SAC Ralhrang Bomb Puahhnawh An Tong + Thawngdang
SAC Ralhrang motor paoh paoh cu Monywa-Bu Talin motor lam ah tuni chunlai hrawngah Yin Mapin-Kani Hoikom phufonh hna i bomb in an kah doh hna caah SAC ralhrang minung 15 hrawng an nunnak a liam tiah theih a si. Nitlak chaklei sangin SAC ralhrang centre (Nah Mah Khah) in a rak kai mi SAC ralhrang motor pahnih cu bombin kahdoh a tong i, SAC ralhrang tampi an nunnak a liam tiah Chu Mai Ma Yin Mapin-Kani hoikom phufonh in tuanvo ngeitu pakhat nih The 74 Media ah a chim.
” Khua lei le lam aa hlatnak ah kahdoh an si lo ah cun SAC ralhrang hna cu khua pawng hna an lut lai i, inn mei hna an khangh lai, tluang an khuan lai. SAC ralhtrang pawl cu voikhat kan puah hnawh hna i, meithal in an duhnak poah ah an kah, cun kan puahhnawh tthan hna.” ti zongin a chim. SAC ralhrang pawl cu puah hnawh an ton hnu ah PDF phufonh pawl cu kahtholh in an kah hna caah himtein an kir tthan kho tiah theih a si.
Thawngdang pehchap, Thawnttha pakhat a si mi cu Kawlram pumpi um SAC ralhrang ralkap pawl cu ralhmai an kal karah, an nupi le an fa le te nih Sakhan an hngah piak cang hna tiah theih a si. A ruang cu Sagaing ramthen tel in, hmun zakip ah kahdohnak a chuak peng cah a ralkaap thazaang chapnak an tling co ti lo tiah theih a si. B-1 pakhat khi, PDF an umnak hmun pakhat ah a va thlah hna i, cun in nungdam in a rak kir than mi hna kha minung zeizat an si ah hmun dang Kaadangah B-1 aiawh in a va chap than hna tiah theih a si. SAC ralhrang nih A tu daihnak sawmnak a tuah mi zong hi cu thil runagah cun a si kho men tiah ramkhel zohthiam hna nih an ruah dop mi cu a si. Hi thawngpang hi Mipi lei nih kan thinlung kan i hmuih pi taktak ding a si. A ruang cu tei dawh a si cang ko hih, Kan tei hrim lai Pathian tunih kan bom hram ko seh.
Relchap, US First Lady, President Biden thaisung Jill Biden cu Europe ah a tlawng i, thawngthanhnak zeihmanh tuah hmasa loin May 8, Mother’s day ah Ukraine a tlawng. Ukraine ah cun Ukraine first Lady Olena Zalenska, president Zalenskyy nupi he an i tong i, US first lady Jill Biden nih cun Russia ral lak ah Ukraine a dirkamhnak a langhter.
Jill Biden nih cun, Ukraine le Russia tukdohnak cu dai zok cang sehlaw, tiah a duhnak kong a chim i, Mother’s day thengmang te ah Ukraine tlawn a duh kong zong a chim. Jill nih cun Ukraine mizapi nih Russia ral an dohnak phen ah US cu kan um peng lai, tiah a chim fawn. Olena Zalenska zong nih president Zalenskyy pawng ah a um kho peng lo nain a fale pawng ah cun a um peng kong a rak chimh ve. Tutan Jill le Olena an i ton hi Russia ral a thawh hnu ah Ukraine first lady Olena media ah aa langh hmasa bik a si.
Hilio US president Biden le Ukraine president Zelenskyy hna cu mui hmuh khawh in an i chawn i, hi caan ah hin Vawleicung ram ṭhawng 7, G-7 zong an i langh ve. G-7 nih cun faak deuh in Russia phihkharnak an tuah ṭhan lai kong an chim. Cupinah Russia mirum le media vialte an rengh hna lai kong le ramdang in Russia oil cawk cu donghter dih an i tim kong an chim. Hilio ah hin Ukraine nichuahlei Luhansk khuapi i Sianginn pakhat cu Russia missile nih a khen i, siangngakchia 60 hrawng cu an thi lai, tiah ruah a si, ti in president Zelenskyy nih a chim.
Leave a Reply