Min Aung Hlaing Nih Tlangcungmi Hna Nih Duhmi Hnatlak Nak Tuah Aa Timh!!

Tlangcung mi hna tlukruannak le mahte khuankhan lairel khawhnak ca ah Min Aung Hlaing he hnatlaknak kan ngei, tiah Mon New State Party(MNSP) in chimphuannak nawlngeitu Naing Aung Ma Nge nih a chim. Remdaih tonbiaruah sawmnak ah Min Aung Hlaing le MNSP Vice Chairman Naing Aung Min nih a hruaimi bu hna cu, May 23 ah Naypyitaw ah sml 2 chung hrawng ceihmainak an ngei, tiah theih a si.

“Cu tonbiaruah ceihmainak ah hmailei Federal ram phunghrampi ṭial ding, tlangcung mi le rawnmi tluk ruannak le mahte khuakhan lairelnak ca ah ramkulh phunghrampi ṭial khawh nakding kong hnatlaknak kan ngei,” tiah Naing Aung Ma Nge nih a chim. “Federal ram phunghrampi ṭial nakding caah an cohlan, a tak in an ṭuan ding a tang. Ramkulh phunghrampi ṭial ding zong an cohlan. Tlukruannak le mahte khuakhan lairelnak zong an cohlan,” tiah A chimchap.

Tu lio rampi buaibainak kong ah MNSP nih Min Aung Hlaing an chimhmi cu- remdaih tonbiaruahnak a kaimi hriamtlai phu 10 pinah, a dang hriamtlai hna he ramchung asiloah ramleng ah ceihmai ding le ramkhel party dihlak he tonnak lam kawl ding an hal. Cu pinah rampi buaibainak kongah telh tlak a simi vialte an i tel khawhnak ding lam kawl ding zong an chimh.

Remdaih tonbiaruahnak cu nihin aa duh rih caah hlawhtlinnak kan hmu lai maw timi cu kan zoh rih lai, tiah Naing Aung Ma Nge nih a chim. Min Aung Hlaing he ceihmainak an ngeihmi cungah May 24 le 25 ah National Solidarity And Peace Negotiation Committee (NSPNC)he ceihmainak an ngei ṭhan lai, tiah theih a si. MNSP cu NCA min a thumi tlangcung hriamtlai phu an si. Min Aung Hlaing nih remdaih tonbiaruah sawmnak an kaimi cungah Mon miphun karlak ah hmuh thiamlonak le soiselnak an tong ngai. TCP

Monday ah khan vawlei pumpi in defense hruaitu minung 50 hrawnghrang tonnak an ngei hna i, Ukraine rilikap kilvenpiak dingin launchers le missile thatha tamdeuh in kan kuat rih hna lai, tiin lungtlinnak kan tuah, tiah Defense Secretary Lloyd Austin nih a chim.
US nih zeitindah Ukraine ralkap training a pek lai, US ralkap hi Ukraine ah an lut lai maw, timi kong cu ceihkhan a si te lai, tiah Gen. Mark Milley, chairman of the Joint Chiefs of Staff, nih a chim.
Ukraine ral a thawh hlan deuh te in khan Ukraine i a ummi a ralkap US nih a kirter manh hna i, ral a tumi a ralkap Ukraine lei kuat thannak kongah timhlamhnak a ngei rih lo, tiah theih a si. US Embassy kilvengtu asiloah kahdohnak tuahhau lo a dang rian caah cun a ralkap pawl a thlah than khawhmi a si, tiin AP News nih cun a tial. Kyiv i US embassy hi tlawmte cu a on pah cang i, rian zong an tuah pah hnihkhat cang. Asinain, an embassy kilvengtu dingah Marine ralkap a thlah hna lai maw, asiloah a dang duhthimnak a tuah lai maw, timi kong belte cu theih khawh a si rih lo.
Nihin tiang i Ukraine ah cawlcanghnak a ngei rih lo mi US special operation forces hi Ukraine lei ah nan thlah hna lai maw, tiin Gen. Milley cu an hal i, “Ukraine i US ralkap chiahthannak kongkau hi cu President biachah hau a si. Cucaah, cu bantuk biachahnak lawng cu kan i duh ko cang” tiin a leh hna. Ukraine lei nih US sinah an halmi high-tech mobile rocket launchers cu na kua lai maw kua lai lo, tiin Pentagon thawnglatu pawl nih Austin an hal ko nain a let hna lo. Russia nih Ukraine a luhhnawhnak hi thla 3 a rauh cang caah, Ukraine nih ai kilven khawhnak dingah a sinah hriamnaam thatha tampi in kuat dingin Monday ah khan ram 20 nih biachahnak an tuah ko cang, tiin Austin nih a chim.
Ukraine nih a rilipkap ai kilven khawhnak lai, Denmark nih harpoon launcher le missiles kuat a timh. Black Sea ah Russia nih a tilawng a chiah hna i, missile in heh tiah Ukraine a kah. Ukraine rili tilawng dinhnak hmun ah zeibantuk ramdang chawlehnak tilawng hmanh lut kho hna hlah seh, tiin Russia nih a kham dih hna. “Ukraine nih a hleice in a halmi le an tonmi harnak he ai tlakbikmi hriamnaam kongah a thabik in timhlamhpiaknak kan ngei ko cang. Miakpi ah hmanmi bomb, rilikap kilvennak system, tanks le a dang hriamnaam bunh mawtaw pawl tampi cu ram tampi nih an bomh cuahmah ko rih hna.
A cheu cu Ukraine ralkap training pek dingin kar an hlang cuahmah ve rih,” tiin zoom in defense leaders pawl meeting an tuahnak ah Austin nih a chim. Ukraine raminn pa Europe ram chungah Ukraine ralkap pawl cu US le a dang ram hna nih training an pek lio pi a si. Naite zongah khan Czech Republic nih attack helicopter, tanks le rockets a pek hna. Italy, Greece, Norway le Poland zong nih miakpi kahnak system le zenkuan bomh dingin Monday ah thawng an thanh. “Voitampi kan chim lengmang bantuk in, tutan ral ah kaphnih nih an hman ngaingaimi hriamnaam cu miakpi hi a si. Kan hnung zarh hnihthum chung cu khat le khat miakpi in faak ngaiin an i kahtonh, ti kan hmuh khawh,” tiin Austin nih a chim.
Ukraine officials nih an duhherhmi kong fiangtein an chim cang. An kan halmi hriamnaam hi a liamcia zarh hnihthum lio i bomh awk ah ai tlakmi hriamnaam an si ko lai, tiah an ruahmi ning tein an si dih – long-range miakpi, rocket system, hriamnaam bunh mawtaw le drones pawl an si, tiin Austin nih a chim. Russia nih Ukraine a luhhnawh ri in Europe lei i US nih a muihmai ai chinchin cang nak kong Gen. Milley nih tlingtein a langhter. Kan hnung Fall tiangah khan cun, Europe i a ummi US ralkap hi 78,000 an si i, a tu ah cun 102,000 an si cang – tilawng 24, submarines (ti tang kal tilawng) 4, raltuknak vanlawng 12, raltu kho van ralkap unit 2, Army brigade raltu kho team 6 le anmah le division cio i an bawi le pawl an i tel, tiah theih a si. Crd-Chelsea Bawi

2022, May thla ni 23, Tuni zaan lei suimilam pa 6:00 hrawngah Sagaing ramthen, Shwebo pengkulh, Ma Khoh Khuate pawng kahdohnak ah SAC ralhrang nih kahdohnak hmunhma thianhhlimhnak an tuah lio ah mipi kan ralkp minung pa 5 ruak an char tiah theih a si. Cu pinah SAC ralhrang hna nih PDF hriamnam kutin tuah mi meithal zuun khat, kuatin tuah mi bomb lung 10 le hraimanm dang an laak piak chap hna tiah theih a si.

Hi Mipi kan ralkap minung pa 5 SAC ralhrang nih an char mi hna hi, chungkhar chung ah an peek le peek hnga lo timi hi theih fiang a si rih lo. SAC ralhrang nih zeitinddah an tuah hna, mei in an khangh hna hnga maw tiah ruah a si.

Be the first to comment

Leave a Reply

Your email address will not be published.


*