Min Aung Hlaing Nih Mah Sawmnak Ah Hraimtlai Phu 9 An Kai Lai Tiah Fetternak A Tuah Cang
SAC ralhreang Min Aung Hliang nih tlangcung hriamtlai phu sinah daihnak sernak tonbiaruahnak sawmnak a tuah mi cu tuni May ni 9 a donghnak ni minpek a si. Tu nai tiang ah tlangcungmi hriamtlai phu chungah kahdohdaih lungtlinnak NCA min a thu cia mi hna lakah phu 6 le daihnak min a thu rih lo mi phu 3 an kai lai tiah SAC ralhrang lei nih fehter nak an tuah cang tiah theih a si.
Mah kongkau he pehtlai in Min Aung Hlaing nih a chim mi cu, ” NCA min a thu cia mi chungin DKBA, KNU(KNLA)PC, MNSP, RCSS(SSA), ALP, PNLO an kai lai i, NCA ah daihnak min a thu rih lo mi chungin UWSA, NDAA, SSPP( SSAA) hna cu an kai lai tiah fehternnak kan tuah cang.” tin a chim.
Zaw Min Htun nih ” Kan nih lei nih an mah lei cu usa peek in a ran khawh chungin tuanvo laak a si lai. Phu khat le phukhat an mah lei in an si khawh ning in ceihhmai in biaruahnak ngeih a si lai. Cheukhat nih cun kan kai lai lo tiah theihternak cathanh zong an chuah i, A kai lo mi cu um phung a si ko cuh.
Cheukhat nih kan mah le kan mah ceihmainak kan ngei lo tiah an chim. A tu ah kan kai lai tiah fehter in a chim mi hi hriamtlai phu 9 an si hna. Ram daihnak lam lei ah thanchonak ngeih dingin kan i zuam lai. Cheih hmainak a ngei hnga ding phu pawl he pehzulhin biaruahnak kan ngei peng ko lai.
Kan kai lai lo tiah cathanh a chuah tthan mi zong an um. Ceihhmai hnga ding federal le democracy hrambunhmi pyidaungsu system cu kan fethter mi a si cang. A dih hlan lo ceihhmainak kan ngei lo. Kan kai lai lo tiahcathanh a chuah mi lei in kan chimcia bantuk in an mah i ram daihnak cungah chiah mi, lungtlinh mi a dih in, inntek mipi sinah chiah mi ruahnak cu an peek khawh hna ko lai tiah ka chim duh mi cu a si.” tiah a chim.
Kan kai lai lo tiah cathanh a chuah mi a chim mi, KNU၊, KIA le ABSDF tiin tlangcung hriamtlai phu poah paoh phu he aa peh tlaimi minung itel pi ve in ceihhmainak a ngei kho mi lam si rih lo caah an kai lo bia a si tiah ka ruah ti zongin a chim. SAC ralhrang lei nih a tu caan hi zei paoh tuanvo laak in biachahnak a ngei kho mi pakhat ceihhmai a si lai caah a caan a that lio te a si ti zongin a chim.
Relchap, India ramchung i Mara miphun hna umnak Saiha District tiah mizapi nih kan hngalh mi Mara Autonomous District Council(MADC), kum 2022-2027 tiang hruaitu ding Members of District Council(MDC) thimnak cu a luancia May 5 ah khan rak ngeih a si i, vote hi nihin May 9 ah relnak ngeih a si. Mara Autonomous District Council(MADC) chung ah vote 42,342 a um i, vote ngeitu 36,199 nih an vote an thlak. Vote tla vialte hi 85.30% a si.
MADC ramchung ah hin pengkulh(constituency) 25 a um i, tutan 2022 MADC, MDC thimnak hi a voi 12nak General Election a si. Pengkulh 25 chung in candidates 85 an um i, Bharatiya Janata Party(BJP), Mizo National Front (MNF), Indian National Congress (INC), le Zoram People Movement (ZPM) party hna in MDC thimnak ah an i cuh hna.
Local Media nih an langhter ning ah nihin May 9 zanlei suimilam 6 hrawng ah vote relnak ngeih dih a si i, BJP nih pengkulh 12 ah teinak an hmuh i, MNF nih pengkulh 9, INC nih pengkulh 4 ah teinak an hmuh ve. MADC cozah hruai kho ding in pengkulh 25 chung in Party kip nih pengkulh 13 tal ah teinak an hmuh an hauh caah tutan MADC thimnak ahhin Cozah hruai kho ding Party an um lo. Cucaah party pahnih komh in MADC cozah an ser a hau lai tinak a si.
Leave a Reply