Min Aung Hlaing Sakhan An Lak

Nov 14, tuzing zinglei ah Hpakanh i ralhrang sakhan pathum cu KIA nih caan khat teah an kah i a pathum ningin an lak tiah theih a si. Hpakanh peng Kan Si khatlei ral ralhrang sakhan pathum နမ်ဂျန်​အောင်လျဲန်, ဆိုင်းဂျာ le ဂါခရန် hna cu KIA nih nizan khan an kah i tuzing ah an lak khawh cang tiah khuami pakhat nih a chim. Cu sakhan pathum ah cun ralhrang 100 renglo an um tiah theih a si. A thimi le hliam a tuarmi cazin cu tuanvo ngeitu hna nih an thanh kho rih lo tiah Kachin Waves nih a tial.

Sagaing ramthen Wet Lat peng Hton Bo khua pawngah a ummi tualchung PDF sakhan cu mi sawhsawh thuam aa hruk i PDF bantukin aa hlengmi ralhrang hna nih Nov 13 zinglei 6:00 am hrawngah an luhhnawh hna i mei in an khangh tiah theih a si. Thit Sinh khua ah hmunhma a khuarmi ralhrang 50 hrawng cu khuami saikel 21 an chuh hna hnuah serchom meithal kha lenglang in an i put i PDF bantukin an i umter.

Cu hna nih cun PDF sakhan an luhhnawh hi a si. Sakhan tuanvo ngeitu Ko Cuai Ci nih “Mi sawhsawh thilpuan an i hruk dih. Uniform pakhat hmanh an i hruk lo. Hriamngan in voihnih an kan kah. Cu hnuah pehtlai in meithal, puahceh meithal le auto meithal in an kan kah chih” tiah a chim. Ralhrang hna hi thawng petu an um caah PDF nih bomb an hmanhnak cu hrial in sakhan hnulei, bomb an hmanh lonak in an lut i chikhat lo ah an kah hna hi a si.

PDF pakhat le khuami pakhat an thi tiah theih a si. A dang cu him tein an i zukphiah kho. Ralhrang hna cu sakhan i riahbuk pakhat an khangh i saikel cheukhat an hrawh hnuah teinak kan hmuh tiin an i nuam i an aukhuang len. Sakhan in aa zukphiakmi PDF hna cu zeizat dah an si, hliamtuar teh an um maw tibantukin PDF lei nih fiangin an thanh lo nain PDF pakhat le khuami pakhat dah ti lo a dang cu a himnak hmun ah an phan dih cang tiah theih a si.

Ralhrang hna cu Wet Lat nichuahlei Ayerawaddy tiva thluan zulh in vok kuanglawng in an kir i an kir pah ah tiva kam khua hna cu hriamngan in voi 30 hrawng an kah pah hna tiah Wet Lat khua thawngthanhnak pakhat nih Nov 13 ah a tial. A luancia October thla zongah khan Sagaing ramthen Cite tlang khua pawng i PDF sakhan pakhat cu ralhrang nih mizaw phurhnak mawtaw hmangin an luh hnawh i PDF pahnih an thi, pakhat an tlaih bal cang, tiah Myanmar Now nih a tial.

Be the first to comment

Leave a Reply

Your email address will not be published.


*