Matupi in Mindat lei ah nihin zing suimilam 11 hrawngah rallokap mawtaw pahra,mawtaw ngan(Kungtinka) pahnih in rallokap va bawmh dingin an i thawh tiah Matupi khuami sinin theih a si.
Matupi ah rallokap nih minung citmi Saikel an chuh hna tiah theih a si
Mindat ah mino hleinga(15) an tlaih hna i,ralhrang nih an hman hna caah Matupi khua mino zong tlaihkhih ton sual nak hnga lo i ralrin dingin mino pakhat nih ralrin nak a pek hna. Cred : The Chin Post
Relchap : NUG bawmhnak rianrang in kan herh ko tiah CDF Mindat nih an chim
Ralhrangbu nih Van le Vulei lei he Minung 1000 hrawng nih Mindat cu Miakpi he an kah lio ah NUG nih dai tein a um ding a si ti lo, zeimaw bawmhnak pek dingin an i zuam ding a si tiah CDF- Mindat hruaitu pakhat nih a chim.
“NUG cozah hi a tu zeidah a tuah ti hal ka duh, kan khuapi cu ralhrangbu nih meithal ngan le Miakpi hna hmangin an kan kah cuahmah lio ah dai tein an um ding a si lo, an ti khawhmi zawn in a kan bawmh ding a si” tiah CDF-Mindat hruaitu pakhat nih a chim.
Ralhrangbu nih nizan ah Kyaukthu Airport ah rallokap 200 leng, Matupi leiin 400 hrawng, Nichuah leiin 400 hrawng, an dih lak 1000 hrawng thazaang an i chap i Mindat cu kah an kan timh caah i kahnak fak ngaiin a chuak te men lai.
Mahtin a si caah NUG nih Pengkip ah a fonh mi PDF pawl a cawlcanghter a hau cang, cu lo ahcun Mindat cu a fak ngai lai tiah a ti.
“PDF pawl cawlcanghnak khua zeihmanh kan hmuh rih lo, Pengdang zong nih an cawlcang ve si ahcun Mindat ah mah zat zat hi an i pum khawh nak ding a um lo” tiah a chim chap.
Mindat CDF le ralhrangbu i kahnak ah CDF lei 7 an nunnak a liam cang i a tu ralhrangbu lei cawlcangh ning zoh ah i kahnak zong a fak chin chin dingah ruah a si.
April thla Mindat i kah nak a um hnuah khuapi chung mipi zatceo hrawng cu an himnak kawl in an zaam cang, a cheu tluk cu khuapi chung an tap lio a si. A tu hi Meithal ngan hi khuapi chung an kah cuahmah i thil rawk mi tu cu fiangfai in theih a si rih lo tiah theih a si.
The Chin Post
Leave a Reply