August Thlachung Rakhine Ralkap Le SAC Ralkap Kahdohnak Ah SAC Ralkap 66 An Thi
========================================
2022, August thlachung SAC ralkap le Arakan Army(AA) kar kahdohnak ah SAC ralkap lei in ralkap 66 an thi, tiah AA nih cathanh an chuah. August thla khat chung ah Rakhine ramkulh Maungdaw, Yataetaunh(ရသေ့တောင်), Taungkoath(တောင်ကုတ်), Myauk U(မြောက်ဦး) le Chin ramkulh Paletwa lei ah kahdohnak a chuak, tiah theih a si.
August thla 13 in kahdohnak an thawk i Yataetaung(ရသေ့တောင်) thlanglei Chingkhali(ချိန်ခါလီ) le Dunepaith(ဒုံးပိုက်) kar kahdohnak ah SAC ralkap 31 an thi. Cu ni ṭhiam Maungdaw peng kahdohnak ah SAC ralkap 6 an thi i, hriamnam tamlak kan lak khawh, tiah AA nih August 15 ah cathanh an rak chuah.
Cun August 31 Rakhine-Bangladesh ramri mengtung 40 hmun kahdohnak ah SAC ralkap sakhan pakhat an lak khawh leng ah SAC ralkap lei 19 an thi. Cu ni chunhnu Paletwa Myait khua pawng kahdohnak ah SAC ralkap 6 an thi ṭhan, tiah AA nih an thanh. AA lei nih cun anmah lei in a thimi le hliam tuar tlawmpal an um ve, tiah an langhter. August 31 mengtung 40 pawng sakhan pakhat cu kan lak, tiah ULA/AA chimphuannak nawlngeitu Khine Thu Khah nih cun a chim.
Relchap, Dawai Nichuah Lei Ah Fak Ngai In Kahdohnak A Chuak, SAC Ralkap 20 Hrawng An Thi! Tanintharyi ramṭhen, Dawei peng nichuah lei Tingantune(သင်္ကန်းတုံး) khua le Kyaukmaytaung (ကျောက်မဲတောင်) khua kar ah chunnitlak tluk kahdohnak a chuak i, cu kahdohnak ah cun SAC ralkap lei 20 hrawng an thi, tiah theih a si. Nihin September 2, zinglei ah Laitkyaypyaung (လိပ်ကြယ်ပြောင်) lei in SAC ralkap 100 leng le Kyaukmaetaung (ကျောက်မဲတောင်) in ralkap 80 leng cu tualchung hriamtlai phufonh nih kan kah hna, tiah hriamtlai phu chungtel pakhat nih a chim.
“Nihin kahdohnak cu a fak ngai, zaan tiang ah an ngil rih lo. Hriamngan an thlahmi hi lung 100 hrawng a si, chunnitlak hriamngan le meithal puah thawng a dai lo,” tiah a chim. SAC ralkap nih hriamngan pehtlai in an kah caah Wahkune(ဝကုန်း) khuachung inn hna cu an rawk, tiah theih a si.
Kani Peng le Myaung Peng Chung Ah SAC Ralkap nih Tualchungmi 7 An Thah Hna! Sagaing ramṭhen, Kani peng le Myaung peng chung ah tualchungmi 7 cu SAC ralkap nih an tlaih hna i, an thah hna hnu ah an ruak cu an hlonh hna, tiah tualchungmi hna sin in theih a si. Sagaing ramṭhen Kani peng Ohnpinseik(အုန်းပင်ဆိပ်ရွာ) khuami SAC ralkap nih an thahmi ruak pahnih cu nihin September ni 2 ah kan hmuh, tiah tualchungmi hna nih an chim. Thah a tongmi 2 ruak hi Ohnpinseik khua pawng leikuang kam tiva pakhat ah hmuh an si i an muihmai a rawh dih cang caah mizei an si ti cu theih an si rih lo.
An takpum cu hliamhma lawngte in a khat, an hngawng ah namte hliamhma a um i an lu ah meithal kahnak hliamhma he tiva ah an hlonh hna, tiah tualchungmi nih cun an chim chap. Ohnpinseik khua ah hin a luancia August 30 in SAC ralkap an lut i umhmun an khuarnak nithum hnu, nihin September 2 ah atu bantuk in tualchung mi nih mi ruak cu an hmuh hna. Cu bantuk ṭhiam in, Sagaing ramṭhen Myaung peng Kin(ကင်း) khua, Zeekyun (ဇီးကျွန်းရွာ )khua le Thanatkone(သနပ် ကုန်း) khuami 5 hna zong SAC ralkap nih September 1 le 2 ah an thah hna, tiah theih a si.
Kin khua ah cun Kyaukyit (ကျောက်ရစ်) palik sakhan in SAC ralkap cu nihin September 2 ah an rak lut i, tualchungmi hna cu a himnak ah kan zaam dih, U Htun Hla le U Htun Nine tu cu an tlaih hna i an thah hna, tiah tualchungmi nih cun an chim. SAC ralkap nih U Htun Hla cu meithal in an kah i a thi colh, U Htun Naing tu cu an hrem hnu ah an thah, tiah theih a si. Myaung peng chung ah hin September 1 zong ah SAC hriamngan kahnak in tualchungmi 3 an thi i, 6 hliam an tuar, tiah theih a si.
KNU Hmunram, Hpapun Pengkomh SAC Ralkap Sakhan Cu KNU Brigade 5 Nih An Laak, KNU hmunram, Hpapun pengkomh chung SAC ralkap sakhan pakhat cu KNLA brigade 5 nih kan lak khawh, tiah KNU nih an thanh. Hpapun pengkomh SAC ralkap sakhan cu September 2 zinglei ah kan kah i, kan lak khawh. SAC ralkap lei a thimi le hliamhma tuar an um, tiah ṭuanvo ngeitu nih an chim.
“SAC ralkap sakhan cu nihin zinglei ah kan lak i, a thimi le hliamhna tuarmi zong an um, meithal zun 8 le hriamngan zong kan lak khawh,” tiah KNU in ṭuanvo ngeitu nih cun a thanh. A luancia August 22 zong ahkhan Hpapun pengkomh Dwailoe(ဒွယ်လိုး) peng SAC ralkap ramri hngak an umnak Bawkyunhta(ဘော့ကျုံထာ့) sakhan cu brigade 5 nih an rak lak. Cu lio ah cun BGF ralkap 4 an thi i 2 hliamhma an tuar, hriamnam zeimawzat zong kan lak khawh, tiah brigade 5 nih cathanh an rak chuah.
Hpruso-Demoso Lampi Kahdohnak Ah SAC Ralkap Lei Sniper Tlaitu 6 Telh in Ralkap 60 Leng An Thi, Karenni ramkulh, Hpruso-Demoso lampi ni 15 chung kahdohnak ah SAC ralkap lei ralbawi telh in minung 60 leng an thi, tiah Central Special Operation nih cathanh an chuah. August 16 in August 31 tiang Hpruso-Demoso lampi cung ah rallam a sialtu SAC ralkap hna cu tualchung hriamtlai phufonh a simi Central Special Operations Sniper Group, KNDF Sniper, Central region 1101, KA phufonh hna nih an kahdoh hna. Cu kahdohnak chung ah cun SAC ralkap lei ralbawi pakhat le sniper tlaitu minung 6 telh in SAC ralkap 61 an thi, tiah an thanhmi ah an langhter.
Hpruso le Demoso pengchung ah SAC ralkap nih minung thazaang tampi hmang in hmunhma lak khawh an i zuam caah, tualchung hriamtlai phufonh hna i bawm in kan kahdoh hna, tiah tualchung hriamtlai phu chungtel pakhat nih media ah a chim.
Kahdohnak chung ah tualchung hriamtlai phufonh lei hliamtuarnak cu a um lo nain sniper kuan kan herh, tiah Central Division Special Operations Group nih an chim. Atu ah an hmanmi sniper kuan pakhat hi Ks. 75,000 hrawng a rak si tawn nain, thil man a kai tuk caah atu ah cun kuan pakhat ah Ks. 120,000 a phan cang, tiah theih a si.
Sagaing Ramṭhen, Myinmu Peng Ah Pyusawhti 3 Cu PDF Nih An Thah Hna: Sagaing ramṭhen, Myinmu peng ah SAC ralkap he i fonh in tualchung mi hna cung ah sualnak a tuahtu Pyusawhti chungtel 3 cu PDF nih an thah hna, tiah tualchung media nih an langhter.
Nizaan September 1, zaan lei ah Myinmu pengchung ah SAC ralkap hna he i fonh in tualchung mipi innlo thilri a hrawktu pyusawhti 3 cu tualchung hriamtlai phufonh nih an thah hna. Cu pyusawhti hna sin cun kutser meithal pakhat le zeidang thilri zong kan lak, tiah Nway Oo Takhon PDF nih cathanh an chuah.
Cu thilcang kong he pehtlai in Nway Oo Takhon PDF phu chungtel pakhat nih, “Tualchung hriamtlai phuthum fonh nih pyusawhti 4 kan tlaih hna nain pakhat cu a luat. Meithal pakhat le zeidang thilri kan lak. Cu pyusawhti hna cu Myinmu khuachung ah cawlcanghnak a tuahmi an si. SAC ralkap sin ah thawng a petu an si i, rallam an sial tik ah lam an hmuhsak hna, mipi umnak innlo a hrawktu zong an si,” tiah a chim.
Tuah Rih Ahcun Fakpi in Dantatnak Kan Tuah Lai!, North Korea nih Nuclear hneksaknak a tuah than rih a si ahcun US, South Korea le Japan nih a hlan bantuk si lo in a fakbik lehrulhnak kan tuah lai, tiah S.Korea National Security Office Director Kim Sung-han nih a chim.
US National Security Advisor Jake Sullivan, Japan National Security Advisor Akiba Takeo le S.Korea National Security Office Director Kim Sung-han hna Honolulu ah tonnak a ngeih dih hnu ah N. Korea nih voi 6 Nuclear hneksaknak a tuah cang i a dang hneksaknak a tuah rih si cun kan zoh sawh ti lai lo a fak bik lehrulhnak tuah ding in ramthum kan hnatlak mi a si, tiah,a chim chap. N. Korea nih a voi 7 nak nuclear hneksaknak tuah aa tim, tiah US le S. Korea hruaitu hna nih cun an chim. 2017 ah khan N. Korea nih a voi 6 nak nuclear hneksaknak cu a rak tuah.
Leave a Reply