Hakha Le Paletwa Peng Thimnak Ding Kong He Pehtlai In Pilot Project An Cawlcaang!
===========================
Chin ramkulh chung ah Union Election Commission hruainak in tuahmi Vote(mee) cazin zohṭhannak cu Pilot Projects nih Hakha le Paletwa peng ah tuah in, cazin an lak cuahmah lio a si. Chin ramkulh, Paletwa ah chungkhar cazin an lak hna i, Paletwa ah SAC le Paletwa CDF, AA kar kahdohnak cu a voihnihnak a chuah ṭhan caah kan rian kan tlamtlinh lai lo, tiah cazin a latu hna nih an chim. Cu bantuk ṭhiam in, Hakha khuachung sang cheukhat hna zong ah chungkhar cazin an lak cuahmah lio a si, tiah theih a si.
2020 thimnak ah vote fir puh in hramhram uknak a latu SAC nih atu bantukin vote(mee) cazin check ṭhannak tuah in chungkhar cazin a kan lakter mi hi, kanmah zong kan lung tling lo nain an kan lakter ruangah kan lak mi a si ko, tiah Chungkhar cazin latu hna nih cun an chim chap.
A luancia August 10 ahkhan Paletwa SAC hrambunh khah-lah-yah (ခ.လ.ရ) 289 nih, Paletwa khua cu hriamngan in an kah. AA le SAC ralkap kar kahdohnak a faak i, Paletwa-Kyautdaw(ကျောက်တော်) tilawng lam zong a luancia August 1 khan an phihkham ruang ah Paletwa mipi nih eidin tirawl kongkau ah harnak ngapi an tong.
Trump Inn Chekhlatnak Nawl Cu Keimah nih Ka Pek Hna – Attorney General Merrick Garland! US President hlun Donald Trump, (Florida) a inn cu FBI nih August 8 ah an rak luhhnawh. Cu lio i nawl(ordee) a rak petu cu keimah ka si, tiah Attorney General Merrick Garland nih a chim. President hlun Trump inn chekhlat ding hi fawi tein bia khiahnak kan tuahmi a si lo. A fekfuanmi tet-te kan ngeih caah atu bantuk in Justice Department’s nih kan tuahmi a si, tiah TV i biachimnak ah a chim chap.
Republican Party nih Trump inn luhhnawh a si nak kong ah an lungtlin lonak le fianternak tuah ding in an chim hnu ah atu bantuk in Attorney General Merrick Garland nih cun a chimfianhnak tuah. Trump inn chekhlatnak ah hin White House he aa pehtlaimi hmanthlak cheukhat le document tam lak FBI nih an lak, tiah theih a si. FBI nih Trump inn an luhhnawh lio ah hin Trump cu NewYork ah a um lio a si.
Japan PM Nih Cabinet Minister 7 An Rian in a Phuah Hna!: Japan Prime Minister Kishida Fumio nih, August 10 ah Cabinet Minister 7 cu an rian in a dinhter hna, tiah theih a si. Cozah ah a bia ngaimi ramleng minister le Finance minister tu cu an rian dinhter lo in anmah sining teah a chiah hna nain Unification Church he pehtlaihnak a ngei mi Cabinet minister 7 cu an rian in a chuah hna. Prime Minister hlun Shinzo Abe thihnak kong ah Unification Church cu pehtlaihnak an ngei tiah lunghrinh an si.
Japan phunghram zong nih biaknak cu a upat awk a si, cu bantuk in biaknak lei phu hna zong nih upadi cu an upat awk a si, tiah Prime Minister Kishida Fumio nih thawngfiannak ah a chim. Unification Church cu 1950 ah S. Korea ram ah rak thawkmi a si i, nu le va voikhat ṭhit-um ah a thongthong in an rak ṭhit-umter hna i, Phaisa a dik lo ning tawlrelnak kong ah mizapi nih rak ceih ngaimi Church an si.
Ramchung Ah Datsi A Kai Tuk Caah Duh Poh In Datsi Cawk Khawh A Si Ti Lai Lo, Tiah Thawng A Leng, Ramchung ah 92 datsi thawl khat(1 liter) ah kyats 2245 in 2720 tiang a kai, tiah SAC kuttang datsi cawkzuarnak Committee nih cathanh an chuah. Nizan August 11, Yangon ah 92 datsi thawl khat ah kyats 2140 lawng a si i, nihin August 12 ah 2245 tiang a kai. Hmun dangdang ah cun 92 datsi thal khat ah 2720 tiang a kai, tiah theih a si.
Ram chung khuapi cheukhat ah cun datsi le diesel a um lo caah mizapi nih an caw kho ti lo. Datsi le diesel lei rianṭuanmi le a ngeitu hna nih, SAC nih an kan kham caah kan kua kho ti lo, kan phor kho ti lo, tiah an chim. “SAC nih US dollar fang ah Kyats 2100 a ti ko nain a lenglei in tuak usihlaw dollar fang khat ah Kyats 2750 a phan i, hi nakin a kai deuh te lai,” tiah datsi zuarmi pakhat nih a chim.
Ram chung ah datsi a dih ngai cang caah duh poh cawk khawh a si ti lai lo, tiah thawng a leng ko nain The Chin Post nih ‘a dik’ tiah fehternak kan ngei rih lo.
Uknak Laak Ruangah India Ram I A Zaammi Hna Cu SAC Nih Tlaih Ding In Aa Zuam!: Uknak laak ruangah India ram lei a zaammi Myanmar rammi hna cu tlaih khawh nakding ah SAC le India cozah kar ah chawnhbiaknak biathli a um tiah Khit Thit Media nih a langhter. Myanmar ram a chuahtak mi hna ca ah kir ṭhan khawhnak le hmunhma chiahpiak ding in kan i zuam an ti ko nain, SAC nih India ram i a zaam mi hna cu tlaih an timh hna, tiah theih a si.
A luancia July 26 ah India-Myanmar Ambassador le Wana Maung Lwin cu tonnak an rak ngei i, India ram i a zaammi Myanmar rammi hna cu kuat ṭhan ding in an rak i ceih. Cuti an i ceihkhan hnu ah Mizoram ramkulh cozah nih Kolkata khuapi um, Central Myanmar Council zung theihternak an tuah i, ram pahnih karah ceihkhan ding a um rih, tiah theih a si.
Leave a Reply