Lungvar/Hring Phormi SAC Ralkap Motor Bomb Puah An Ton Caah Ralkap 3 Nak Tlawm Lo An thi

Myintkyina-Mandalay lam thluan in lungvar phormi SAC ralkap motor 65 cu, Mandalay ramṭhen Takaung(တကောင်း) peng, June 15 ah bomb puah an tong i SAC ralkap 3 nak tlawm lo an thi, motor pakhat a kaang, tiah Takaung PDF nih June 17 ah an langhter.

Motor pawl cu Sagaing ramṭhen Htichaik(ထီးချိုင့်) khua lonh Takaung he meng 5 hlatnak ah bomb kan puahhnawh hna, tiah Takaung PDF ṭuanvo ngeitu nih a chim.

“Thawng kan theih ning ahcun motor 28 an rak ṭum. Kanmah lei a rami hi motor 65 an si. Htichaik khua lonh Myataung(မြတောင်) lam tonnak ah SAC ralkap nih an hngah. Cu ralkap pawl nih an zulh chap i a si men lai, an tam deuh. Motor run 20 nak ah bomb kan puah hi a si. An kan kah ve ko nain a thimi le aa hliammi um loin kan kir kho,” tiah a chimchap.

Motor run pawl cu Sagaing ramṭhen, Inntaw le Htichaik kar ah June 15 zinglei ah voikhat bomb in kan rak puah hna. Zanlei sang ah Takaung peng an rak luh lioah voi hnihnak kan puahhnawh ṭhan hna, tiah Takaung PDF ṭuanvo ngeitu nih a chim.

Zinglei bomb kan puahhnawh mi hna ah motor 3 a rawk. Takaung peng ah SAC ralkap 200 hrawng nih rallam sial in venhimnak an tuah lai, tiah thawng kan theih, tiah tualchung mi pakhat nih a chim. Cred : The Chin Post

Be the first to comment

Leave a Reply

Your email address will not be published.


*