KIA Cathanh Cu A Mak Ko I Cawn Awk Tlak Si Mipi An ven Ning Uar An Um Lawlaw

Kachin ram Bamaw pengkulh chungah phaisa in lentecelhnak hmun tuah lo ding in le rithai-sii zuar lo ding in Kachin ralkap KIA no.1 battalion nih nizaan November 22 ah ralrin peknak cathanh an chuah. Ralhrang phu nih nawlngeihnak an lak hnu ah Kachin ram Bamaw pengkulh chung ah rithai-sii hna zuar nak le phaisa he lentecelhnak hmun hna cu an chap chin caah firnak le thilsual tuahnak a tam chin kho tiah ralrinnak cathanh chung ah cun an langhter.

Mi zapi thathnemnak ding caah a hrawk kho mi rithai-sii zuarnak, phaisa he lentecelhnak hmun hna tuah in ralhrang phu nih hmanrua a tuahmi thil hna cu fehternak tuah lo ding in le phihpiak ding in an cathanh chung ah cun an langhter. Ralrin peknak cathanh chuahmi cu nawl zulh lo a si ah cun fakngai in hmalaknak tuah le, hmailei a cang hnga ding mi thil cu an ton a hau lai tiah an langhter chih. Mizzima

China le Association of Southeast Asian Nations(ASEAN) hruaitu hna cu ralhrang bu hruaitu Min Aung Hlaing tello in biaruahnak an ngei. Chinese President Xi Jinping nih a hruai mi virtual submit ah hin China nih cun Myanmar ralhrang bu hruaitu Min Aung Hlaing hi telh ve a duh nain ASEAN ramdang nih an duh lo, tiah Reuster nih a tial.

Tutan hi ASEAN submit ah Min Aung Hlaing an telh ve lo voihnihnak a si cang. February ni 1, in hramhram nawlngeihnak a latu Min Aung Hlaing nih hin Myanmar ramkhel hruaitu le ralhrang a dotu mi zeimawzat a tlai hna. Nunnak tampi tiang a liam cang. April thla i ASEAN hruaitu hna le ralhrang bu remdaihnak an tuahning ahcun,

Ralhrang nih an tlaihmi hna vialte le NLD party hruaitu Aung San Suu Kyi chuah ding an si cang. Sinain, remdaihnak an tuahmi an hlawhtlinter khawh lo caah ASEAN ram hna nih hin Min Aung Hlaing hi an cohlang duh lo. Tutan China-ASEAN submit ah hin China nih ralhrang bu hruaitu Min Aung Hlaing hi fakpi in dirkamh hmanhsehlaw ASEAN member dang Malaysia, Indonesia, Singapore le Brunei hna nih fakpi in an rak doh ve.

NUG spokesperson Dr Sasa nih cun China nih Myanmar ralhrang bu telh a duh cu, “A dik lo hrimhrim”, tiah a rak aupi ve. “Myanmar ralhrang bu hna nih hin ASEAN ram hna duhning an zul lo, ram chung ah buainak le harnak tuah tidah lo cu China le ASEAN ram hna ca zong ah thil tha tuah mi a ngei fawn lo,” tiah a chim.