SAC Nih Vanlawng In AA Sakhan An Kahnak Kong He Pehtlaiin AA Nih Lehrualnak Kan Tuah Lai A Ti
===========================
Myanmar-Thailand ramri pawng, Karen ramkulh KNLA Brigade 5 hmunram um AA camp cu, nizan July 4 chun ah SAC ralkap nih Jet Vanlawng in voihnih in bomb an thlak caah AA ralkap cheukhat an thi i, hliamhma pu mi an tam, tiah theih a si.
“AA camp pawngkam ah kahdohnak zeihmanh a um lo nain SAC ralkap nih Jet Vanlawng pahnih in bomb an thlak mi hi, timh ciammam tein an thlakmi a si. Kahdohnak zeihmanh a chuak lo nain Jet Vanlawng in bomb an thlak,” tiah AA chimphuannak nawlngeitu Khine Tu Khah nih a chim.
“SAC ralkap nih Vanlawng in bomb an thlak caah AA ralkap 6 an thi i, tam ngai hliamhma an pu. SAC ralkap nih hiti bomb an thlakmi cungah a herh ning in kan lehrulh hna lai,” tiah Khine Tu Khah nih a chim. Cu pinah AA camp chung sii-inn, sii khan le thil ṭhitnak seh zung telh in inn cheukhat a rawk. SAC ralkap Jet Vanlawng pahnih nih ruah lo piin Karen ramkulh in bomb an thlak dih in Thailand ram chung ah a lut, tiah AA nih nizan July 4 ah cathanh an chuah.
A luancia 2014 November 19 ah Kachin ramkulh, Laiza khua ah ralbawi cawnnak(training) sianginn cu SAC ralkap nih hriamngan in an rak kah caah ralbawi sinak cawngmi 23 an rak thi. A thimi 23 cu Ta Awng ralkap(TNLA) 11, AA ralkap 8, CNA/CNF in ralkap 2 le ABSDF in ralkap 2 an nunnak a rak liam.
Realchap, (Photo Dang), SAC Ralkap nih YeSinMah Khuami Fahnih ngei Nu Pakhat An Tlaihhrem Hnu In An Thah Beh! Gangaw peng, YeSinMah khua ah SAC ralkap nih fahnih ngei nu cu a bu in an tlaihhrem hnu ah Ngakchia pahinh tel in khuami 7 an thah hna tiah khuami hna sin in theih a si. PyoSawHtee tel in thazaang 200 hrawng SAC ralkap hna rallam cu nizan July 4 ah Gangaw peng, chaklei um khuate inn 600 leng a si mi YeSin ah an lut.
Khuami cheukhat hna cu an tlaih hna i an thah hna. Kum 22 a si mi fahnih ngei Pi Sandar Oo cu nizan ah an tlaih i an phu ning in an tlaihhrem hnu ah a fa le pahnih he an thah hna tiah khuami hna nih an chim. Kumkhat le cheu le kum 5 lawng a si rih i a fa le pahnih zong SAC ralkap nih an thah hna tiah khuami hna sin in theih a si.Cu nufa rual an konglam cu khuami hna zong nih zingka lawng ah kan theih tiah an chim. Thahnawn tong ve mi ngakchia hna 2 cu an tlaihhrem hna maw? hna lo ti theihnak caah mizapi vengti ralkap hna nih an hlat liopi si tiah theih a si.
India Rammi 2 Cu Pyusawhṭi Kut In An Nunnak A Liam! Tamu, Sawbua sang siangsangrun pawng ah India ramchung Mulay khuami 2 cu pyusawhṭi nih nihin July 5 chunhnu suimilam 1:00 hrawng ah meithal in an kahthah hna, tiah theih a si. Thah a tongmi hna hi India ram Mulay khuasa P. MOHAN, kum 28 le M. Iyarnar, kum 35 an si, tiah theih a si. India mi pahnih hna cu zei ruangah dah pyusawhṭi kut in an thih, thawng fiang theih a si rih lo.
Myanmar Ram Pumpi Nikhat Chung Kahdohnak Ah SAC Ralkap 19 An Thi, Myanmar ram pumpi huap July 4 nikhat chung kahdohnak ah SAC ralkap 19 an thi. , PDF Pathum an nunnak a liam ve tiah Khit Thit Media nih a langhter. Khit Thit Media nih cazin a khawmhsuat ning ah ,Sagaing ramthen, YeeOo ah 2, AYarDaw ah 2, Watlat ah 4, ChaungU ah 5, Magwe ramthen, Pakokku ah 2, Mandalay ramthen MyinChan ah 4 tiin an dihlak 19 an thi. Kayin ramkulh, Brigade 5 ah PDF Pathum an nunnak a liam ve .
Sagaing ramthen, Pale khuapi um SAC ralkap umhmun khuarnak cu PDF phufonh nih kan kahdoh hna i SAC ralkap 1 a thi tiah Leopard guerrilla army nih nihin July ah cathanh an chuah. Nizan zan Suimilam 7:00 Pm hawngah Pale khuapi um SAC ralkap an umnak hmunkip cu Pale Battalion 4 Leopard guerrilla army, Pale Battalion 5 Black guerrilla phu hna he hmunkhat ah mizapi vengtu ralkap phufonh a si mi hna Myaing Local PDF, Pale peng Local PDF hna i bawm in hrianngan in kan kahdoh hna tiah an langhter.
” Khuachungah Bu AungDin hla i chuah in mipi a hrotu SAC ralkap hna cu ( Bu AungDin Phu ) kan ti hna . Khuachung SAC ralkap hna an um nak hmunhma tampi cu kan kahdoh hna tiah Leopard guerrilla army in ralkap pakhat nih a chim. July 2 zong ah khan Pale peng KaanKyi khua ah a lut mi SAC ralkap 90 hrawng rallam cu PDF a fonhmi phu hna nih bomb an puah hna i SAC ralkap 15 hrawng an thi tiah an langhter.
Karen ramkulh, Kawkareih ASIA lampi KNU Satil zuatnak kam ah umhmun a khuar in phaisa a haltu SAC ralkap hna cu mizapi vengtu ralkap phu hna nih nihin July 5 zinglei Sml 6:00 hrawngah an kah hna i SAC ralkap 3 nak tam an thi tiah theih a si. ” Cu kahdohnak cu Sml 6:00 in 8:30 tiang a rau, gate luh man a haltu SAC ralkap hna cu Sniper in kan kah hna i 3 an thi ” tiah Kawkareih PDF thawngthanhtu hna nih Khit Thit Media ah a chim. June 30 zongah cu hmun ah cun SAC ralkap le Pah- Kah – phah phu kahdohnak a chuak i SAC ralkap 5 an rak thi.
Mandalay ramṭhen, MaTaYar(မတ္တရာ) peng PanTaLay Taung(ပန်းသလဲတောင်) le KyaukSeLay(ကျောက်ဆည်လေး) khua pawng ah hmunhma humhimnak tuah dingah a kal mi SAC ralkap pawl cu, nizan July 4 chun sml 12:40 ah NatSu(နတ်ဆိုး) phu nih bomb in an puahhnawh hna caah ralkap 5 an thi, tiah theih a si. Thazaang 20 hrawng in a kal mi SAC ralkap pawl cu, bomb in kan puahhnawh hna, tiah NatSu phu nih cathanh an chuah.
Cu ṭhiamṭhiam in Sagaing ramṭhen, Myinmu peng ah SAC ralkap motor pakhat cu PDF nih nizan July 4 zing sml 9:10 ah bomb lung 8 in kan puahhnawh hna i SAC ralkap 3 an thi, tam ngai hliamhma an pu. An motor zong a rawk, tiah Moe Ngeo(မိုးညို) PDF (MNRF) nih cathanh an chuah. SAC ralkap motor cu NaBeKyu Zayet(နပဲကြူးဇရပ်) le KanPya ZaYet(ကန်ဖျားဇရပ်) karah Moe Nyo Revolution Force M.N.R.F၊ PENTAGRAM, PEOPLE REVOLUTION FORCE P.R.F le People’s Guerillas Commando – Myinmu hna i bawm in an kah hna. PDF lei in a thimi le aa hliammi an um lo, tiah theih a si.
Mon ramkulh, MawLaMyaing khua ah SAC ralkap le palik nih PDF a bawmchantu hna cu an tlaih hna, tiah tualchung mi hna nih an chim. SAC ralkap nih a lam kip in PDF a bawmchantu hna cu an umnak hmun dik thliar tein an theih hna i, ralkap le palik tam ngai in an va tlaih hna, tiah theih a si. “An tlaih hna lioah SAC ralkap nih an duhmi an hmuh hlan lo cu, ralphaw hman ding in an chungkhar an tlaih hna,” tiah MawLaMyaing ummi pakhat nih a chim.
A luancia June thla zarh thumnak in July zarh khatnak tiang ah PDF a bawmchantu 10 nak tlawm lo an tlaih cang hna. Tam deuh cu ralphaw ah an hman hna. Palik cu mi sawhsawh bantuk tein meithal i put in motor in an i chawk. Atu le atu te chekhlatnak an tuah, tiah theih a si. SAC nih uknak lak hnu in Mon ramkulh ah tlaih a tongmi hi 600 hrawng an si cang. Cu chung ah tam deuh cu bia an ceih piak hna i, thong an thlak hna tiah theih a si. Crd-The Chin Post
Leave a Reply