Thantlang Dirh Ṭhan Kongah Ramkulh SAC Cozah Le Thantlang Khuanu Khuapa Meeting An Tuah
==================================================
Pur (June ) 30, 2022, cawn ninga ni ah Hakha khuapi ramkulh cozah meeting hall ah Thantlang dirh ṭhannak kong meeting an tuah i Chin ramkulh SAC CM Pu Ngun San Aung nih a telpi hna. Pu Ngun San Aung nih cun biahmaiṭhi a chim hnuah atu i an tuah liomi meeting cu Thantlang dirh ṭhannak ding kong a sinak, meeting a kaimi ramkulh zungkip ṭuanvo ngeitu hna zong nih Thantlang hi a hlan bantukin a si khawh nakhnga chimrel cio ding,
cun meeting ah aa telmi Thantlang khuanu khuapa le Biaknak lei upa hna zong nih Thantlang dirhmun le dirh ṭhannak ah a herhmi zalong tein chuahpi cio ding, a bik in ralzam hna Hakha i ṭhialkamnak kongkau ah ruahnak chim ding, cuti ralzam ṭhialkamnak ah harnak a um ahcun mawṭaw timhtuah piak an si lainak kong le Thantlang dirh ṭhannak kongah a biapi bikmi cu i zumhnak a si caah pakhat le pakhat cungah zumhnak ngeih a herhnak kong a chim.
Cu hnuah North Western Command i Deputy Commander Brigader General Myo Htut Hlaing nih Thantlang kahdohnak ruangah ralzam in a ummi hna an umnak hmunhma ah chiah ṭhannak le Thantlang khuapi a daih khawhnak dingah khuanu khuapa le Biaknak lei hruaitu hna i bawm in rianṭuanṭi a herhnak kong a chim ve. Cu khawh cun ramri runvennak vuanci Brigader General Han Win Aung le ramkulh cozah chungṭuan (Secretary) U Maung Maung San nih Thantlang dirh ṭhannak rian ṭuan khawhnak dingah zungkip i ṭuanvo ngeitu hna zong nih a hlankan in timhtuahnak ngeih chung a herhnak kong an chim ve.
Cu hnuah Thantlang lei in Rev. Dr. Lal Uk, khuanu khuapa in Pu Ngun Hram, Pu Ram Khar le Pu Lawm Bik hna nih ralzam hna an tlun ṭhan khawhnak ding le Thantlang dirh ṭhannak dingah ramkulh cozah le ramkomh cozah nih kan tuahpiak seh tiah an duhmi chimrelnak an ngei ve tiah theih a si.
Meeting a kaimi ramkulh level zungkip ṭuanvo ngeitu hna nih Thantlang ṭhanchonak caah an ṭuan cangmi, an ṭuanlio mi le ṭuan an timhmi kong chimfiannak an ngeih hnuah North Western Command Deputy Commander Brigedier General Myo Htut Hlaing nih ruahnak peknak bia a chim hnuah SAC cozah Chin ramkulh CM Pu Ngun San Aung nih meeting kharnak bia a chim i an meeting cu an donghter tiah theih a si. Crd-The Chin Post (Dr Lal Uk, Pu Ngun Hram, Ram Khar le Lawm Bik Pei Minung Ciammaam, Thantlang Serthan Nak Dingah SAC He Riantuanti Khotu an si ko ne Hi. CRd-The Thlantlang Post Nwtwork)
AAPP nih July 1, tiang cathanh a chuah ning ah Myanmar ramchung huapin SAC ralkap nih nawlngeihnak a laak ni 516 chung ah sualnak ngei lo minung 2053 thah an si cang, tiah theih a si. Tlaihkhih a tongmi dihlak hi 14,427 an si i, an thlah than mi hna 3044 an si.
SAC ralkap nih mi nunnak a laak mi hna chung ah Yagon in nunnak a liam mi tambik an si.
Myanmar ram pumpi huap July 1 nikhat chung kahdohnak ah SAC ralkap 80 an thi. PDF Pahnih an nunnak a liam ve tiah Khit Thit Media nih a langhter. Khit Thit Media nih cazin a khawmhsuat ning ah ,Sagaing ramthen, KanhBaLu ah 3, Myiang ah 5, MyinMu ah 15, MinKin ah 5, BanMoh ah 30, Mon ramkulh Yee ah 3, Magwe ramthen, Myiang ah 5, Shan- Kayah ramri, PheKone ah 7, Tanintharyi ramthen, Palaw ah 10, Kayin ramkulh LayKeKaw ah 2 tiin an dihlak 80 an thi. Sagaing ramthen, MinKin ah 1, Kayin ramkulh LayKeKaw ah 1 tiin an dih lak PDF Pahnih an nunnak a liam ve.
Shan ramkulh MoKo khua June 30 ah kahdohnak a chuak i SAC ralkap lei in minung 3 an thi tiah MNDAA chungtel a si mi pakhat nih a chim. MNDAA i a biapi mi hmunhma pakhat asi mi Maankaa khua pawng i June 30 zanlei sangah suimilam pakhat leng an i kap tiah an chim.
Hi kahdohnak ah hin SAC ralkap lei in minung pathum an thi. Kanmah lei in minung pahnih hliam hme an tuar ”tiah MNDAA nih an chim. June thla ni 16 lio zongah Muse peng um mi MNDAA battalion cu SAC ralkap nih an rak kah i lamtan in kan rak kah ve hna. Hi lio kahdohnak ah SAC ralkap lei in a thi mi zong an um kho men “tiah an chim.
Yesagyo peng um khuate hna meiduah in hrawh dingah a rak ra mi SAC ralkap hna cu lamtan in kahdoh an tong i SAC ralkap 5 an thi tiah mizapi vengtu ralkap Yesagyo peng nih an thanh. Nihin July 2 zing Sml 10:00 hrawngah mizapi vengtu ralkap – Yesakyo peng, mizapi vengtu ralkap – Myiang peng, mizapi vengtu ralkap Salingyi peng( Salingyi Special Task Force ) phukomh 3 hna le Yesagyo peng BiBa nichuah khua ah mei an duah hnu in a rak chuak mi,
SAC ralkap hna rallam hna cu BiBa nitlak an phak ah Suimilam cheuchung an i kap tiah an chim. ” SAC ralkap ralkap thazaang 70 hrawng an si. Rallam 2 in an i then i khuate hna cu mei an duah. Nihin cu mizapi vengtu ralkap phu hna kan i bawm i kan kah hna ” tiah kahdohnak ah a tel mi BO Cross nih a chim.
Sagaing ramthen, Monywa lampi, MyinMu peng, GuiPinDaw le Bu Min Kyi karlak ah SAC ralkap 50 hrawng an i cit mi ke 12 mawtaw cu mizapi vengtu ralkap hna nih July 1 zing Sml 7:50 ah bomb puah in an doh i SAC ralkap 15 an thi. Cu SAC ralkap hna an i citmi mawtaw ke 12 ngei cu MyinMu khuapi dothlennak tuahtu phu – CRF, Myiang peng mizapi vwngtu ralkap le Security phu – CDSOM, CDSOM i Tomi Fiter phu , CDOM i chaklei 007 phu,
Sagaing pengkomh Battalion 1 Tat- Khuai 2 in tat- khuai 3 – MUA, Black Eagle Myinmu Lyin Yoon Nat Phu, CRA ChaungU dothennak phu, MPTF mizapi vengtu ralkap phu hna nih bomb 2, Rokaan voi 3 in a kah i bomb lung 10 fonh in an puahhnawh hna hnu ah an kahdoh mi a si. SAC ralkap an ruak le aa hliammi hna cu a hnu mawtaw ah a ra mi SAC ralkap hna nih mawtaw cungah an tan i Myinmu lei ah ah kal.
Mon ramkulh, KyaikHtu(ကျိုက်ထို) peng AngKaBu(အင်္ဂဘို) khua pawng ah SAC ralkap hriamnam, zen-kuan le datsi phortu motor panga cu KNLA ṭangṭi phu le ThaTone pengkomh PDF Battalion 3 nih nihin July 2 zing sml 8:49 hrawng ah an kah i, motor pahnih a kaang, tiah ThaTone pengkomh PDF Battalion 3 nih cathanh an chuah.
“Nihin zing ah KyaikHtu peng AngKaBu khua ah SAC ralkap motor 5 cu, bomb in kan puah. A thimi an um le um lo kan thei rih lo. A pahnihnak motor nih hriamnam a phorh, a hnu bik motor nih datsi a phorh,” tiah KNLA Battalion 1 nih an langhter.
Hriamnam le datsi phormi motor cu atu lio kahdohnak a zualnak KNU Brigade 6 hmunram UKaRitHta camp ah,
A kal ding a si, tiah ThaTone PDF Battalion 3 nih an chim. Kahdohnak ah motor pahnih a kaang. Zing sml 10:40 hrawng ah SAC ralkap nih, kahdohnak a chuahnak hmun pawngkam cu hriamngan in an kah thluahmah. KNLA ṭangṭi phu lei in a thimi le aa hliammi an um lo, tiah theih a si.
NUG runvennak zung nih UKaRitHta camp an lak khawh lo caah KNDO, KNU le PDF cu a mawhchiat hna, tiah NUG logo in June 30 ah cathanh deu an chuahmi cu ralkap Lobby nih social media(Facebook၊Telegram) ah an langhter. “An cathanh ah KNDO, KNU le PDF in ralkap a za in an thi tiah an langhter mi cu mizapi le PDF an thinlung zornak le thachiat ternak ah an hmanmi a si. NUG runvennak zung nih a chuahmi a si lo,” tiah NUG thawng fianternak phu chungtel pakhat nih a chim.
“A hlan cathanh kan chuahmi an i laak i, mizapi sinah lih le hrokhrol in cathanh an chuah. Kannih cu kan Facebook Page in cathanh kan chuahmi cu kan langhter zungzal. Cu lawng ah a dikmi cathanh a si i mizapi nih an zumh,” tiah a chimchap.
KNDO le PDF ṭangṭi phu hna cu Thailand tangka nuai 1 kan bawmh hna. Asinain UKaRitHta camp kahdohnak ah KNDO le PDF a za in an thi, 200 leng hliamhma an pu tiah ralkap Lobby hna nih cathanh deu an chuahmi cu lih le hrokhrol a si. A thi mi cheukhat le hliamhma pu mi hna cu NUG nih kan thlopbul ko hna, tiah NUG thawng fianternak phu chungtel pakhat nih a chim.
Leave a Reply