Faruso le Demoso ah kahdohnak a chuak,khuami cheukhat hriamngan nih a khen hna
Kaya ram ,Faruso le Demoso peng ,khua hna ah August 12 zinglei ah kahdohnak a um caah rallokap hna nih hriamngan in an kah hna ruang ah a tlawm bik khuami minung 2 hliamhma an tuar i inn zong cheukhat a rawk.
Tuzing Faroso peng ,Tekalodae khua pawng ah Demoso-Faroso Lampi cung ah rallokap le Karenni ralkap hna kar ah kahdohnak a um hnu ah khua chung lei ah rallomap nih hriamngan in an kah nak hi a si.
Tuzing Suimillam 10:00 in a thawk i Demoso peng lei in hraimngan in an kah hna ruang ah Demoso peng khua pawl lawng si loin Faruso peng khua hna zong hriamgan kuan a rak phaknak hi a si tiah khua mi hna nih an chim.
Demoso peng Ngiangkung khua ah hriamngan nih a tlak ruang ah Inn tlawmpal a rawh leng ah minung pakhat hliamhma a tuar.
Cu bantuk cun Faruso peng Thipaw khua zong hriamngan nih a tlak hna bantukin Lei kuang lei ah a tli mi kum 20 tluk nu pakhat phei ah hriamngan kuan nih a khenh caah fak ngai in hliam a tuar.
Hliamhma fak ngai a tuar mi cu sizung kalpi nak ding lam cu rallokap nih an kham caah zei bantuk motor hmanh kal kaqh a si lo tiah khuami pakhat nih a chim.
Zinglei suimilam 10:00am hrawng in Zaanlei tiang hriamngan in an kah chel an i dinh chel a si i Khuami hna zong inn leng chuak ngam loin innchung cio ah an i thup .
Tuzing zinglei suimilam 10 :30 am hrawng ah Faruso peng Tekaludae khua pawng ah hmunhma khuar mi rallokap hna le Karenni ralkap hna kar ah kahdohnak minute 5 chung a um tiah KNDF hna nih thawng an thanh.
Kahdohnak chung ah rallokap lei in minung 5 an thi, pa 3 an i hliam i meithal zong a hme mi he a ngan mi he an lak khawh tiah thawng an thanh.Demoso-Faruso lam cung ah Kadala khua pawng tuzing suimilam 11:00am hrawng ah kaphnih kahdohnak a um tiah thawng an thanh.
The Chin Post
Leave a Reply