Thantlang le Hakha cu bomb le meithal puah thawng nih a tlerh than _ September 14 2021 September 14 suimilaam 9:00PM tluk ah Hakha le Thantlang khuapi chung hmun cheukhat ah bomb le meithal a puak than tiah thawng kan theih. Khuami pakhat nih, “Hakha khua chung khoika zawn in dah a puah ti fiang in kan thei lo. A aw a than lawng si lo in a tlerh in an kan tlerh dih.
Mi zeidah an si ti zong kan thei lo,” tiah a chim. Thantlang khuapi chung zong ah bomb le meithal puah thawng theih a si. Thantlang khuami pakhat nih, “Thantlang zong ah a puak. Mizei an si kan thei lo. A puah thawng a thang. Atu tiang aa hliam mi le inn a rawk mi a um ti cu kan thei rih lo,” tiah a chim. Bomb le meithal lawng si lo in khua chung ah Drone thlah in minung ngiatthlainak zong an ngei. Hi bantuk in a tuahtu hi cu SAC lei an si ko lai tiah khuami nih an chim. The Hakha Post
yarwady bank phaisa phortu motor cungah ting 40000 (4billion),a ramh tu hna cu kan tlaih cang tiah ralhrang phu nih an langhter hnu ah, cu thil a cangmi a tuahtu hna cu khuami PDF phu an si tiah sual an puh hna. Hi ramh nak cu Pago PDF phu, peng riantlaitu Ko Myo Ko nih a tawlrel mi a si. A tu lio ah CDM bank riantuan minung pakhat le phungki minung pahnih tel in minung 7 cu tlaih in,
Checkhlatnak kan tuah hna tiah nawlngeihnak la tu ralhrang phu nih sualpuh nak cathanh a chuah. Yangon-Pago motor lampi cung September 13, ni ah motor PK le palik phu bantuk lemcang mi hna nih ramh in phaisa an chuh hna hi a si, cu thil a can nak hmunhma hi Inkataw ralhrang hmunhma he a neih leng ah, minung a chawk let mi an tlawm lo nak hmun zong a si caah ralhrang nih tha ten timhtuah nak ngei in hmanthak diklo an tuah mi a si lai tiah Pago PDF phu nih an chim. The Irrawaddy
September 12 ah Assam state, Guwahati ah Assam palek nih an tlaih mi Chin mi 26 hna kong he pehtlaihin Mizoram palek nih tha tein hlathlainak an tuah lai tiah theih a si. Mah an tlaih mi hna hi Assam palek nih an chim ningah India mi le sa si nak document lem hman in Delhi ah Bible siangin kai a tim mi an si tiah an chim.
Hi hna kong he pehtlaihin Mizoram Police, IGP (headquarters), John Neihlaia (IPS) nih; an tlaih mi hna le an ca an i put mi kong ah Assam palek sin ah phungning tein ca kan kuat cang hna. Mah lawngah upadi ningin rian kan tuan khawh lai tiah PTI news sin ah a chim. Chin mi an tlaih mi hna hi Assam palek nih thawng an theih ningin Guwahati, Muana run an i thumhnak ah an tlaih mi hna a si i, nu 10, pa 16 an si tiah theih a si.
Leave a Reply