KIA Le PDF Fonh in Ralhrang An kah Hna i SAC Ralbawi Telhin Ceilak An Thi

Nihin November 29, 2021, zing sml. 6:00 am ah Kachin ramthen Mungin peng Letpanta khua kiangah SAC ralhrang mawtaw pa 2 hna cu Mitkyina lei a panh cuahmah mi SAC ralhrang hna cu Kachim hriamtlai KIA lamhruainak in PDF hna hen fonhin an kahdoh hna tiah mah khua chung mi nih NBung Dat Kasa ah a chim.

Mah Kahdohnak ruangah SAC ralhrang lei in ralbawi pakhat telhin minung pa 7 an thi nak kong zong a chim chap. Mah thihnak kong hen pehtlai in NBunh Dat Kasa ah fehternak a um rih lo caah an hlathlai cuahmah liopi a si. Ref; 7day News

Na lungre a thei maw? Luat khawh si ko hih! Jesuh Khrih nih “kan kal taak cang hna lai” {John 13} ti a chimh hna ruangah a zultu hna cu an lungre a thei tuk; an nun bei a dong. Jesuh zulh ruah i zeizong vialte kan kal taakmi hi sullam ngei lo le sungh pei a si dih ko cang lai hi an ti, kan vaivuan cikcek cang hi ta an ti i Jesuh um ti lo hnu i vawlei nun an zuam ti lo caah Peter hna nihcun “thih tu ka thi ve lai” {John 13:37} tiah a ti diam khah.

An bei a dong bak; an lungre a thei bak, timi kha Jesuh nih a hmuh tikah John 14 ahcun “nan lungrethei hlah u” tiah voi hnih tiang bak a nolh {Vs. 1, 27} i lungretheihnak le beidonghnak vialte tei khawh nak lam pahnih a chimh hna. Cu lam pahnih hna cu: #1. Lungthin dihlak in Jesuh zum law lungretheihnak cu na tei hrimhrim lai V.1 Lungretheihnak le nun beidonghnak tei khotu pakhatnak cu “zumhnak” a si.

Na zumh taktak ahcun lungretheihnak ral cu na tei hrimhrim lai. Mah belte lungretheihnak le nun beidonghnak tei khotu “Zumhnak” cu “kaa in ka zumh” ti sawh a si lo; kan nunnak dihlak le kan zeizongte Pathian kut ah chiah ngam~Pathian ttuanvo pek ngam le tawlrelter ngam khi a si. Phaisa tam deuh le Sui tthi ngan deuh hmanh, kan zumh taktak lomi kut ah chiah kan ngamh lo; a ka hleng bak lai lo ti kan zumh ngam taktakmi minung kut lawngah kan chiah ngam.

Pathian zumh taktak timi cu amah tawlrelnak, zohkhenhnak le ttuanvo laknak tangah kan nunnak, kan chungkhar le kan zeizongte chiah ngamh khi a si. Pathian kut ah kan um, Pathian nawl si ko seh, amah khuakhaan lairelning poh in kal ko seh, tiah kan zeizongte taktak amah nawlngaihnak le tawlrelnak chungah hun chiah ngam khi zumhnak taktak cu a si. Cu bantuk zumhnak kan ngeih ahcun vawlei ah kanmah lungretheihpi dingmi thil a um ti lo.

Kanmah nun bei rak dongh ve nak ding a tang ti lo. Bawipa kut ah kan chiah dih cang caah kanmah cu lungthin dai tein kan i din kho. Cucu zumhnak nih lungretheihnak a teining cu a si. 2. Jesuh ratthan caan hi lungthin dihlak in awrh law lungretheihnak cu na tei hrimhrim lai Vs. 2-4 Jesuh nih lungretheihnak le nun beidonghnak tei khotu dang pakhat a chim tthanmi cu, lungthin dihlak in Jesuh ratthannak hngah hi a si. Jesuh nih “ka rak in lak hna lai” {John 14:3} tiah bia a kan kamh bak.

A kan lak tthan lai timi kan zumh taktak ahcun vawlei ah kan um thai lai lo, vawlei ka dirhmun hi ka kal taak hrimhrim lai timi zumh chih a herh. Kanmah lak dingah a rak ra dingmi Jesuh kan cuanh, kan awrh le kan hngah peng ahcun vawlei ah lungretheih tuknak le nun beidongh tuknak ding zeihmanh a um kho lo. Harnak zong chikhat ca, rumnak zong chikhat ca, fahnak zong chikhat ca, mitthli zong chikhat ca lawngte an si;

Zungzal ka umnak ding um le Jesuh nih a ka laknak ding hmun ah ttahnak um ti lo, sifahnak um ti lo, ttihnak um ti lo. Cu kaa hmun kal ding in a thil aa timtuah dih cikcek cang i kal te lawng a hngak cangmi ka si ahcun ziah ka bei dongh lai? Ram harsa India/Malaysia ah a ummi refugee hna auhnak an dong i ram ttha Australia/US hna kal ding an si cang~

An thil an timhtuah dih cikcek i ready in anmah phortu ding vanlawng a rak phanh lawnglawng an hngah cang hnu ah, India/Malaysia khuasak harsat kongah lungretheih le nun beidongh awk zeihmanh a um ti lo. Cu bantuk te cu a si ve. Kan nih cu zungzal nunnak vancung ram ttha kal ding in a thilri, a nunzia le a lungput vialte ready in aa timtuah i a kan latu ding Jesuh ratthan caan lawng a hngakmi kan si cang.

Cucaah vawlei harsatnak le duhtlinlonak ruangah lungrethei le nun bei dong in a um dingmi kan si ti lo. Zumtu kan si ve ko nain lungretheihnak le nun beidonghnak nih a tlaih pengmi kan si ahcun, Jesuh Khrih nih rak lak dingah aa ready rih lomi~kaa lawng zumtu, vancung phan kho deuh lo dingmi kan rak si diam kho. A zum taktakmi hna cu vawlei kan nun chungah lungretheihnak le nun beidonghnak chung in Bawipa nih luatnak lam a kan serpiak ko dah kaw… Lawmhnak he, Hrambik Lian

Be the first to comment

Leave a Reply

Your email address will not be published.


*