Min Aung Hlaing a khuakhan lairel mi cu a ropui kho taktak e!!

Kalaymyo Thonginn In Thongtla Minung 27 Nih Luatnak An Hmuh, Ramkhel Lei Thongtla 2 Lawng An I Tel!!
==========================
Sagaing ramṭhen, Kalaymyo thonginn ah nihin November 17, ah thongtla minung 27 nih luatnak an hmuh nain luatnak a hmutu thongtla hna chung ah ramkhel lei thongtla minung 2 lawng an i tel tiah theih a si. Luatnak a hmutu ramkhel lei thongtla minung 2 cu poh-mah 505(a) in tazacuai le tlaihkhih a tongmi an si i, sianginn cachim saya pakhat le lamzawhnak hmun pawng ah tlaihkhih a rak tongmi pa pakhat an si tiah theih a si.

Luatnak a hmutu an dihlak hi pa 24 le nu 3 tiin an dihlak ah minung 27 an si. SAC ralkap hna nih nihin November 17 zinglei ah Myanmar ramchung huapin thonginn hmunkip ah thongtla mi 6000 tluk hrawng cu November 17, a voi 102 nak National Day ni camtuak a phanh tik ah luatnak kan pek hna lai tiah an rak thanh. Tlaih than an ton a si ah cun a tangmi thong an tlak ding caan zong thongthlak chap an si lai tiah an thanhmi ah an langhter chih.

88 Siangngakchia hruaitu Mya Aye, NLD hruaitu Dr. Myo Ngunt le catial thiam Maung Thar Cho hna cu SAC ralkap nih thonginn In an chuah cang hna tiah theih a si.

88 siangakchia hruaitu Mya Aye cu nihin November 17 ah thonginn in a chuak cang lai tiin thawngpang a leng, tiah theih a si. 88 siangakchia hruaitu Mya Aye fanu nih, “Ka pa cu thonginn in a chuak cang lai, tiah kan theih nain atu tiang cu kan inn a rak phan kho rih lo. Rian dang a tam caah zaanlei lawng ah a chuak kho lai tiin an chim than,” tiah amah pumpak social media ah a tar.

Dam tein ka pa kan inn a phanh hnu lawngah zaangdam tein kan thaw kan chuah kho lai. Ka pa ca le kan chungkhar ca ah thlaza a kan campiaktu nan dihlak cungah lunglawmhnak tampi kan ngei, tiah amah pumpak social media ahcun a tar langhchih tiah theih a si.

88 siangakchia hruaitu Mya Aye cu SAC nih nawlngeinak an lak 2021 Febuary 1 zaan ah a inn ah SAC ralkap nih an rak tlaih i, section 505(c) in SAC nih taza an cuai hnuah Insein biaceih zung nih kum 2 thong thlak ding in bia khiahnak an rak tuah piak. SAC nih nihin November 17 ah thongtla pa minung 5,098 le nu 676 an dihlak 5,774 kan luatter hna lai, tiah an thanh tiah theih a si.

Saw Peng Ah Hriamthil He CDM Cawlcanghnak A Tuahtu Palik 4 Laksawng An Pek Hna, Magway ramṭhen, Saw peng Myomah palik sakhan in duh-tat-kyat pakhat le palik 3 nih an hriamthil he Gangaw pengkomh PDF sin ah CDM cawlcanghnak an tuah tiah theih a si. Nihin November 17, ah NUG nih cathanh chuahnak an tuah mi an cathanh chung ah No.1 hmunhma Gangaw pengkomh battalion 3 sin ah SAC ralkap kuttang um Saw peng Myomah sakhan i rianṭuan mi duh-tat-kyat pakhat le palik 3, an zapi minung 4 nih an hriamthil he CDM cawlcanghnak an tuah tiah an langhter.

CDM cawlcanghnak a tuahtu palik 4 hna cu tualchung hriamtlai phu PDF, No.1 hmunram Gangaw pengkomh battalion 3 ah laksawng peknak an tuah i, tat-yin-hmu nih biachimnak le laksawng peknak a ngeih hna tiah theih a si. NUG cozah runvennak lei vuanci nih hramhram uknak latu SAC ralkap kuttang ah rianṭuan a duhlo mi paoh cu kan in cohlan peng ko hna tiah cathanh an chuah.

Matupi Peng Chung Ah Ral Hrial Dirhmun In A Ummi Hartong Hna Ca Ah Matupi-IDPs Nih Bawmhnak A Pek, SAC ralkap nih hramhram uknak an lak 2021, February thla thok in Chin ramkulh, Matupi pengchung Tuishi khuami hna cu ralhrial dirhmun in an um, an i dornak caan hi kum khat leng a luan cang tiah theih a si.

Tuishi khua in ralzaam dirhmun a phanmi hna an i thialnak hmunah an i dornak inn cungcih caah hman dingin ruahkham(mu-ka) tung/vang pee 18 simi 42 le sianginn cungcih caah tiin ruahkham(mu-ka) tung/vang pee 18 simi 43 tiin sing 1,260,000mmk man cu Matupi-IDPs hruainak in bawmhnak an pek hna tiah theih a si.

Matupi-IDPs nih voithum tiang bawmhnak peknak a tuahnak cungah mipi ukhruainak phu (ohchohzi detah 3 committee) nih lunglawmhnak an langhter i bawmhmi phaisa zong tlamtling tein kan cohlan cang tiah cathanh an chuah tiah theih a si. Matupi-IDPs nih bawmhnak a pek mi phaisa hi tuni tiangah 4,710,000 a si cang tiah theih a si.

Tuluk-Myanmar Ramri Ah Kahdohnak A Chuak I Motor Remhtu Ngakchia Pakhat A Nunnak A Liam, Pakhat Hliamhma A Pu, Tuluk-Myanmar ramri, Muse Cinsankyaw(ကျင်စန်းကျော့) ah SAC ralkap le a ho ti theih lomi hriamtlai phu karah nizan November 16 zaanlei sml 1:30 hrawngah kahdohnak a chuak i, motor remhtu ngakchia pakhat cu hriamngan kuan nih a khen caah a nunnak a liam, pakhat hliamhma a pu, tiah ramri um tualchung mi hna sinin theih a si.

“Motor remhnak dawr a tuahtu pa pakhat sinah motor remh rian a ṭuanmi ngakchia hna le Muse motor remhnak ah rian a ṭuantu ngakchia hna cu midang motor a rawkmi remhpiak dingin an kal, lam tanṭim ah a rawkmi motor an remh cuahmah lioah hriamngan kuan nih a tlak hna caah ngakchia pakhat a nunnak liam hi a si,” tiah tualchung mi pakhat nih a chim.

Ramri ah thil a phurmi pakhat nih, “Hpayarkone(ဘုရားကုန်း) ah kahdohnak a chuak i, hriamngan kuan nih motor a remhtu ngakchia pakhat a khen caah a nunnak a liam, pakhat hliamhma a pu,” tiah a chim. A nunnak a liammi ngakchia pakhat le hliamhma pumi hna hi kum 16 tluk ngakchia an si. Hriamngan kuan nih Tuluk motor pakhat le SAC ralkap motor pakhat a khen ve hna, tiah mithmutu motor khal pakhat nih a chim.

Kahdohnak a chuah lioah Tuluk le Myanmar ramri gate cu an kham hna nain, zaanlei in cun motor lutchuak hna cu an kalter ṭhan hna, tiah tualchung mi hna nih an chim. Cu kahdohnak hmunram cu Pyituhsit, KIA, TNLA, MNDAA, SSPP/SSA hna an cawlcanghnak hmunram a si, tiah tualchung mi hna nih an chim.

Mayangone No. 3 Sang Chung Inn Vialte Cu SAC Ralkap Nih Nithum Chungah An Ṭhialter Dih Hna, Yangon ramṭhen, Mayangone No. 3 sang chung, Kanthar Zeyung lam um inn 100 leng cu mah hmunhma a si lomi hmun ah sakmi a si tiin SAC ralkap, sipin le penguk zung hna nih an kan ti i nithum chungah ṭhial dih dingin nawl an kan pek, tiah sang chung a ummi pakhat nih a chim.

“Mah hmunhma a si lomi hmun ah sakmi inn an si hrimhrim lo. Cheukhat cu innhlang in a ummi zong an um i cheukhat cu an har caah inn a pawnmi zong an um. SAC ralkap nih minsen an kan thutter i zeiruang ah dah kan thut lai tiin kan hal hna zong ah an chim duh lo, a hro tuin a kan hrocer. A hnuah kan mah hmun a si lomi ah sakmi inn a si tiah tialmi catlap cungah minsen a kan thut termi cu an kan hmuhsak,” tiah a chim chap.

Nawl kan chuahmi nan zulh lo ahcun upadi ning in kan in tawlrel hna lai. Nithum chungah nan inn nan ṭheh hna lo ahcun kan hrawh dih lai an kan ti, tiah sang chung a ummi pakhat nih cun a chim. Mingalardone peng, No. 5 sang ah a um mi inn 10,000 tluk zong SAC ralkap nih a cozah hmunram a si tiin sangmi hna cu a tlai bik November 18 hlan ah nan ṭhial dih lai tiah SAC ralkap nih nawl an rak pek cang hna tiah theih a si.

Chin Natinal Front-Headquarters Nih Ngaihchiatnak Cathanh An ChuahChin National Army(CNA) nih CNA Bawi Lalrotluang a nunnak a liamnak cungah ngaihchiatnak cathanh an chuah, tiah theih a si. An cathanh chungah CNA Bawi Lalrotluang cu ralhmai a kalnak hmun pakhat ah November 15 ah, amah biakam bang in Chinram zalennak hmuhnak ding le kan miphun covo hmuh ṭhannak ding ca ah ram le miphun ca ah a nunnak a pek, tiah an langhter.

Ram le miphun ca ah a nunnak a pekmi cungah upatnak kan pek i, a tantakmi a chungkhar zong kan biak Pathian nih lamhruai hram ko hna seh. Bawi Lalrotluang, zungzal in na rianhmi na biak Pathian ṭangnem ah lungdai hnangam tein i din cang, tiah CNF/CNA nih cathanh an chuah.

Myanmar Ram In Aa Thawhmi Rohingya 100 Leng Indonesia Rili Ah Tlaih An Tong, Myanmar ram nitlaklei in tilawng in a kalmi Rohingya ngakchia 22, nu 36 le pa 61 cu Indonesia ram an phanh ah Indonesia nawlngeitu hna nih an tlaih hna i Bluka Teubai khuate ah an chiah hna, tiah theih a si.

Indonesia nawlngeitu hna nih, Rohingya miphun hna hi Myanmar ram in a rami an si ṭheu lai, tiah an zumh. A luancia March thla lio zong ah Rohingya 114 cu Aceh ramkulh Bireuen pengkomh pawngah an rak tlaih cang hna. A luancia 2017 August ah Myanmar ralkap nih rallam an ral sial caah Rohingya minung a sing in Bangladesh ram ah an rak zam. Cu ruangah Rohingya mi hna cu Muslim biaknak phung a biami ram hna ah harnak phunzakip tuar in pawcawmnak ruah ah a kalmi an si, tiah theih a si.

Be the first to comment

Leave a Reply

Your email address will not be published.


*