Laitlangah Biakinn Tampi a Hrawk Tawntu Ralkap Motor Aa Let i Athi An Um

Hriamngan in an kahnak biakinn pawngah ralhrang mawtaw ai let,thi le hliam an um Hriamngan in an kahnak Biakinn pawngah ralhrang motor pakhat aa leh caah ralhrang minung pakhat a thi, minung 5 nih hliam an tuar Chin ramkulh, Kanpalet khua ah Kanpalet Baptist Biakinn hmaiah nizaan October 4, zaanlei suimilam 4:00 hrawngah ralhrang phu motor fa mi aa leh caah ralhrang minung pakhat a thi, minung 5 nih hliam an tuar tiah khuami sinin theih a si.

Ralhrang phu hna cu zaan ah security hngak ding in khuachung an rat lio ah Kanpalet Baptist Biakinn pawng lam el ah aa lehnak hi a si. Khuami pakhat nih” minung pakhat cu ahmun ah a thi colh,a dang minung 5 hrawng cu sii-inn lei ah an kal pi hna.Sii-inn zong khar a si caah zeitin dik an i conghhramh ning a si lai theih a si lo” tiah a chim. July le August thla chungah ralhrang phu hna nih khuachung hmunkip ah hriamngan in an duhnak an kah caah Kanpalet Baptist Biakinn cu hriamngan nih a rak hliam cang.

Myanmar buainak tuahremh dingah ASEAN nih zei pipa tuah khawh dawg a si lo. Atu tiang ASEAN cawlcangh ning zoh tikak lungdong a si ko. Oct 4 (US lei), tuni ah tuahmi ASEAN ramleng vuanci hna tonnak ah Malaysia le Indonesia palai nih ralhrangbu nih ASEAN thlahmi palai he rian an tuan khawh lomi kongah lungrawk ngai a si tiah an chim. A fiangmi cu Myanmar buainak kongah ASEAN hruaitu hna an i cheu ti hi a si.

Biatak tein tuahremh a duhmi an um i a lenglei zoh dawhnak men in riantuan a duhmi an um ve tinak a si. Alternative Asean Network on Burma (Altsean-Burma) a dirhtu Debbie Stothard nih cun “Myanmar ah ralhrangbu nih nawlngeihnak an lakmi kong he pehtlai in ASEAN ramleng vuanci cheukhat nih an ruahnak fiangtein an chimmi zoh tikah Myanmar buainak kongah ASEAN hruaitu hna an i cheu ti hmuh khawh a si” tiah a chim.

“Myanmar buainak cu a fak chin lengmang. ASEAN hruaitu hna nih cun ralhrangbu bawizik Min Aung Hlaing he tonnak an rak ngeih lioah khan ralhrang nih an cawlcangh ning an zorter deuh lai tiah an rak zumh. Asinain boruak cu chiatlei a panh chin lengmang. April thla meeting tuah hnuah ralhrang hna cawlcangh ning cu thatlei si loin chiatlei tu a panh. Hihi ASEAN nih a fak ngaimi nehsawhnak a tonmi a si” tiah Debbie nih cun a chim.

Cu lawng si loin Debbie nih cun ASEAN thlahmi palai Erywan Yusof kong le ralhrangbu nih UN ah dotla cozah a si khawhnak hnga ASEAN a hman timi kongah a hmuhning a chim chap. “ASEAN palai nih minung hawi bawmhchanhnak kongah kahdaihnak tuah dingin a chimmi cu ralhrangbu nih an hnon. Cucaah ASEAN palai nih NUG le tlangcung hruaitu hna he tonnak zong a tuah kho ti lo. ASEAN riantuanning a palh tiah ka ruah.

Ralhrangbu nih cun dotla an si khawhnak dingah ASEAN hi aa bohan ngai ko. Asinain ASEAN nih a khamh kho lai lo ti a fiang”. “Myanmar buainak kongah ASEAN hruaitu hna an i cheu ko nain lam pakhat cu a um ko. Cucu Myanmar buainak biatak tein tuahremh a duhmi Malaysia le Indonesia nih UN Security Council ah ASEAN hawikom a simi US, European Union le a dang ram hruaitu hna he bia an i ruah a hau.

UNSC hi Myanmar buainak kongah a tlai tuk, a rannak in riantuan a herh. Caan a rauh deuh paoh ah Myanmmar ramchungah vanlawng in kahnak, thahnawnnak le tlikzamnak a karh deuhdeuh tinak a si ko” Debbie Stothard nih cun VOA ah a chim. By. Salai CP Lian

Be the first to comment

Leave a Reply

Your email address will not be published.


*