Malaysia ah Kawlram mi riantuantu tam taktak an tlaih chap hna!!

Malaysia Ram Ah Myanmar mi 100 Leng An Tlaih Hna!
=============================
Jabatan Imigresen, Malaysia ah August ni 9 ah ramleng in phungning loin a lutmi an tlaihmi hna chung in Myanmar mi zeimawzat an i tel, tiah Malaysia Gazette thawngthanhnak nih an langhter. Malaysia ram Jalan Reko Stop ah ramdang mi 425 cu chekhlatnak an tuah hna i, minung 175 an tlaih hna. Cu chung ah cun pa 132, nu 41 le ngakchia 2 an i tel, tiah theih a si. An tlaihmi hna chung ah hin Myanmar mi 115, Indonesia 33, Bangaladesh 13, Nepal 9, Sri Lanka 4 le India in minung pakhat an si, tiah theih a si.

Relchap, Tedim Peng, Laitui Khuami Pakhat Cu Bomb I Lamhsualnak In Hliam A Tuar! Chin ramkulh, Tedim peng, Laitui khuami pakhat cu ti lam ser ding in a kalnak lam ah August 8 ahkhan bomb hmanhmi i lamhsualnak in hliamhma tuar, tiah tualchung mi pakhat nih a chim. Laitui khuami Salai Kam Za Hmung kum 40 cu fur caan ah a rawk lengmang mi an ti ratnak lam ser ding in a kal lio ah bomb i lamhsualnak in a kee ah hliam a tuar, tiah khuami pakhat nih a chim. Cu bomb cu mi zei phu nih an hmanhmi a si zong kan hngal lo, kan umnak lei ah cun kahdohnak zong um lo, tiah a chimchap.

Laitui khuami pakhat nih bomb aa lamhsualnak kong he pehtlai in SAC ralkap lei media, Fifty Two News nih cun, Sia kawl ah a kalmi khuami pakhat cu CDF nih an hmanhmi bomb aa lamh caah hliamhma tuar, tiah an thanh. Laitui khua cu Tedim peng, inn 1000 hrawng umnak khua a si i, Laitui khuami nih bomb an i lamhsual hi a voihnihnak a si cang. A luancia July thla ah khan Sia a kawlmi pa pahnih cu bomb an i lamhsual caah pakhat cu a nunnak a liam i, pakhat cu a kee bul leng ah a mit zong a rak hliamh chih, tiah theih a si.

KNU Brigade 5, Hpapun Pengkomh Chung Kahdohnak Ah SAC Ralkap 13 An Thi, KNU brigade 5, Hpapun pengkomh chung in August 2 in August 6 tiang ah kahdohnak voi 12 a chuak, cu kahdohnak chung ah cun SAC ralkap 13 an thi i, 6 hliamhma an tuar, tiah KNLA nih an thanh.

Brigade 5 hmunram ah hmunhma lonh in a lutmi SAC ralkap le KNLA kar nitin ngawt in kahdohnak a chuak i, ni 6 chung kahdohnak ah KNLA lei hliamhma tuarmi an um lo. KNLA lei nih SAC ralkap vawlei cawhnak seh pakhat an hrawhpiak, tiah theih a si. KNU brigade 1 hmunram, SAC ralkap le KNLA kar kahdohnak zong ah SAC ralkap hmanmi thilri le hriamthil zeimawzat cu KNLA nih an lak, tiah theih a si. Demoso Peng Ah Khuami Pawl Cu An Khua Chauhtak Ding In KNDF Nih Thawng An Thanh Hna!: Karenni ramkulh, Demoso pengchung ah SAC ralkap nih umhmun an khuarnak khuami pawl cu an khua chuahtak ding in KNDF nih August ni 9 ah thawng an thanh hna.

Demoso peng ah KNDF le SAC ralkap kar kahdohnak nitin ngawt in a chuah caah KNDF battalion 1, 5 le 6 nih khuami pawl cu ralrin peknak thawng an thanh hna. An thawngthanh ning ah cun SAC nih umhmun an khuarnak ah um lo ding, SAC he naihniam in rianṭuan lo ding le a dangdang pawl zong tuah lo ding ti a si.

Thura U Aung Ko Cu A Lung Zawtnak A Dam Deuh Lo Caah Insein Sizung Ah An Zohkhenh, Kum 7 thongthlak ding in biakhiahnak tuahpiak mi, NLD chanlio Ministry of Religion and Culture minster, Thura U Aung Ko cu a lung zawtnak a dam deuh lo caah Insein sizung ah August 8 ah an thlopbul, tiah theih a si. Thurah U Aung Ko cu a lungtur a ran tuk caah Insein sizung ah zohkhenh in an thlopbul, tiah min langhter a duh lo mi Insein sizung rianṭuantu pakhat nih a chim.

NLD cozah chan lio Religion and Culture minister, Thura U Aung Ko cu SAC ralkap nih uknak an lak hnu ah sualphawtnak phun thum in taza an cuai i, kum 12 thong thlak ding in biakhiahnak an rak tuahpiak. 2022, April thla ahkhan SAC chairman Min Aung Hlaing nih thong a tlak ding kum a zat ceo cu a ṭhumhpiak, tiah theih a si. Thura U Aung Ko thong thlak ding in sualphawtnak an tuahmi cu Union Supreme Court nih August 9 ah a hnon, tiah theih a si.

Demoso Peng Ah Khuami Pawl Cu An Khua Chauhtak Ding In KNDF Nih Thawng An Thanh Hna!: Karenni ramkulh, Demoso pengchung ah SAC ralkap nih umhmun an khuarnak khuami pawl cu an khua chuahtak ding in KNDF nih August ni 9 ah thawng an thanh hna. Demoso peng ah KNDF le SAC ralkap kar kahdohnak nitin ngawt in a chuah caah KNDF battalion 1, 5 le 6 nih khuami pawl cu ralrin peknak thawng an thanh hna. An thawngthanh ning ah cun SAC nih umhmun an khuarnak ah um lo ding, SAC he naihniam in rianṭuan lo ding le a dangdang pawl zong tuah lo ding ti a si.

Sagaing Ramṭhen, Ayardaw Peng Kahdohnak Ah PGC Hruaitu Telh In PDF 8 Nunnak A Liam, Sagaing ramṭhen, Ayardaw pengchung kahdohnak ruang ah People’s Guerillas Commando(PGC) – Myinmu hruaitu telh in PDF 8 an nunnak a liam, tiah August 8 ah People’s Guerillas Commando – Myinmu nih an ngaihchiatnak an langhter.

Ayardaw peng, Kanyin(ကန်ရင်း) – Malayta(မလဲသာ) khua pawng i a cang mi, August 4 kahdohnak ruang ah People’s Guerillas Commando – Myinmu hruaitu le PDF chungtel hna cu an nunnak a liam, tiah theih a si. “Nunnak a liammi People’s Guerillas Commando – Myinmu phu chungtel hna caah kan ngaihchiatnak langhter in, a sangbik upatnak kan in pek hna” tiah an mah he ṭangrual phu Mungyo(မိုးညို) dohthlennak tuahtu phu nih an langhter. August thla thawk ka ahkhan SAC ralkap 100 rual hrawng nih vanlei kahdohnak an tuah i, Ayardaw le Myinmu pengchung khua hna cu luhhnawh in kherhhlainak an tuah caah tualchung hriamtlai phu hna he August 4 ahkhan fak ngai in an rak i kap.

Kaphnih kar kahdohnak ah PDF chungtel nunnak liammi an um leng ah, hriamthil zeimawzat kan lakpiak hna, tiah SAC ralkap Media hna nih an langhter. SAC ralkap hna nih Ayardaw le Myinmu pengchung ah innlo hna cu meikhangh in an hrawh caah thilri mansung tam tuk a kaang, tiah tualchung mi nih an chim. Karenni Ralzaam Camp Cu SAC Ralkap Nih Vanlawng In Bomb An Thlak!: Karenni ramkulh, Loilinlay (လွိုင်လင်‌လေး) nichuah lei ralzaam umnak camp cu SAC ralkap nih nihin August 9, zinglei suimilam 11 hrawng ah van lei in bomb an thlakhnawh hna, tiah tualchung mi nih an chim.

“Kaphnih kar kahdohnak a chuakmi zong um lo in, SAC ralkap lei nih vanlei in bomb an thlak i, kahdohnak an tuah caah ralzaam camp sianginn ah a ummi, ngakchia hna cu ramlak lei an zaam hna. Loilinlay (လွိုင်လင်းလေး) nichuah lei ralzaam camp ah cun ngakchia za reng lo an um, tiah PDF chungtel pakhat nih a chim.

Chaung U Ah SAC Ralkap Pawl Cu PDF Nih Bomb An Puahhnawh Hna I, Ralkap 12 An Thi! Sagaing ramṭhen, Chaung U ah SAC ralkap hna cu Chaung U People Defense Force(CHUPDF) nih bomb an puahhnawh hna i, SAC ralkap 12 an thi, tiah nihin August 9 ah CHUPDF nih cathanh an chuah. Nizaan August 8 ah Monywa pengkulh, Chaung U lamṭhen in a kalmi SAC ralkap hna cu, Kinmon (ကင်းမွန်) khua an phak ah CHUPDF nih voi 6 tiang bomb an puahhnawh hna pin ah meithal in an kah hna. Cu kahdohnak ah cun SAC ralkap 12 an thi i, midang 33 hliam an tuar. CHUPDF lei cu hliamtuar um loin hnu kan tolh nain kan bomb lung 16 cu SAC ralkap nih an kan lakpiak, tiah an cathanh ah cun an langhter.

Cu bantuk ṭhiam in Mandalay ramṭhen, Tapeihkyin (သပိတ်ကျင်း) peng ah, tuzing August 9 Sml 11:10 hrawng ahkhan Ayarwaddy tiva ah SAC ralkap riahcaw a phortu tilawng 6 hna security lakpiak ding in a kalmi SAC ralkap motor 3 cu Shiataw(ရှားတော) khua le Shwekyunpin(ရှေကျွန်းပင်) khua kar ah PDF nih bomb lung 7 in hmunthum ah an puahhnawh hna i, SAC ralkap 5 an thi, tiah theih a si.

Natogyi Khua, Sakremhnak Zung Ah A Ummi SAC Ralkap Cu Hriamngan In Kah An Ton Caah Ralkap 4 An Thi: Mandalay ramṭhen, Minchan pengkomh, Natogyi(နွားထိုးကြီး) khua, sakremhnak zung(construction office) ah chinlung a chuih mi SAC ralkap 12 cu, August 7 zanlei sml 5:00 hrawng ah hriamngan in PDF nih an hna caah ralkap 4 an thi, midang 5 hliamhma an pu, tiah Natogyi PDF nih an thanh.

“Tatma 99 tang ah a ummi ralkap 12 cu, chinlung an chuih lio ah hriamngan in kan kah hna i, ralbawi pakhat telh in 4 cu a hmun ah an thi colh. Bo thum pa le ralkap pakhat hi Myaikhtilar sii-inn ah an chiah hna,” tiah NPDF in ṭuanvo ngeitu nih a chim. Kah an ton hnuah SAC ralkap pawl cu khua kiangkap ah sentari an cawngh ter hna.

Khuapau dohthlennak hi rianrang tein tei nan duh ahcun thazaang tampi in kan pe u, tiah Natogyi PDF nih forhfialnak an tuah. Mansi Gyi Khuami Pakhat Cu Shanni Nationalities Army(SNA) Nih An Kahthah!: Banmauk peng, Mansi Gyi (မံစီကြီး) khuami pakhat cu “PDF he pehtlaihnak na ngei” tiah puh in, Shanni Nationalities Army(SNA) nih an kahthah. Nizaan August 8 zaanlei sml 3 hrawng ah kum 30 hrawng a simi Ko Kyaw Thet cu dawr thilri a cawk lio ah SNA nih an kahthah i, nihin August 9 ah a ruak hlam ding in an kan chimh, tiah Banmauk Revolution-BR in tuanvo ngeitu pakhat nih a chim.

“Mansi Gyi khua ah SNA cu an ra i minung pakhat cu an tlaih. “Ko Kyaw Thet khoika dah a um” tiah tukvelh buin an tlaih mi pa cu an hal caah Ko Kyaw Thet umnak ah cun a kalpi hna. Ko Kyaw Thet cu a zaam i, a ke ah meithal in an kah hnu ah motor cung ah an khin i an kalpi. Tuzing ah cun a ruak hlam ding in a kan chimh ṭhan, tiah BR in ṭuanvo ngeitu pakhat nih cun a chim chap.

Be the first to comment

Leave a Reply

Your email address will not be published.


*