Matupi le Hakha Karlak Kahdohnak Fak Piin A Chuak Than Cang Hih

Thawngthar: Khah Matupi le Hakha Karlak Kahdohnak Fak Piin A Chuak Than Cang Hih
========

Matupi le Hakha Karlak Kahdohnak A Fak, Ralhrang Nih Khuami 7 Ralphaw Ah An Hman Hna Chin ramkulh Matupi le Hakha lampi nitlak lei ah a ummi Ki Hlung khua le Lung Hlaw khua karlak ah thazaang tampi he a ra mi ralhrang hna cu Chin Chinland Defense Force phu 3 hna nih Jan 6, zinglei 9 le minutes 15 am in an kah hna i Jan 7, zinglei tiang an i kap.

Kahdohnak cu a fak chin lengmang i ralhrang nih khuatlawng mi 7 hna cu an tlaih hna i ralphaw ah an human hna tiah Chinland Defense Force Matupi nih cathanh an chuah. Chinland Defense force Matupi in chimnak nawlngeitu nih “Nizan khan kan i kap i zan tiang a si ko, atu tiangah kahdohnak a fak chin lengmang, atu zong kan i kap cuahmah ko.

Ralhrang lei hi thazaang 150 renglo an si i ralhmai hmunhnih in an kan kah. Kahdohnak a fak ngai. Chinland Defense Force lei a thimi kan um rih lo. Ralhrang lei cu a thimi an um len ko. Hmunhma zohfelnak kan tuah khawh rih lo caah a zat kan chim kho lo” tiah a chim.

Ralhrang a kaptu CDF hna cu Chinland Defense Force Matupi, Chinland Defense Force Zotung le Chinland Defense Force Lautu hna an si. Nizan ah khan Ki Nung khua in Lung Hlaw khua lei ah a kalmi mi sawhsawh 7 cu ralhrang nih an tlaih riangmang hna i ralphaw ah an hman hna i Jan 7,

Zinglei tiangah an thlah rih hna lo tiah theih a si. laknak Chinland Defense Force Matupi Page Khet Thit Media . Jan 4 zongah khan Matupi-Hakha karlak ah Chinland Defense Force Matupi le ralhrang kahdohnak a um i ralhrang lei pathum an thi, cu pathum chungah pakhat cu ralbawi a si.

Thawng Dang;
Committee Representing Pyidaungsu Hluttaw Nih Cambodia Cozah Riantuanti A Sawm
=========
Cambodia cozah cu Myanmar ram mipi aiawh khotu dirhmun in a um mi phu lei ah dir ding in Committee Representing Pyidaungsu Hluttaw nih January 7 ah nawlnak cathanh a chuah. Cu cathanh chung ah cun Myanmar ram thilcang kong he pehtlaih in Myanmar mizapi nih lungtling in thim mi Committee Representing Pyidaungsu Hluttaw le

National Unity Government of Myanmar cozah hna he hmunkhat ah tangti in, riantuan ti ding ah Cambodia prime minister Hun Sen cu Myanmar ram a phanh ni ah Committee Representing Pyidaungsu Hluttaw nih theihternak cathanh an chuah.

Myanmar ram thatnak ding ca ah ASEAN hruaitu hna nih hnatlaknak thil phun 5 an ser mi cung ah nawlzulhnak a tuah lo mi Myanmar ram nawlngeihnak latu ralhrang bawi le Cambodia prime minister Hun Sen hna tonbiaruahnak ngeih cu Myanmar ram mizapi thin a linhter, tiah cu cathanh chung ah cun an langhter chih.

Myanmar ram he ram innpa simi Cambodia ram le Myanmar ram pehtlaihnak cu cuhlan ah tluang tein a rak um bantuk in kaphnihkar pehtlaihnak a thatnak ding zong ruat chih ding in Committee Representing Pyidaungsu Hluttaw nih a achim.

Thawng dang;

Loikaw khua chung minung umnak inn cung ah hriamngan a tlaak caah minung 1 a nunnak a liam i, minung 5 nih hliamhma an tuar; Hramhram nawlngeihnak latu ralhrang phu hriamngan cu Loikaw khua chung Mailung sang mipi umnak inn cung i a tlak caah minung 1 nunnak a liam i minung 5 nih faak ngai in hliamhma an tuar,

Tiah Progressive Karenni People Force nih cathanh an chuah.Progressive Karenni People Force nih nihin January 7 ah an chuahmi cathanh a si i Karenni National Defense Forse Bo 14 zong nih Loikaw Shadaw motor lampi cu umkalnak nawl kan phih chung, tiah tuzing zinglei ah emergency in cathanh an chuah cang.

Mizapi humhimnak ding ca ah le ralhrang phu dohnak ding ca ah Karen Army, Karen National Ddefense Force phufonh hna nih Loikaw Shadaw motor lamthluan cu January 7 in January 13 tiang umkalnak nawl an phih chung.

Cun caan karlak thil sining zoh in a herh ahcun lam phihkhar caan kan sauh rih lai, tiah an cathanh chung ah cun an langhter chih.