Monywa Bank hngak Palek pakhat meithal zuun 2 he CDF-Hakha sin ah aa fon, CDM a tuah, September 19| Sagaing Ramthen Monywa khua ah Myanma Economic Bank a hngak mi Palek pakhat cu meithal zuun 2 he CDF-Hakha sin ah fon in CDM a tuah tiah kan theih. Hi thawng hi Khit Thit Media nih a tial mi a si i The Hakha Times nih CDF lei message in biahalnak kan kuat mi hna lehnak a um rih lo.
“Hi Palek pa hi nihin September 19 ah CDF-Hakha sin ah him tein a phan cang. Meithal zuun 2 aa chuahpi,” tiah PDF-Monywa (Thanmani) phu nih an thanh. Monywa Myanma Economic Bank hngak mi Palek cu meithal zuun 2 he CDF-Hakha sin ah him tein kan chiahthlah khawh tiah an thanh.
Dawpung Khua Ah Ralhrang Motor A Let Mon ram Dawpung khua ah ralhrang mawtaw alet i a hliammi an tam tiah theih asi. September 19 zingka ah Dawpung khua Dawngyaung hlei cung ah ralhrang motor cite phurtu motor a let i motor acitmi ralhrang cheukhat hliam an tuar tiah theih asi.
”Arang tuk i a thing khawh ti lo caah a mah tein alet mi si i a cung ah a citmi ralhrang cheukhat zong hliam an tuar a lu kuaimi le a ban kiakmi hna an um mi bawmchantu bu nih an va kal hnawh hna i an bawmh hna” tiah khuami pakhat nih achim. – Mizzima
SAC phu nih rammi cung an tuahsernak UN Nuhrin Covo Tawlreltu sin ah NUG nih report ca an tial, September 19| SAC phu nih Sagaing Ramthen le Magwe (Magway) Ramthen cbung July thla lio ah rammi cung an tuahsernak he pehtlai in NUG nih UN Nuhrin Covo Tawlreltu Phu sin ah report ca an tial, tiah theih a si.
Hi report ca hi September 13 lio, Switzerland ram, Geneva khua ah tuah mi a voi 48nak UN Nuhrin Covo Tawlreltu Phu meeting ah NUG nih an tial mi ca a si. “Sagaing Ramthen le Magwe Ramthen chung ah SAC phu nih mizapi cung ah an tuahsernak he pehtlai in ca kan kuat hna i aralai mi September 22 ah Myanmar ram Nuhrin Covo kong he aa pehtlai mi meeting hlan ah Online in chimnak nawl kan ngei kho ve lai,”
Tiah NUG Human Rights Affairs Minister U Aung Myo Min nih a chim. Hi kong ah a luancia July thla thok in SAC ralkap, palek le pyu-saw-htee hna nih Sagaing le Magwe Ramthen chung khuami thahnawn, innlo khanghpiak le thil firpiak, hrem tibantuk in an tuahsernak cu khuami hna sin in theih khawh a si, tiah Khit Thit Media nih a tial.
Leave a Reply