Ralhrangbu colcang ning cu a remh lo, thangchonak a um lo ahcun kan tuah lio mi riantuannak pawl lawng si lo in Kawlram thanchonak caah bawmhnak kan pek mi vialte din ter dih dingin kan ruah tiah Japan ramleng pehtlaihnak vuanci Toshimitsu Motegi nih a chimh.
“Kan mah nihcun mahtin tuah hi kan duh tuk theng lo, Asinain a tubantuk dirhmun ahcun kan projet pawl hi kalpi peng awk a tha lo tih kan langhter a hau. Kawlram he hawitha kan si, Kawlram democracy a bawmhtu ram pakhat kan si nak ah hawi ramdang ai kan awh ding a si timi hi fiangtein chimh ka duh” tiah a ti.
Japan nih 2019 kum ah khan Kawlram thanchonak caah bawmhnak Japan Yen 189.3 Billion ($.1.74 billion) a bawmh.
Ralhrangbu nih uk nak a lak hnu Mipi cung an colcangnak ruangah Projet thar kong he pehtlaihin i chonhbiaknak vialte cu Japan nih a chah dih. Japan nih Kawlram thangchonak caah bawmhnak hi 1954 kum thawkin a rak pe cang mi a si i tubantuk bawmhnak din ter ding a chimh mi hi a voikhat nak a si.
A tu Japan nih a pek mi bawmhnak an hmuh lio mi Projet ah Yangon le Mandalay kar tlanglawng lam thuam ding cu projet ah a tel ve mi pakhat a si. Kawlram buainak ruangah Projet cheukhat cu din ter a si cang nain cheukhat belte cu kalpi rih a si.
American le EU nih ralhrangbu hruaitu, chungtel le a pehtlaihmi hna cungah kharphihnak an tuah nain Japan nihcun chonhbiaknak lei tu a kal pi deuh mi a si.
“Ralhrang colcangnak vialte ngawlcolh ding, tlaihmi vialte thlah ding le Democracy a nun than khawhnak dingah ralhrangbu sin ah a si khawh nak lam kip in kan nawl hna” tiah Motegi nih a chimh.
Tokyo nih Kawlram ah Democracy a umnak ding ah kan duh bantukin NLD cozah lio zongah pehtlaihnak tha a ngei mi a si. “Europe le American nak cun ralhrangbu telin kawlram he kan pehtlaihnak a tam deuh. G-7 pawl zong nih mah hi tha tein an theih ko” tiah a ti.
The Chin Post
Leave a Reply