Min Aung Hlaing, Kahdohnak Daihnak Kan Ser Lai
===========
Vanlawng in zarh hnih deng an kah hna lio ah Karenni cu ralhrang nih daih nak ser ding in Min Aung Hlaing nih sawm nak ca apek mi hna cu Karenni National Development Party nih an cohlang duh lo. January 15 ah acang mi Kaya kum 70 tling nak ni ah ralkap bawi nih a kuat mi hna ca cu daih nak ser ding in sawm nak ca asi.
Mah kong he pehtlai in Karenni National Development Party ah Secretary atuan lio mi Aung San Myint nih
”Kan mah cu zeitluk hmanh in daih nak ser ding in kan sawm hmanh sehlaw an mah he ii ceih nak ding um lo. Nihin kan mah Karenni khua cu a rawk tuk cang. Kan mah cu a tu kah doh nak ah hin hriam nam ngan in siseh, ral tuk nak motor in siseh, vanlawng hman in siseh a kan kah cang.
Mah bantuk kah doh nak ah le kan mah mipi sual nak angei lo mi pawl cung tiang ah an tuah ser nak vial te hi philh in daih nak ser ding ah bia kan i ruah lai tiah akan ti mi hi kan mah nih cun kan tuah kho lo. Mah thil hi cu afiang mi asi ko. Ramkhel kong lei in siseh atu asi lio mi thil sining zoh hin siseh kan mah nih cun kan duh nak ding lam a um lo. Mah te cu chim ka duh mi asi ko” tiah achim.
Min Aung Hlaing nih vanlawng kah nak in siseh vawlei lei kah doh nak ah siseh kah doh nak afak tak tak nak Karenni khua ah sawm nak ca a kuat mi hna cu ram le miphun adaih i athan cho nak dingah ralkap he i bawmh in tuan tti ding ah le,
zungzal ram daih nak cu tuhnu te chin fapar chan tiang in kan hmuh khawh nak hnga ser ti ding le ram daih nak lam thar kan ser ti khawh nak hnga bia i ruah ti ding in asi.
Karenni khua ah a tu a cang lio mi i kah doh nak le mipi pawl cungah ralhrang nih an tuah mi sual nak pawl vial te philh piak in ralhrang he daih nak kong bia ii ruah ding cu alam a um lo. Ralhrang nih 2008 hruai nak phun in an tuah lai mi
bia ii ruah nak zong cohlang ding aum lo tiah Aung San Myint nih achim. Kah doh nak fak tuk lio ah khat te lei in bantuk rem daih nak kong ah bia ii ruah ti ding in akan sawm mi hi khat te lei in kan zoh si ah cun
rem daih nak kan ser lai ti nak in an mah ralhrang pawl nih mipi cungah an tuah mi sualnak pawl khuh an duh ruangah asi tiah Aung San Myint nih achim. March 20 in kah doh nak hram cu a thawk ii nikhat hnu nikhat in afak chin. Christmas zaan ah sualnak ngei lo mipi 40 leng cungah mei in an khangh mi hna cu vawlei pi nih an theih dih cang ko.
Theih ding zong in kan chim. Mah an tuah mi sual nak pawl cu khuh an duh ruang ah akan sawm mi asi tiah keimah nih cun ka ruah tiah achim.
Rem daih nak ser ti ding in ralbawi Min Aung Hlaing nih sawm nak ca a kuat ko hna nain ralhrang le KA, KNDF, PDF kar ah kah doh nak cu adai deuh hlei lo. Khuapi he khua te he kah doh nak cu adai lo. Mah kah doh nak ruangah Karenni mipi acheu cu ral an zam cang. 107000 tluk ral an zam cang tiah kan theih. Source: Network Media
Leave a Reply