Zuar Le Zuarlo Kongah Kan Buaipi Ngai Mi Cu A Vun Fiang Tuk Cang Ko Hih!!
=================================
Ngun Sui Dim (Salena Sui Sui) Asiloah A Hawile Nih GRCM Group Ah Fianternak Tuahkhawh Asi Tilo!, Oman ramah zuar ka tong tiah a chimtu Ngun Sui Dim or lei nih hi group ah catialnak le Live in biachim khawhnawl awnh asi ti lo. Aruang cu zuar a tong ve, timi nu pakhat lei chungkhar nih “puaisa nih an zuar hrimhrim lo, an i theih palh caah asi. Ngeihthiam zong kan hal cang agent cu, Ngun Sui Dim chimmi kha adik lomi asi” an ka ti.
Kapkhat lawng biatheihnak cu a za lo puaisa he Ngun Sui Dim he ka chawnh hmasa ve hna lai, ka ti i ca ka kuat veve hna. Ca an vun ka leh i an bia umkalning ka zoh tikah Live in chim lo ahcun a fiang kho ding asi lo timi kha kai fiang, Ngun Sui Dim (Salena Sui Sui) cu Live in na chim ngamh lai maw? tiah bia ka hal! Ngamh tuk tuzaan cu asinpi lo a ti caah thaizing 8:00 AM ah tiah an lei 1:45 AM ah ca kan i kua.(Group ah leklak tiah zapi hmuh in ka vun tial kha nan hmuh cio lai dah).
A thaizing a hungchuak i ka hngah peng, an lei 8:35 AM ah a Online i, “ziah zeihmanh chim lo te cun na um, kan hngah peng hi nizaan nai timhlamh that he he, ka ti. Ai thawh i zei le zeidek a chim, phone pahnih a umlo ahcun a sinpi lo, a ti. Ka pu le an tho cang, a tlai cang, ati than. a donghnak ah cun ka boss pa nih phone na tong ahcun na phone kan chuh lai i zeitik hmanh kan pe ti lai lo, a ka ti, a ti than.
A Online i phone cu a tawng peng fawn tung, tu ca ka tial lio zongah a Online than tikah, ka thin kai tuar ve lo, ka zum kho ti lo fawn lo. Milai patlingpi vun deh cu kai tuar ve bak lo. Cucaah cun amah zaka ah catial piaktu Online media siseh, pumpak in si hna seh, amah leiin catialtu or Live thlahtu paoh cu, group in tu thok in kan block cang hna lai. Agent lei siseh, Oman ummi cheukhat cu ready kan si an ti i komh khawh viar an si, an face to face bakin an fianter viar ko caah, Ngun Sui Dim leiin kan group ah hmunhma a um ti lo.
Agent tanh hlei bia asi hrimhrim lo, Oman ummi tampi nih an vun ka chawnh, zuar a tongh ve an timi an chung le zong nih an vun ka chawnh, diklomi asi, ramdang kal bal lo asi caah si dawh asi, an kan zuar hrimhrim lo an ti. Hi titi ca ka tialnak a ruang cu group he ai pehtlaimi thil asi lawng siloin, catial tiangin fial i, nan konglam Admins pawl nan kan chimh caah kan group nih kap hnih bia dik tein theihter kan in duh hna i,
cucu a zul duh lomi cu zeicadah group ah ca post kan in sianh ti hna lai? Mi thleidanh le tanh hlei kan ngeih bia asi hrimhrim lo. Group dang tu cu tuanvo kan ngeihlo caah group dang tu ah nan konglam cu rak post ko ne u. Media a post mi paoh zong block nan si lai. Upatnak he Admin. Crd-Chelsea Bawi
LAINU ZUAR AN TONG TIMI KONG AH CHUNGKHAR LEI FIANTERNAK, Dubai le Oman ah a um mi Laimi 4 an zuar hna timi kongah Nu Tial Hlei Cuai (Dauchim)chungkhar sinin fianternak le an agent sin nawlnak. Dubai le Oman ah a ummi Laimi pali an zuar hna timi kong ah Lai Media pakhat nih an rak langhter mi he pehtlaiin ramkip a ummi Laimi hna zong lungrethei le awlokchong in nan rak um cio hna, hi kong he pehtlaiin Nu Tial Hlei Cuai(Dauchim)zong hi an lak ah aa tel ve mi a si caah, a chungkhar nih a thawngpang kan theih in thawngfiang hlathlainak kan ngei ve colh i, kan fanu Tial Hlei Cuai he zong tha tein chawnhbiaknak kan ngeih tikah, Pathian kilvennak thawngin a him ko i, a umnak inn ah rian tha ten a tuan ko ti kan theih.
Kan fanu hi kum khua lei in ngakchia a si caah miphun dang sinah thutdir le biachim holhrel a thiam lo caah le, rianțuan aa harh deuhmi a si caah rian tlawmpal hnek hi aa harh deuh ca tu ah a si. A umnak inn ngeitu zong nih tha tein an zoh khenh ko i a dam lo caan zongah felfai tein zohkhenh a rak si ko. Aa manh caan ahcun phone zong in chawnhbiaknak tha tein kan ngei kho ko.
Hi ruangah hin Laimi nu (4) an zuar hna timi thawngpang a lengmi ah hin kan fanu hi aa tel ve caah hi thawng hi a chungkhar nih vawlei cung hmunkip ummi Laimi hna sinah thawngfiang thanh kan hun duh mi a si. Miphun hawi nan dihlak cungah lunglawmhnak kan ngei, bawmchan dingah a kan pehtlaitu nan dihlak cungah kan i lawm, kan fanu cu zuarmi a si lo i, khika lei riantuan dingah a kalmi a si bantukin a umnak inn ah rian tha tein a tuan ko. A umnak inn ngeitu hna he zong rem tein khua an sa ti ko.
Hi thawngpang a lengmi ruangah a Agent te zong nawl kan duh hna, hi thawngpang nih an min le an riantuannak a hnorsuan lo ding hi kan fanu Tial Hlei Cuai le a chungkhar nih kan duh mi a si.Hi thawngpang ruangah a lungrethei i, a lamkip in a kan bawmtu nan dihlak cung ah kan i lawm. Tial Hlei Cuai Chungkhar, Cakilh: Hihi cu The Lairam Times kan dirhmun a si lo, mi hnorsuannak a tel lo mi ca paoh cu zalong te’n thlah piak khawh a si. Crd-The Lairam Times
Relchih; Myaing peng ah umhmun khuarmi SAC ralkap cu tualchung hriamtlai phu nih hriamngan in an kah hna, 2 an thi, Magway ramṭhen Myaing peng Thayatkan(Pyosawhti) khua ah umhmun khuarmi SAC ralkap hna cu tualchung hriamtlai phufonh nih nihin September ni 14 zing suimilam 2 hrawngah hriamngan in kan kah hna tiah Wolf Underground Force Myaing (ဝံပုလွေ ပြောက်ကျားတပ်ဖွဲ့) nih cathanh an chuah.
SAC ralkap umhmun khuarnak Pyosawhti khua cu tualchung hriamtlai phufonh nih kutser hriamngan 100 mm le 80 mm in voi 25 hrawng an kah caah SAC ralkap 2 an thi, cuhleiah phaisa an hal tawnnak check gate le an sakhan zeimawzat zong hriamngan kuan khen nak in a rawk tiah theih a si. Cu kahdohnak cu Wolf Underground Forve Myaing, Myaing Warriores le Myaing tualchung hriamtlai phukomh hna i bawm in an tuahmi si tiah theih a si.
Thaketa Peng Kamarkyi Hlei Cung In Mipa Pakhat A Zuang, Yangon ramṭhen, Thaketa(သာကေတ) peng Kamarkyi(ကမာကြည်) hlei cung in mipa pakhat cu nihin September 14 zing sml 10:00 hrawng ah a zuang, tiah mi bawmchantu phu nih an chim. Bawmchantu phu cu mipa a zuannak hlei lei an va kal tikah cycle(စက်ဘီး), phanah, luchin le a dangdang thilri a chiah takmi an hmuh. Mipa hi aho a si ticu an hngal kho rih lo, tiah theih a si.
Mipa ruak cu palik nih an kawl cuahmah ko nain September 14 chun tiang ah an hmu kho rih lo, tiah Thaketa peng mi bawmchantu phu siin theih a si. A luancia August thla zarh dongh lei ah Yangon telh in kadang hmun dang ah mah tein aa thatmi hi zarhkhat chungah 7 an um, tiah theih a si.
Thinlung khuaruah umtuning kong a cawngmi Phyo Pan Nu Khin nih cun, “Mi pakhatkhat nih a lung donghnak kong bia a’n ruah i, a nunnak lak ding tiang in aa timh na hmuh ahcun nangmah lawng nih na tonmi a si lo, tiin thazaang peknak biachim a biapi,” tiah BBC he biaruahnak an ngeihnak ah mizapi theih ding in a chim.
Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna, Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna: India ram i aa dormi Myanmar ralzam; a bikin Chin ralzam hna cu Myanmar ram ah kuat ṭhan an si lai, ti bantuk biachawkvai a um lio ah, ralzam kong he pehtlai in Mizoram Cozah ah ṭuanvo ngeitu sang Planning Board Vice Chairman Pu. H. Rammawi nih Delhi khuapi Central cozah hruaitu hna a va ton hna.
Mizoram Planning Board Vice Chairman Pu H. Rammawi nih cun, “Atu i Mizoram ah a ummi Myanmar ralzam hna cu a kir ṭhan hnu ah an humhimnak ṭha te an ngeih lo i, an khuasaknak ah remdaihnak a um lo ding a si ahcun Mizoram cozah nih kan kirter hna lai lo,” tiah Ministry of External Affairs ṭuanvo ngeitu hna he tonnak an ngeih lio, September 14 ah khan a chimh hna. Pu H. Rammawi hi Sangau khua chuak a si i, Lawngtlai East Constuency in Mizoram Legislature Assembly (MLA) ah rak thim cang mi a si. Mizoram cozah ah Cabinet minister(Agriculture) a rak ṭuan bal mi a si i, Atutan MNF cozah ahhin Planning board vice chairman rian a tlaih.
SAC Ralkap Nih Monywa Peng Nagardwin(နဂါးတွင်း) Khua An Khangh, Khuami 12 An Tlaih Hna, Sagaing ramṭhen Monywa peng Nagardwin khua cu SAC ralkap nih nihin september ni 14 zingah hriamngan in an kah hnu ah khua chungah an lut i mipi inn zeimawzar an khangh hna tiah tualchungmi pakhat nih a chim tiah theih a si. SAC ralkap pawl nih Nagardwin khua cu nihin zing suimilam 6 le cheu hrawng ah hriamngan in an kah, cun suimilam 9 le cheu ah khuachung an lut i suimilam 11 le minute 41 ah inn pawl cu an khangh duahmah hna.
SAC hriamngan kahnak in khuami inn pakhat cu a rawk, leikuang hna an kang chih, cun phungki sianginn ah um mi cycle pawl zong an khangh dih tiah theih a si. Khuachung luh awk a ṭhat rih lo caah inn zeizat a kangh le tualchungmi a thi le aa hliam mi cu kan thei rih lo nain minung 12 tu cu an tlaih hna, inn kang hi cu a tam hrimhrim ko lai tiah tualchungmi pakhat nih a chim.
Dawei Pengah SAC Ralkap Nih An Tlaihmi Hna Tualchungmi 130 Hrawng Cu Zarhkhat Hnu Ah An Thlah Hna, Tanintharyi ramṭhen Dawei peng Bawapin (ဘဝပင်)khua mi 130 hrawng cu a luancia september ni 6 ah SAC ralkap nih an rak tlaih hna, cu an tlaihmi hna cu zarhkhat chung an hrem cikcek hna hnu nizan zaanlei ah an thlah ṭhan hna tiah theih a si.
SAC ralkap thazaang 100 hrawng cu Bawapin khua ah an lut i khuami tar le ngakchia he minung 130 hrawng Phungki sianginn ah an rak tlaih hna tiah tualchung hriamtlaiphu chungtel pakhat nih a chim. Khuami hna cu phungki sianginn ah an zaam, cu an zaam nak ah cun SAC ralkap nih an kal hnawh hna i an tlaih hna, an hrocel hna, hri in an ṭem hna, meithal kuang in an tuk hna, an hrem hna pin ah khuachung thilri pawl cu an duh paoh in an lak tiah tualchung hriamtlaiphu pakhat sinin theih a si.
SAC ralkap pawl cu Bawapin khua ah zarkhat umhmun an khuar hnu nizan september ni 13 ah Dawei khua lei ah an kal i an kal pah ah hriamngan le hriamhme he an puahpah thluamah tiah theih a si. Bawapin khuami an tlaih hna ni, september ni 6 thok in an khuapawng ah KNLA , tualchung hriamtlaiphu le SAC kar kahdohnak pehtlai in a chuak i SAC lei a thimi zong an um tiah Dawei pah-kah-phah in ṭuanvo ngeitu pakhat nih a chim.
Minung thazaang 200 hrawng si mi SAC ralkap phu hna cu Bo Naga chungtel 13 nih an kahdoh hna, 5 an thi, SAC ralkap minung thazaang 200 hrawng cu Bo Naga hruaimi Myanmar Ṭawwin Naga ralkap MRDA Special commando chungtel minung 13 nih an kahdoh hna i SAC ralkap lei a thimi an um tiah cathanh an chuah. Nihin September 14, zinglei suimilam 7:30 hrawng ah Pale peng Pan khua le Muaitone(မွေ့တုံ) khuapawng ah minung thazaang 200 hrawng simi SAC ralkap phu hna cu Myanmar Ṭawwin Naga MRDA i Special commando chungtel minung 13 nih a naihnak hmun in an kah hna hi a si.
Kaphnih kar i kahdohnak minutes 15 hrawng a rauh hnu ah SAC ralkap lei 5 hrawng an thi tiah an cathanh chuahmi ah cun an langhter. SAC ralkap lei cu minung thazaang le hriam thazaang tamtuk an si nain, Bo Naga Special commando hna nih hmunhma ṭhatuk in an huapkhawh ruangah le hmuhtonmi tlamtling an ngeihve ruangah hliamhma tuarnak umlo in kaphnih kar i kahdohnak ah hlawhtlinnak he hnu an tolhkho tiah an thanhmi ah cun an langhter chih. Crd-The Chin Post
Leave a Reply