Mi Vaivun British cozah nih a ralthat tuk ruangah, upatnak le minthatnak Medal pasarih tiang an pekmi, Ralbawi Thompson nih a Medal vialte cu £150000 in a fale caah a zuar. Cucu zeiruang ah dah na zuar? tiah biahalnak an tuah tikah: “A dongnak ahcun mi nih pekmi minthatnak le upatnak hna cu biapi an rak si lo; ka fale caah patling si khawh tu hi biapi bik a rak si” tiah a leh hna.
Vawlei cung milianngan le minthang tampi nih an palh ciomi pakhat cu “an nupi fale nih an herh bik hna lio caan ah chungkhar hnu chit in vawlei ah an buai i vawlei ah buainak thazaang an ngeih ti lo hnu ah, hnu an chitmi an chungkhar cu an hun hawih i fakpi in caan pek pei an hauh hi, timi an hmuh colh. Nain cu ahcun caan pek nih man a ngei kho ti lo; a tlai tuk cang!
Cu ruang ahcun, mirum le minthang tampi nih “ka no lio i ka nupi fale he caan tam deuhpi ka rak hman lo mi kha kaa ngaichih” tiah an tar lei ah an ti cang. A cheu cu Pathian rian le pawcawmnak rian i an buai ruangah an nupi fale hnu an chit bak hna! A cheu cu fim cawnnak ah an buai i an nupi fale hnu an chit bak hna! Buaipi awk cu tampi a um ko; a um peng fawn ko lai.
Sihmanhsehlaw zei bantuk thil hmanh “nupi fale hnu chit phah tiang in buaipi awktlak a um lo” ti cu hi ralbawi pa bia nihhin a fianter ngaingai. Kan tlaunak in kir cio cang hna usih. A dongnak ahcun zeidang vialte nak in a biapi bikmi cu chungkhar hi a rak si ko. Zeitluk in lengah mi nih ttihzahmi le upatmi si zongah, nupi fale nih Patling an ti khawh lomi pa cu rian a ttuan peng ve nain hlawh a hmu ve bal lomi mivaivuan a si. Hrambik Lian
Thil hmete ngan tuk in buaipi sual fawi, Nizan nai ah, Laimi tampi an umnak US ram Maryland state ah mipa pakhat nih an inn tangttuang le vawlei karlak ah a ummi rul pawl cu meikhu in ka tthawl hna a tinak ah US dollar 1,800,000/- {1.8 million} man an innpi cu ciam rup in a khangh sual ai.
Hi an inn umnak hmun hrawng hi rul nung le saram hnophnap pawl zuarnak hmun a si caah an inntang ttuang le vawlei karlak i Rul um, timi hi an caah thilmak le thil ttihnung tuk a si lem lo. Hmun thur phun khat bantuk men khi a si ko; buainak nangpi a si lo, an caah. Sihmanhsehlaw cu thil hmete cu ngan tuk luammam in a buaipi caah an chungkhar caah a lian ngan bikmi rosung an innpi cu a khangh sual diam ai!
Kan upa pakhat cu a kee dong karlak ah cangvat nih a seh; awl zaang tein a kut in hei lak men ding si komi khi, a kee cungah fak taktak in chai in a chaih caah a kee tin tiang a tlongh phah! “Thil hmete a simi fak tuk in buaipi hman hi thil liannganpi tlohnak a si” {HBL}.
Kan miphun nih thil hmete te kongah nganpi le fak tuk in buainak ser kan zuam ahcun, kan tinhmi le saduhthah ngan bik a simi “Teinak Aalan” {Victory Flag} pi lam ttim hlan ah mei in kan kangh ve sual te ko lai. Cucaah kan tumtahmi thil liannganpi lawng zoh in kal i lam kiangkap ah a ummi cangvat, rul le zuubui luklak kongah fak tuk in buai caan pek lo hi a biapi ngaingai. Cangvat le Rul Luklak ruangah Kan Inn khang hna Hlah usih! Lawmhnak he, Hrambik Lian
Leave a Reply