Min Aung Hlaing Caah Cun Thawngchia Taktak A Hngilh Zong Aa Hngilh Kho Ti Lai Lo Dah

Tanintharyi ramtthen, Yiphyo peng chungah ummi Mawrawaddy timi ti lei ralkap (Mawrawadi Naval Base Headquarters) in ralkap pa 7 an zaam tiah hi a zaammi hna luatnak ding in bawmhnak petu pakhat nih a cim, an nih hi Marawadi ti lei ralkap tang, Maung Ma Kann Boke tikulh ah duty ciahmi an si. A luan ciami September ni 15, kum 2021 ah khan an umnak hmun le ralkap sinak chuahtaak in an zaam hnu ah tu ah cun him le bawm tein an himnak hmun an phan cang.

Uniform an i hruk lo, hriamnaam zong an i ken lo, mi sawsawh bantuk tein an rak zaam tiah an himnak ding hmun an phanh tiang bawmhnak petu pakhat nih cun a chim chap. Tanintharyi ramtthen, Dawei district chung in Min Aung Hlaing le ralhraang pawl nih uknak an laak hnu ah ralhraang sinak chuahtaak in a zaammi ralkap 50 leng an um cang. Mawrawady ti lei ralkap in hin a phu phu in a zaammi ralkap 20 in 30 tiang an um cang i mah hna lak ah range sang pakhat zong aa tel ve. Chin 24Saven News

Thingsai khua ah a zaam mi minung 800 leeng COVID-19 negative an si dih – September 19 Chin Ramkulh, Thantlang Peng chung i, CNA/CDF le SAC ralkap pawl karlak kahdohnak a chuah hnu Mizoram Thingsai khua lei ah a zaam mi Chin Ralzaam hna cu COVID-19 zawtnak chek dih an si i, an dihlak in zawtnak hmuh mi an um lo tiah Thingsai khuami sin in thawng kan theih. Mizoram Thingsai khua ah a zaam mi hna hi cazin dikthlir in theih a si rih lo nain buakthlak in minung 800 leeng cu an si cang tiah kan theih.

Thingsai khuami pakhat nih, “Myanmar ram lei in a rak zaam mi an dihlak sin ah COVID-19 zawtnak chek an si. Pathian a tha, an dihlak in zawtnak hmuh an si lo,” tiah The Hakha Post ah a chim. Thingsai khua ah a zaam mi Chin Ralzaam hna chung in Chin nu pakhat zong tluang tein nau zong a ngei kho tiah kan theih. Thingsai khuami hna hi an khua ah a zaam mi ralzaam hna umnak ca ah sangthar tiang a samh mi khua an si i, ralzaam hna umnak ah ti lei siseh, electric mei lei siseh lamsul lei siseh tlamtling tein a tawlrelpiak tu khua an si.

Thingsai khua pawngkam khua zong ah Chin Ralzaam minung tampi an um. Annih zong COVID-19 chek dih an si i atu tiang zawtnak ngei cu hmuh an si rih lo tiah kan theih. Photo: Mizoram Thinsai khua nih ralzaam hna ca ah an samh mi sang thar le inn – TheHakhaPost September 19, ni khat chung te ah Mizoram State, Lairam a phan mi ralzaam 200 leng an si. Nihin September 19, Zarhpi Ni nikhat chung ah Mizoram Ramkulh, Lairam (Lai Autonomous Distric Council) a phan mi ralzaam 200 leng an si tiah theih a si. “Chin Ramkulh in Lairam luhnak Vombuk lei, Saisih Chuak lei le lam dangdang in an lut.

Cu chungah Sangau peng chung ah a lut mi an tam bik i peng dangdang i a lan mi zong an um. YLA, Sub-HQ Bualpi le YLA, Sub-HQ Sangau Area chungah an tam bik tiah kan theih. Cheukhat cu Thantlang in direct in a lan mi an si i, cheukhat cu Bungtlang in a kal mi an si. Nihin ah a phan mi hna cu an tlun duhnak khua cio nih an rak tawlrel hna i, an tlunnak khua cio ah Quarantine center ah khumh colh an si.

“Puan vorh ding ai ken lo mi hna zong chungkhat petu a ngei mi cu anmah chungkhat nih an pek hna i, chungkhat petu ngeilo zong an tlunnak khua YLA cio nih puanvorh ding an rak pek hna. Cu lawng si lo in sii-ai herhhai ngei mi an si ahcun Sii-aii zong pek an si fawn,” tiah tuanvo ngeitu nih The Hakha Post ah a chim. Quarantine ah chiah mi hna cu ni 7 hnu ah Covid test an si lai i, ni 7 hnu ah chungkhat sin a um ding le inn a hlaang ding hna cu an duhnak cio ah an um lai. Cu bantuk a ngei lo mi hna cu Refugee camp YLA, Sub-HQ tawlrel mi ah chungkhar pakhat inn pakhat tiin chiah an si lai tiah kan theih.

Be the first to comment

Leave a Reply

Your email address will not be published.


*