KBZ Bank Account Le KPay A Hmang Mi Account Cheukhat An Phih

KBZ Bank Account Le KPay A Hmang Mi Account Cheukhat An Phih Kawlram chung harsatnak a tong lio mi hna caah bawmh a hal tu hna nih an hman mi KPay le KBZ bank account hna cu KBZ bank nih a kharphih piak ruangah google play store le iOS Appstore ah KBZ Pay rating cu ni tlawmte chungah fak piin a tla tiah theih a si.

KBZ atu bantukin bank account cheukhat a phih caah Google Playstore ah rate 4 cunglei a si mi cu Rating 1.1 ah a tlak pin ah iOS Appstore ahcun Rating 3 ah a um rih tiah an ti.

Atu bantuk rating a tlak ruangah bank riantuannak ah buaibainak zeihmanh a pe lo nain a hmang tu hna lungthin a langhnak pakhat a si.

KBZ nih account a khar piak mi hna hi ralzaam hna, CDM hna le bawmhchanhtu phu riantuantu sin ah bawmhnak a pe tawn mi KPay, Wave Money, KBZ bank a hmangtu cheukhat hna an si.Khar piak mi ah an bank chungah phaisa sing a thonhthong in a ummi account hna zong a tel tiah theih a si.

KBZ nih an bank a hmang tu hna hi ti a tuah ruangah mi tampi nih rating ah an lungput an langhter mi a si.Cheukhat nih KBZ bank cu ralhrangbu nih an uk mi a si, zumh ding a si lo tiah comment an pek.Google Playstore, KBZ Pay ah comment a pe mi thong 40 leng an si tiah DVB nih a tial.

KBZ bank hi ramchung bank riantuannak ah market share 40& leng a ngei mi private bank pakhat a si.

The Chin Post