National Security Council Director-General Datuk Rodzi Md Saad Nih Malaysia UNHCR Zung Hi An Khar Awk A SI A Ti Cang: Malaysia ram, National Security Council Director-General Datuk Rodzi Md Saad nih Malaysia hrambunh United High Commission for Refugees (UNHCR) zung hi an khar awk a si tiah ruahnak a cheuh cang hna tlah theih a si.
Harian Metro nih a langhter ning ah National Security Council (MKN) in hruaitu Rodzi nih Putrajaya (New federal administrative capital of Malaysia) cu Malaysia ram chung i refugees pawl caah ramdang lei ithlaknak le hnahnawhnak um loin kan ram (Malaysia) nih tha deuh in a tawlrel khawh a herh tiin a chim ti si.
(In English: National Security Council DG Rodzi Md Saad has proposed to shut down the UNHCR office in Malaysia so the government can better manage refugees in the country without external interference.) Documents (Hmatpungtin, Passport, stay-visa tbk.) a ngeilomi ramdang pawl cu UNHCR tan ah i dor khawh a si an ti i, document loin Malaysia ram cung lut an lung a tho,
Nawlngeitu nih biahalnak an tuah tikah, UNHCR card lawng an kan chuah piak an ti ti si. Rodzi nih a chim rih mi cu, cu bantuk thil a cangmi cu, “Kanmah (Malaysia) caah phunglut a si lonak, UNHCR lei zong nih ram nawlngeitu hna he ceihttinak ngeih in riantuantti a um lomi hi Malaysia ram zeirel lo bantuk a si” tiah a chim ti si.
MKN nih Malaysia ram chung refugees pawl kong tawlrel ding in aa tlakmi cawlhcanghnak a kawl cuahmah lio a si tiah Rodzi nih a chim chih i, cu riantuannak thok khawh ding le a tlamtlin khawh ding ah time schedule suaimi a um rih lo tiah a chim chih ti si.
Malaysia ram chung a lutmi document (Hmatpungtin, Passport, stay-visa tbk.) a ngeilomi pawl le refugees pawl kong tawlrel khawhnak nawl ngeih ding ah “ramdangmi ithlak khawh lo ding in program draft pakhat timhtuah a si cang. Nain kanmah sinah a thami management a um rih hlan lo, cucu kan tlamtlinter kho rih lai lo” tiah amah nih thawngfianhnak ah a chim chih ti si.
Cucaah Putrajaya (New federal administrative capital of Malaysia) cu mah nawlngeihnak in refugees pawl caah tha tein a tawlrel piak khawh nakhnga, a herhmi a ruang pakhat a si i, an rian tlamtlinter khawh ding ah MKN le a dang a riantuanti Agency pawl nih an tawlrelpi a herh tiah a chim chih fawn.
Defense Minister Hishammuddin Hussein hruaimi Vuanci Tthanah level Committee nih cucu a tawlrel khawh lai tiah Rodzi nih a chim tiah theih a si. Zalen nih Free Malaysia Today chirhchan in a tialmi aa tlak ning in lehchinmi a si.
Relchap, Myinchain Peng Ah PDF Nih SAC Mawtaw Bomb An Puahhnawh I, Ralkap 3 An Thi: Mandalay ramṭhen, Myinchain peng Htisaung(ထီဆောင်း) le Kanpya(ကံပြား) khua kar ah SAC ralkap mawṭaw pakhat cu nihin september 8 zaanlei suimilam 2 le cheu hrawng ah tualchung hriamtlai phu nih bomb an puah hnawh hna i SAC ralkap 3 an thi, tiah ZERO pah-kah-phah phu nih cathanh an chuah. Cu kahdohnak cu Myinchain ZERO pah-kah-phah phu le ZERO POWER tualchung hriamtlai phufonh hna nih an tuahmi si, tiah theih a si.
CDF Paletwa Kut Ah A Ummi SAC Ralkap Sin Thawngpetu Pakhat Cu A Nunnak A Liam!, SAC ralkap sin thawngpetu pakhat cu tlaih a ton lio ah damlonak/zawtfahnak in a nunnak a liam caah a chungkhar he biaruahnnak kan ngei lai, tiah CDF-Paletwa nih cathanh an chuah. Paletwa peng Wading(ဝါဒိန်) khuakomh, Wading(ဝါဒိန်) khua in SAC ralkap sin thawngpetu Pu Aa Khai(kum 65) cu CDF-Paletwa nih an tlaih i an hren lio, August 19 ah a thi, tiah theih a si. Pu Aa Khai cu thabat/thawvamh zawtnak a rak ngeicia mi a si, tiah an ṭial. Tlaih a ton hnu i a thih caah Pu Aa Khai a chungkhar he i caihhmainak le biaruahnak kan ngei lai, tiah CDF-Paletwa nih nihin September 8 ah cathanh an chuah.
Pu Aa Khai cu CDF-Paletwa nih cawlcanghnak a tuahmi kong ah SAC ralkap sin thawngpeknak a tuah caah, 2021 June thla chung ah voikhat, 2022 January thla chung ah a voi hnihnak tiin ralrinnak pek a rak si cang nain, SAC ralkap sin thawngpek a ngol hlei lo, tiah an chim. July 13 ah CDF-Paletwa nih an tlaih nain July 16 zaan ah a zaam, July 17 ah an tlaih ṭhan i, a ngandamnak ding caah felfai tein zohkhenh a si ko nain, July 19 zinglei ah a thi, tiah CDF-Paletwa nih fianhnak an tuah. Pu Aa Khai a chungkhar sin ah pehtlaihnak tuah kan i zuam nain, Paletwa pengchung ah SAC ralkap nih phone line an thah caah pehtlaihnak kan tuah kho lo, tiah CDF-Paletwa nih an langhter.
Karenni Ramkulh In September thla zarhkhatnak Chung Kahdohnak Ah SAC Ralkap 18 An Thi, Karenni ramkulh in September thla zarhkhatnak chung kahdohnak ah SAC ralkap 18 an thi, tiah KNDF nih nihin September 8 ah cathanh an chuah. September thla zarhkhatnak chung ah SAC ralkap hna cu Demoso le Hparuso ah minung thazaang chap in rallam an sial i, motor run in riahcaw thiar khawh an i zuam, tiah KNDF nih an langhter.
Pekhon(ဖယ်ခုံ) pengchung zong ah Pinlaung(ပင်လောင်း) in SAC ralkap motor 40 cu Pekhon hrambunh battalion ah thazaang an chap i, atu cathanh chuah tiang ah Moebye(မိုးဗြ) ah fak ngai in kahdohnak a chuak, tiah an langhter chih.
Demoso peng in Hparuso peng ah riahcaw a phortu SAC ralkap motor 5 cu September 3 zinglei suimilam 4:30 hrawng ah KNDF B-15 nih a thlithip in an kah hna i SAC ralkap motor pakhat a rawk, ralkap 3 an thi, motor dang hna cu hnu an tolh tiah theih a si. Cu ni zaan lei ah cun Hparuso peng Htitawku(းသော်ကူး) khua pawng umhmun khuarmi SAC ralkap hna cu KNDF-B15 nih a kah ṭhan hna caah SAC ralkap 2 an thi ṭhan.
September 4, chunhnu ah Hparuso peng Htipawso(းပေါ်ဆို) le Dawngekho(ဒေါညေးခူ) khua ah umhmun a khuarmi SAC ralkap hna cu Karenni ralkap KA, KNDF/B-4, B-5 le B-15 phufonh nih an kahdoh hna caah SAC ralkap 6 an thi. Cun KNDF B-15 nih Hparuso peng, Kadala(ကဒါးလား) khua pawng umhmun khuarmi SAC ralkap cu an kah ṭhan hna caah ralkap 2 an thi ṭhan, tiah theih a si.
Demoso peng Ngwaytaung(ငွေတောင်) khuathar pawng ah rallam sialtu SAC ralkap hna cu KA le KNDF B-10 phufonh nih an kahdoh hna caah kaphnih kar kahdohnak suimilam 4:00 hrawng a chuak i, cu kahdohnak ah cun SAC ralkap pakhat a thih lengah hliamhma tuar an tam, tiah theih a si. Kahdohnak ah cun SAC ralkap hriamnam zeimawzat kan lak, tiah KNDF nih an langhter.
September 7, Bawlakhe(ဘောလခဲ) le Yuatit khua kar lampi cung, SAC ralkap meng 12 sakhan pawng ah Rua saam ding in a chuakmi SAC ralkap hna cu KA, KNDF B-21 nih an kahdoh hna i SAC ralkap 3 an thi, 2 cu fak ngai in hliamhma an tuar leng ah hriamnam zeimawzat an lakpiak hna, tiah theih a si.
Pekhon(ဖယ်ခုံ) pengchung ah September 3 ah khan Kungsone(ကုန်းဆုံ) khuakomh phungki biakinn tlang cung ah umhmun a khuarmi SAC ralkap hna cu KA, KNDF B-3, B-9, B-11 phufonh nih an kahdoh hna caah SAC ralkap pakhat a rak thi. Karenni tuanbia chung ah le khuapau dohthlennak caan chung ah Karenni ramkulh chung in nunnak a liammi ralkap dihlak cu nihin September 8 Martyr’s Day ah upatnak sang bik kan in pek hna, tiah KNDF nih an cathanh chung ah an langhter.
Kalay in Yangon Lei A Zuangmi Vanlawng Ticket Man Cu Ks. 20,000 Leng In A Kai, SAC ralkap le tualchung hriamtlai phu kar kahdohnak a fah lengmang chin ruang ah vanlawng lam cu khualtlawng mi tam deuh nih hman a si caah, a hlan nakin Kalay in Yangon a zuang mi vanlawng ticket man cu Ks. 20,000 a kai. Sinain, Yangon in Kalay vanlawng cuan man cu an kai lo, tiah theih a si.
Kalay in Yangon kalnak vanlawng ticket man cu cuhlan ah a sangbik Ks. 163,000 hrawng a si tawn nain, nizaan September 7 in cun singhnih (200,000ks) tiang a phan. Yangon in Kalay kalnak vanlawng ticket man tu cu Ks. 138,200 in an zuar, tiah theih a si. Kalay in Yangon, KBZ vanlawng ticket hi cuhlan i a man fak bik lio ah Ks 165,000 a rak si nain, atu ah cun Ks. 185,000 a phan cang. Yangon in Kalay lei cu a hlan ah a sangbik Ks. 172,000ks a si i, atu ah cun Ks. 197,000 a phan, tiah theih a si.
Atu bantuk in vanlawng ticket man a kainak kong he pehtlai in vanlawng ticket zuartu pakhat nih cun dollar man a kai tuk caah vanlawng oil man zong a kai i, ticket man a kainak a si, tiah a chim. Thanlwin airlines cu September 10 in aa din cang lai tiah theih a si. Kalay in Yangon vanlawng ticket leng ah Monywa-Homalin vanlawng ticket man zong cu hlan ah cun Ks. 118,000 a rak si nain atu ah cun Ks. 138,000 ah an kai, tiah theih a si.
Leave a Reply