Thailand Ah SAC Ralhrang Raltuknak Vanlawng A Luh Caah Thailand Nih Ralring Ka Peek Lai
====================================
Kahdohnak palkhat ah Myanmar raltuknak vanlawng pakhat kan vawlei lawngin a rak luh caah Thai-Myanmar ramri ah June ni 30 ah raltuknak vanlawng pawl a ran khawh chungin kan thlah hna ii SAC ralhrang cozah cu ralring peek ding in humtimtu vuanci sinak theihternak kan tuah cang tiah Thailand nih a chim.
Myanmar ramnri pawng Thailand ram chungah raltuknak vanlawng pakhat a phan ii radar nih a hmuh hnu ah Thai Air Force F-16 fighter pa 2 an thlah nak kong cu Thai cunglei in chimnawl negi tu Prapatsun Chaidee nih a chim. ” Ramri kipah a um mi tlangcung hraimtlai pawl kahdoh pah ah, Tak state Tofu hmun hma,
Thai ram chungah a phaknak kong cu Prapatsun nih a chim. Mah kong he pehtlai in SAC ralhrang leiin chim nawl negitu sinah pehtlainak ngeih a si ko nain pehtlaih khawh an si lonak kong cu Thai thangzamh nih langhternak an tuah.
Sagaing ramțhen, Minkin peng ah rallam a sial mi SAC ralkap hna cu bomb an i pah i SAC ralkap 3 an thi tiah TaungDwin PDF (TDPDF) nih an thanh Nizan June 30 ah MinKin peng Kyaw Khua ah umhmun a khuarmi SAC ralkap le TaungDwin PDF karlak kahdohnak a chuak. Cu SAC ralkap hna cu PiaTung ( ပျားသုံး)khua lei ah rallam an sial lio ah bomb in an doh hna i SAC ralkap 3 an thi 2 hliam an tuar tiah TaungDwin mizapi vengtu ralkap ( TDPDF ) cathanh cung ah an langhter.
SAC ralkap a thimi hna an ruak cu Kyaw khua thlanmual ah an vui hna. May thla chungah Sagaing ramțhen, MinKin peng, Kyaw khua ah umhmun a khuarmi SAC ralkap hna cu tualchung PDF hna nih Ni 20 chung ral an hranh hna i SAC 20 leng an thah khawh hna tiah Kani hmunhma um KyaukLungGyi KLG PDF nih cathanh an chuah.
Shan ramkulh thlanglei, DaNu(ဓနု) hmunram, YwaNgan PDF(YPDF) cu harnak tampi ruangah kan hrawh cang, tiah June 30 ah YPDF nih mizapi sinah an langhter. YPDF cu 2021 December 25 ah rak dirhmi a si i, ṭangṭi phu hna he i bawm in YawNgan le PinTaYa(ပင်းတယ) peng ah SAC ralkap a dohtu phu an si.
Kayah ramkulh, Loi- Kaw – LawPyiTa lampi cungah SAC ralkap eidin a chantu mawtaw pakhat cu nizan June 30 zinglei Sml 8:45 ah ralveng a chawk mi KNDF Battalion 10 nih an hmuh i an kah hna i Palik Bawi Win Zaw Thein tel in 4 an thi. Palik Bawi Win Zaw Thein cu Myikhtila(မိတ္တီလာ), Shan Mange ( ရှမ်းမငယ်)palik sakhan in a rak i thialmi a si i Kayah(Karenni) ramkulh a phanhnak hi thla 6 hrawnglawng a si rih tiah amah he a neihniam mi hna sin in theih a si.
Minute 20 hrawng kahdohnak a chuak, SAC ralkap mawtaw cung in 9mm pistol pakhat, kuan 12, Phone pahnih an lak khawh. Mizapi vengtu ralkap hliamtuar lo tein hnu an tolh kho. Cu kahdohnak a chuahhnu in SAC ralkap LawPyiTa um Khah- Lah- Yiah 72 battalion nih kahdohnak a cannak hmun kam hrawng khuate lei ah hriamngan an kah, LayInnSuh ( လေးအိမျစု)khua chungah a tla i inn pakhat a rawk tiah KNDF nih an thanh.
Magwe ramțhen, Gangaw peng, Țaung Khin Yan palik sakhan cu June 29 zinglei ah mizapi vengtu ralkap nih an kah i SAC ralkap 8 an thi i an sakhan a rawk dih ti tluk a si tiah PDF – Gangaw sin in theih a si.” Zing Sml 4 :00 ah PDF Gangaw Battalion 1 le Pah – Kah – Phah hna i bawm in sakhan lak ding ah an kah hna, kahdohnak cu Suimilam pakhat chung a rau.
SAC ralkap hriamngan ruang ah Țaung Khin Yan khuachung Caw 2 an thi . Hnu kan tolh pah ah kan ralkap pakhat a phei ah kuan nih a khen .A hliamhma thinphang si lo. PyoSawHtee hna nih thawng pek ning ah cun SAC ralkap 8 an thi. June 30 ah an ruak an khangh hna tiah theih a si ” tiah PDF – Gangaw tuanvo ngeitu Lyin Ngo nih a chim.
Chin ramkulh, Matupi peng ah a luancia June 15 hrawng in phone line a chia tuk i nihin July 1 ah phone line an phih, tiah theih a si.
Nizan June 30 zinglei in phone line a ngah ko nain nihin July 1 in phone chawnh a ngah ti lo. Zei ruangah ah dah phone line an phih ti cu hngalh a si lo. Matupi peng ah MPT, Telenor le Oredoo lawng a ngah i a pathum ning tein an phih. Cu pinah internet line an phihnak kum khat hrawng a si cang, tiah theih a si.
Sagaing ramțhen, Boețalyi peng Kodaw palik sakhan cu a voi 4 nak kan kah hna i SAC ralkap 6 an thi tiah Black Dragon Special Task Force phu Nihin July 1 an thanh. Hi Sakhan hi June thlachung ahkhan voi 3 kahdoh an tong cang. June 28 zanlei Sml 3:30 hrawngah Boțalyn peng Kodaw palik sakhan chungah 40 mm lung 6, 40mm lung 4 in kah an si tiah Black Gragon Special Task Force phu nih cathanh chungah an langhter. Cu kahdohnak ah KaNaung People’s Defence Force le Black Dragon Special Task Force phu hna an i bawm.
Mon ramkulh, ThaTone(သထုံ) peng ToneBuLay(ထုံးဘိုလေး) khua pawng ah SAC ralkap le PDF an i kap i, PDF ralkap 2 an nunnak liam, tiah ThaTone pengkomh PDF ṭuanvo ngeitu pakhat nih a chim. June 26 ahkhan SAC ralkap le KNLA ṭangṭi phu kahdohnak a chuak i, PDF ralkap Thi Ha Zaw le Si Thu Aung an nunnak liam hi a si. PDF ralkap pahnih hna cu ThaTone pengkomh KNLA Brigade 1, Battalion 1, PDF No. 1 Battalion ralkap an si, tiah ṭuanvo ngeitu nih a chim.
An nunnak liammi PDF ralkap pahnih hna cu, khuapau dohthlennak ah pasal ṭha an si i, an i pekchanhnak le tuanbia an ṭialmi pehzulh dingin kan i zuam lai, tiah KNU ThanTone Partnership Oversight Committee nih cathanh an chuah. ThaTone peng ToneBuLay khua kahdohnak ah SAC ralkap nih inn 150 leng mei in an khangh i khuami 10 nak tlawm lo an thah hna. Atu lio hi ThanTone peng ah kaphnih kahdohnak a zual tuk caah tualchung mi 3000 leng an zam, tiah theih a si.
Karen ramkulh le Shan ramkulh ramri Hpekhong peng LywiMaKu(လွယ်မကူး) khua le LywiHe(လွယ်ဟယ်) khua ah, umhmun khuarmi SAC ralkap cu nihin zinglei ah Central Division Special Operations Sniper phu le Fighter phu nih Sniper in an kah hna caah SAC ralkap 7 an thi, Central Division Special Operations nih cathanh an chuah.
June 23 zong ah LywiMaKu umhmun khuarmi SAC ralkap pawl cu thiamhlei phu le Sniper phu nih an kah hna caah SAC ralkap 2 an thi. June 29 ah Hpekhong peng LywiMaKu umhmun khuarmi SAC ralkap pawl cu Sniper phu le Fighter phu i bawm in an kah hna caah ralkap 5 an thi, tiah theih a si.
Leave a Reply