Palaw Lam Thluan Pawngah Khuami Nih An Cinmi Cinthlak Pawl KIA Nih An Hrawk Piak Hna
============================
Shan ram, Kut Khaing pengkulh Ho Naung khuatekomh le Palaw khuate ah khuami hna nih lamthluan ah an cin mi, Pangpar, thingthei, hringso hna cu KarLai ( ကာလိုင်) ah hrambunh mi KIA hna nih nizaan zinglei suimilam 10:00 hrawngah an phoi piak dih hna tiah tualchung mi nih an chim.
Palaw khua in KarLai lei kalnak lam thluanah cinmi thinkun, pangpar, hringso, thingthei pawl cu KIA phu chungtel minung pa 8 hna nih an phoi dih nak kong cu mihmutu tualchung mi pakhat nih a chim. ” Nizaan bawlung kan i chuih lio ah an hrawh. Lam a kal mi zapi zong nih an hmuh dih ko hna. Kan mah he aa pehtlai lomi a si caah zeihmanh kan chim ngam ve lo. Mah tiin thil an tuah mi hi a tha lo tiah ka ruah.
Ralkap an si caah an kan tlaih sual cun a laakaa in hrem lai cu kan tih ve.” tiah tualchung mi pakhat nih a chim. A luancia mi zarhhnih nak hrawng ah rethei thatbat in tualchung mi nih cinthlak cin mi 1380 cu a tu ah 300 hrawng lawng a tang cang tiah tualchung mi pakhat nih a chim. Cu kong he pehtlau in Karlai ah khua a sa mi KIA in tuanvo negeitu pakhat nih,
” Hi kongah khuauk bawi sinah chimh cia a si cang. Kan mah sakhan tiang ci loding in chimh an si cang. Ralkap bu chung ah cin a si cun nan mah nan sung ko lai. Kan ralkap hmunhma ram a si lo ah cun thazaang kan i peek ko hna. Nawl peek loawk le ngaihthiam loawk zong a um lo.” tiah a chim.
Kalaymyo Ah Mibawmchantu Chungtel le CDM Sibawi Telh In Minung 4 Cu SAC Ralkap Nih An Tlaih Hna!: Kalaymyo ah SAC ralkap nih mibawmchantu phu chungtel Ko Kyi Yah Aung, CDM cawlcanghnak a tuahtu siibawi le khuami 2 an tlaih hna, tiah theih a si. Kalaymyo, Pinlung sang ummi Ko Kyi Yah Aung cu nihin July 28 zinglei ah SAC ralkap nih an tlaih, zeiruang ah an tlaih ti cu theih a si rih lo.
Nizaan July 27 zong ahkhan Kalaymyo Baeinn(ဘဲအင်း) sang ah inn hlang in khuasa mi CDM cawlcanghnak a tuahtu sibawi pakhat le inn ngeitu pafa hna cu SAC ralkap nih an tlaih hna, tiah sangchung ummi nih an chim.
“Inn ngeitu cu Nga zuar in a cawmmi an si, inn hlangtu cu CDM siibawi a si, a min le khoika ummi a si fiang tein theih a si rih lo,” tiah sangchung ummi pakhat nih a chim.
A luancia ni tlawmpal zong ahkhan Kalaymyo Aungtitsa(အောင်သစ္စာ) sang ummi pa 5 cu SAC ralkap nih an rak tlaih hna, tiah theih a si, nain an min le ho an si theih a si rih lo.
India Ram Ah Zu Din Sualnak In Minung 40 Leng An Thi Cang!: India ram nitlak lei ah zu(alcohol) dinsualnak in minung 42 an thi i, minung 100 fai siizung an phan, tiah ṭuanvo ngeitu palik nih July 28 ah an chim. Phunghram nih a onh lo mi zu a zuartu pawl cu tlaih ding in cozah nih nawl a chuah colh.
Gujarat ramkulh khua cheukhat ah an zuar mi zu pawl cu Methanol tam tuk aa tel i, zu ding pawl nih an i din sual ruangah tuzarh chung lawng ah minung tam ngai zawfak in an um, tiah theih a si. Zu dinsualnak hin Botad pengkomh in minung 31 an thi cang i Ahmedabad pengkomh zong in minung 11 an thi cang, tiah palik ṭuanvo ngeitu hna nih an chim. Mining 97 cu siizung ah an i thlopbul lio a si i minung 2 cu an zualhma ngai, tiah theih a si.
Prime Minister Narendia Modi a chuahnak Gujarat ramkulh cu India ram ah zu zuar le din zong an khapnak hmun pakhat a si. Ṭuanvo ngeitu hna nih Gujarat ramkulh i phung ning loin on mi zudawr vialte cu an hrawh dih i, a zuartu zong an tlaih hna, tiah theih a si. PDF Lemcang In SAC Ralkap Sin Thawngpetu Pakhat Cu Bago PDF Nih An Tlaih!: Bago ramṭhen, Bago peng ah PDF ralkap lemcang in SAC ralkap sinah thawngpang a thanhtu minung pakhat kan tlaih, tiah Bago PDF nih nihin July 28 ah cathanh an chuah. PDF nih an tlaihmi cu Civil-PDF in ṭuanvongeitu pakhat si mi ralkap San Shia a si, tiah an thanhmi ah cun an langhter.
San Shia cu Bago khuachung cawlcanghnak ah aa tel mi a si i, “Khuachung um a him lo” ti in July thla lai hrawng ahkhan Kayin ramkulh chung tlangcung hriamtlai phu umnak hmunram ah a zaam, tiah theih a si. Hmundang i a zaam tikah a hawile PDF nih an lunghrinh i checkhlatnak an tuah. San Shia nihcun Bago um hriamtlai phu hna cawlcanghnak vialte cu SAC lei ṭangmi Han Ngein Oo telegram channel ah thawng a rak peknak hmuh a si, tiah Bago PDF he naihniam in ummi nih an chim.
A luancia July 7 i Bago mino 9 tlaihkhih an rak tonnak zong, San Shia ruangah a si lai, tiah Bago PDF cheukhat nih cun lunghrinhnak an ngei. Bago PDF nih Bogo tualchung hriamtlaitu phu dang hna cu San Shia aa telnak CPDF he pehtlaihnak tuah lo ding in an chimhruah hna i, tlaih a tongmi CPDF chungtel San Shia cu dan kan tat lai, tiah Bogo PDF nih cun an langhter.
SAC Ralkap Nih Gangaw Peng le Zotung Lei ah Rallam An sial I Khuami 30 Hrawng An Tlaih Hna!: Magwe ramṭhen, Gangaw peng in Chin ramkulh Matupi peng Zotung ram lei ah SAC ralkap hna cu July 24 in hmunhnih ah rallam sial in khuami 30 hrawng an tlaih hna, tiah theih a si.
SAC ralkap hna cu Zotung ram, Zungnat (ယုံနက်) khua in Tilaw (တီလော) khua lei ah rallam hmunkhat in an sial; cun Gangaw le Zotung ramri Zipia(ဇီးပြား), Antta(အန့်တာ) le Ramsi (ရမ်စီး) khua lei ah lut in Ramsi (ရမ်စီး) khuami 30 hrawng an tlaih hna, tiah Supreme Council CDF-Zotung in ṭuanvo ngeitu pakhat nih a chim.
Ṭuanvo ngeitu nih cun, “Hmunhnih in rallam a sialtu SAC ralkap hna cu minung thazaang 80 hrawng an si i, phu khat cu Ramsi (ရမ်စီး) khua pawnghrawng chekhlatnak le thianhhlimhnak an tuah dih hnu ah Ramsi (ရမ်စီး) khuami 30 an tlaih hna, a dang phu khat cu Tilaw (တီလော) lei ah an kal,” tiah a chim.
“SAC ralkap hna nih rallam an sialnak lampi Zipia (ဇီးပြား) le Antta (အန့်တာ) khua kar ah aho si theih lo miruak 2 hmuh a si i, SAC ralkap kut in nunnak liammi an si lai. “Rallam sialtu SAC ralkap phu khat cu Ramsi (ရမ်စီး) khua pawng ah cawlcanghnak an tuah i, a dang phu khat cu Tilaw(တီလော) in Rezua – Matupi lei hoih in an kal lai tiah zumh a si,” tiin Supreme Council CDF-Zotung in chimphuannak nawlngeitu nih cun a chim.
Tualchung mi hna cu SAC ralkap rallam sialnak hmunhma ah khualtlawng lo ding in le um kallo ding in Supreme Council CDF-Zotung nih ralrin peknak zong an thanh cang. SAC ralkap hna nih cun a luancia July 20 in Gangaw le Htilin peng phone line le internet line an thah caah tualchung thawngpang le thil sining fiang in theih khawh a si lo.
Bago Ramṭhen Paungdae Peng Kahdohnak Ah SAC Ralkap 4 An Thi: Bago ramṭhen, Paungdae(ပေါင်းတည်) peng Thitpoke(သစ်ပုတ်) khua kahdohnak ah SAC ralkap ralbawi pakhat telh in ralkap 4 an thi i, meithal 2 le kuan zeimawzat kan lak khawh, tiah Paungdae(ပေါင်းတည်) PDF in chimphuannak nawlngeitu nih a chim.
July 28, chunhnu suimilam 1:30 ahkhan Paungdae (ပေါင်းတည်) peng Thitpoke(သစ်ပုတ်) khua i tower hngaktu SAC ralkap hna cu Paungdae(ပေါင်းတည်) peng tualchung hriamtlai phu hna nih an kah hna. Cu kahdohnak ah cun ralbawi 1 le ralkap 3 hna cu an thi. Tualchung hriamtlai phu lei nih MA 3 pakhat, pistol 1, phone 4 le ID card pakhat an lak khawh, tiah theih a si.
Tuluk Thonginn Nawlngeitu Nih Myanmar Rammi Minung 90 Myanmar Ah An Kuat Hna!: Tuluk(China) ram thonginn hmun dang cio ah an hren mi Tuluk ram um Myanmar rammi minung 90 cu Tuluk cozah nih July 27 ahkhan Myanmar ram ah a kuat hna, tiah theih a si. Tuluk thonginn i an hren mi hna cu Kachin ramkulh Waingmaw(ဝိုင်းမော်) peng, Kaanpaihthi(ကန်ပိုက်တီး) khuapi ah a ummi,
Myanmar le China pehtlaihnak tunnel in an kuat hna, tiah theih a si. “Kaanpaihthi(ကန်ပိုက်တီး) ah ummi ramhnih pehtlaihnak tunnel in an kan kuat. Tuluk siizung ah ni 40 le thonginn ah 20 kan um. Thong chung ah a taang mi cheukhat an um rih, thla dih ahcun an thlah khawh men hna,” tiah thonginn in a chuakmi pakhat nih a chim.
Myanmar rammi minung 90 hna cu Myitgyina an phan cang. Quarantine in ni 5 chung an um hnu ah anmah le umnak khua cio ah an kir lai, tiah theih a si. Nu pawl cu Myitgyina siizung ah an um i, pa pawl cu pengkomh letecelhnak hall ah an chiah hna. Myanmar rammi hna cu- 2020 covid rai a chuah hnu ah rianṭuan awk a ngei ti loin, phaisa a ngeih ti lo caah Tuluk palek sin ah an i ap i, mah umnak cio ah kir ṭhan ding in timhtuahnak an rak ngei, tiah theih a si.
Tuluk ram ahhin Myanmar mi minung 5000 fai an um i rammi (Tuluk mi) sinak an ngeih le ngaih lo embassy le ṭuanvo ngeitu nih an chek hna hnu ah Myanmar mi hna cu Myanmar ram ah kuat ding in tawlrel an si lai, tiah Muse hrambunh mibawmchantu phu in chungtel pakhat nih May tha thawkka ahkhan a rak chim.
Leave a Reply