tein kan I tuah mi a um lo. Miphun dang nih I pumkhat khawh hna hlahseh tiah an kan tuah piak mi asi. CHIN COZAH, CHIN HLUTDAW kan I ngeih te tik ah zeitindah an kan hruai te lai, dam lak in, hngak rih ko sih.

Atak tak ti ko lo ah, CDF hi mifim mi thiam, catang sang, Deirel Arfi Mino tete, hmai lei ruahchan nak le kan suttung an si. Thlahlawh tampi hmuh awk ah; Hmunhma le reng sang co awk ah; Popular si awk le min than awk ah; Credit hmuh duh ruang ah; Party pakhat ṭhatnak le teinak hmuh awk ah: aa thawh mi an si lo. Kan ram le miphun nih Zalonnak tlin hmuh awk ah zeizong vialte kaltak in; an ngeih chun nunnak pek in le thisen tampi he Vawlei cung Ralhrang bik MAH te Rallokap adoh cuahmah mi an si. Kawlram le CHIN tuanbia ah ram le miphun caah; nunnak pek awk ah; hi tluk tam in mino an I thawh bal rih lo.

Miphun le ram caah Harnak vialte le thihnak I thimh in mino nih ral an doh timi tuanbia Kawlram ah a um bal rih lo. CHINRAM zong ah cu tho. Cu caah tutan ah Kawl Ralhrang kip kan tei hna lo ahcun hmai lei cu kan tei khawh ti hna lai lo. Nihin tiang Kan Ral kan tei rih lo mi cu miphun dang le an minung kan bochan hna caah asi. CHINMI hruaitu tampi zong nih mah kutke toh nun an pemh lo caah, miphun dang nih ukmi cozah le phu kha an kan bochan pi. Cucaah Raltei cu chimh lo, Fir nak le I hlen nak lawng in a khat ve.

CHINMI nih kanmah le kanmah kan I zumh bak a herh tuk cang. Kan Zeizong in, kan pahrang cio in, mah le khap tawk tein, CDF kan bawmhchan a herh fawn. A lamkip in thazang ṭhawn ter aherh bak fawn. Tutan ral kan sungh ahcun mah le mah I zumh ngamnak a tlau caah asi lai. Keimah / Kanmah cu santlaih lomi kan si timi lungput nih an kan sungh ter I asi ko lai. Mi nauta kan silo tiah Pu Solomon nih ati zungzal kha.

Tutan kan sungh ahcun mi nauta lungput kan ngeih ruang ah asi ko lai. Harsatnak phunzakip nih relcawk loin an kan kulh I an kan den caah, thachiat le lungder in hnu khirh ding kan si lo. CHINMI vialte nih pakhat hmanh bau lo tein, kan lung ṭhawng sehlaw, hacang rial in hmai ah nawr ko sih. Harsatnak, hlawhtlin lonak le kan chunmang ning in thil asi lo mi hi kan mah santlai lo asi hrim lo timi Bianabia langh ter tuah hna sih.

Kan nun lamthluan ah phaisa tampi hmuhcan aum lai, phaisa kawl khawh lo can bak aum lai, Dawtu le Dawtmi an tampi can aum lai, hlawtcan le kaltak can a um lai, mah lawng tein um can aum lai, hlawhtlin can aum btkin, hlawhtlin ballo can a tampi ve lai; Hlawhtlin can ah kan I nuam tuk ngamsam I, mah le mah I zumhnak degree a sangkhun tawn ve lai; Vawlei cung ah aanuam bik phun in na len can a um ve lai; zeihmanh kan hlawhtlin lo tik ah, hmaichiat le lungrawk in mah le mah I zumh khawh lo can atam pi ve lai; Keimah pa KEIMAH NU hi san ka tlaih lo tiah vuivai in kan zai can aum lai; mah le mah hri awk hmanh kan ngamh can a tam pi kho; Afiang mi cu san kan tlaih lo ruangah asi Naisai lo. Kanmah fimthiam lo le tlamtlin lo ruangah kan hlawh tlin lo hi asi hrim hrim lo; aarup lo mi te arak um I, cucu remh kan philh tawn caah asi.

Afiang bik mi cu Kawlram ah achuak I aum mi sihlah usih law, hi btk sining le thil hi cu kan tawn ve bak hnga lo. Ramthumnak um CHIN Mi kan fanau zong an tuar cio lo pi. Vawleipi cu aper lo apum mi asi atitu Coper Nicas kha 20th Century ah chuak ve sehlaw, anung in an thah ve lai lo.

American le Israel ram ah a ṭhang mi si hna sehlaw, Hitler nih Judah mi tampi a thah ve hna lai lo; Germany le Europe ah a chuak I a ṭhang mi Jew miphun an si caah asi. An caah hmunhma asilomi le aarup lomi Ralhrang cozah Hitler ruangah asi ko. Kanmah sifah ruangah le santlaih lo ruangah siloin, hmunhma le a can aapalh caah hlawhtlin lonak vialte hi an si ti hi hngalh awk asi. Nain a can asi rih lo, a hmunhma asi rih lo ti hi Biasiphai nak ah hmang ahcun sungh zatlak nak asi fawn.

Dawr zuartu sin ah mi pakhat ara. Bia nem te he a hei donh. Na dam maw, kan leng ko, na duh mi I lak ko, a man kan ṭhumh lai, caah tiah thlum al tein a chawnbiak ko nain, thli cawk loin achuak diam. Keimah santlai lo, chawnbiak zia ka thiam lo, ka thil hi mi tluk in a ṭha lo asi lai, hi hnu ka dawr ah thil cawk mi an rat duh ti lai maw tiah a lung a rawk tuk I, hmai lei paw cawm nak le rumnak caah asi khawh ti lo; hi hnu dawr ka zuar bal ti lailo ati.

Nain ruah awk aum mi cu; na thil an cawk lonak aruang kha asi. Phaisa aa ken lo; A hnu ah cawk te ning ati kho; Nangmah santlaih lo ruangah asi lo. Phaisa tampi sungh hi thihlohnak asilo. Mah le mah zumhnak a tlau I athih lawng ah thih cikcek asi ve. Hlawhtlin lo nak voikhat te kan tawn, apoilo kan ti khawh; Voi hnih kan tawn, kan I ralrin deuh I kan thinphang cawlh cang; Voi 3-4 kan tawn tik ah lungrawk tuk cang I, santlaih lo kei valpa kan ti tawn.

Hlawhtlin lo hi voi 3-4 lawng asi lai tiah Cawnpiak mi kan si sual maw? Ni fatin le thla fatin ruah asur zungzal I ni alinh tuk zungzal ko ṭung, Keimah santlaih lo tiah vuiva ti hlah. Minmei nih aphen mi NIKA ceunak ruangah Cerlian NINU asinak adih lo I atlau ballo. Ni 10, thla khat chung chum aa zel zong ah, an ṭian Ni khi cu NIKA Ceunak cu tleu khitkhet tein kan hmuh tawn kha. Phentu Ralhrang Minmei pi cu a ṭian can ara lio. CDF thlitu / chimthli nih chawl bang a choi pet te lai.

Cheukhat hlawhtlin lonak cu Hlawhtlin lo cia in aa sem lo I a um fawn lo. Mah le mah zumh nak atlau I, kutke Tohnun kan thiam lo can, mi thaw in kan nung lio can, midang kan I bochan lio can, miphun dang le Ramdang kan bochan I anmah ah kan I ngat tuk lio can, tbk ah hlawhtlin lo nak cu: za ah za aa siam cawlh ve. Mah le mah zumh fek nak nih kutke toh nun an kan chimh I, Kutke toh nun nih CIATO nun an kan cawn piak I, CIATO nih mah le mah zumh ngam lo nak a hrin ve. Cu tikah Ral sung cikcek ve asi. Confidence timi kan ngeih lo caah Sungh asi tawn.

Note: Hakha Khualipi ah CDMers Saya/ma te 223 Non CDMers an si ṭhan hi CIATO hna ruang ah asi. Firkhut hna ruangah asi. Mah le mah aa zumh khawh lo mi pawl ruang ah asi. CDF sual santlaih lo ruang ah asi bak loh. Khuadang kong cu um seh, Hakha khua mi ka si caah Hakha kong lawng chimh lang. Fianternak: Thlacamtu Ralkap ahhin Katupa a um ve. Ka nute fapa asi. Minchimh ah a him lo caah asi. Second Fallen Hero pa kha kan fapa te asi. Pengtlang rak kan ti duh hlah uh. Kan um nak cio ah CHIN Ralkap kan ṭuan dih ko. Crd-Saya H. Rung Kaw

Min Aung Hliang Nih Kai Cio Dingin Sawmnak A Tuah Cang Hih!!

Be the first to comment

Leave a Reply Cancel reply